Tokoni ki he Fakatamakí

Hake ha Peau-kula ʻi he ʻOtu Motu Pasifiki Tongá

ʻOku kei tokoni atu ʻa e kāingalotu ʻo e Siasí ki honau ngaahi kaungāʻapí mo e niʻihi kehé ke fai hano fakamaau hili hano hanga ʻe ha mofuike naʻe 8.0 hono mālohí, ʻo fakatupu ha peau-kula ʻi he Pasifiki Tongá ʻi he ʻaho 29 ʻo Sepitema 2009.

Naʻe hanga ʻe he mofuiké mo e peau-kula ʻo toʻo ha moʻui ʻa ha kakai ʻe toko 180 tupu pea laungeau ha kakai kuo pulia pe lavea pea lahi fau mo e ngaahi fale kuo maumauʻí. Naʻe fakapapauʻi mai kuo mālōlō ha kakai ʻe toko 140 ʻi Haʻamoa pea toko 30 tupu ʻi Haʻamoa ʻAmelika pea toko 9 ʻi Tonga. Naʻe kau ʻi he kau pekiá ha kāingalotu ʻo e Siasí ʻe toko 26—ʻa ia ko e toko 22 ʻi Haʻamoa pea toko 4 ʻi Haʻamoa ʻAmelika.

Naʻe tokoni leva ʻa e kau taki lakanga fakataulaʻeiki fakalotofonuá ke feau e ngaahi fie maʻu vivilí, ʻo kau ai ʻa hono tufaki ʻo e meʻakai, vai mo e ngaahi nāunau ki he moʻui haisiní. Naʻe ngāue fakataha foki ʻa e kau taki ʻo e lakanga fakataulaʻeikí pea mo e kau fakafofonga fakapuleʻangá mo e ngaahi kautaha tokoní ke fokotuʻutuʻu ha tokoni taimi lōloa. Naʻe tokoni ʻa e Siasí ke fakafolau vakapuna atu ha ngaahi nāunau tokoni mei Sōleki Siti ʻi he ʻaho 6 ʻo ʻOkatopá.

Haveki ʻa e ʻOtu Filipainí mo Vietinemi ʻe ha Ongo Afā

Naʻe ngāue fakatovave leva ʻa e Siasí mo e Kāingalotu ʻo e Siasí ke fai ha tokoni hili hono haveki ʻe he Afā ko Ketisaná ʻa e ʻOtu Motu Filipainí mo ʻĒsia Tongahahake, ʻa ia naʻe mate ai ha kakai ʻe toko 300 tupu ʻi he Sepitema mo ʻOkatopa ʻo e 2009.

Naʻe tomuʻa aʻu ʻa e matangí ki he ʻOtu Filipainí ʻo mole ai ha ʻapi ʻo ha kakai ʻe vaeua miliona. Naʻe fetukutuku leva ha kakai ʻe toko 560,000 tupu ki ha ngaahi ʻapitanga ʻe 600 tupu. Naʻe kau he toko 275 tupu kuo fakapapauʻi mai kuo pekiá, ha kāingalotu Siasi ʻe toko 12. ʻOku kei pulia ha toko 14. Naʻe maumauʻi ʻe he tāfeá ha ngaahi ʻapi ʻo ha kāingalotu ʻe toko 44 kae maumauʻi ha ngaahi ʻapi ʻe 223 kehe. Naʻe aʻu ki ha ngaahi ʻapisiasi ʻe 25 kuo maumau mei he tāfeá pea naʻe fakaʻaongaʻi ha ngaahi ʻapisiasi ʻe 25 kehe ko ha nofoʻanga fakataimi.

ʻI Vietinemí, naʻe toʻo ai ʻe he afā lahí ni ha moʻui ʻa ha kakai ʻe toko 40 tupu ʻi he tāfeá mo e holo ʻa e kelekelé. Naʻe fetukutuku ai ha kakai ʻe toko 200,000 tupu mei he vahefonua ʻi lotofonuá ki muʻa pea toki tō mai ʻa e afaá. ʻOku hao pē peaʻikai pulia ha taha ʻo e kāingalotu mo e kau faifekau ʻo e Siasí ʻi Vietinemí.

ʻI he uike hoko hokó, naʻe aʻu atu ai ʻa e Afā ko Pemá ki he ngaahi vahefonua ʻi he fakatokelau ʻo e ʻOtu Filipainí ʻo mate ai ha kakai ʻe toko 160 tupu.

Luluʻi ʻa ʻInitonīsia ʻe ha Ngaahi Mofuike Kehekehe

Naʻe hoko ha mofuike naʻe feʻunga hono mālohí mo e 7.6 ʻi ha maile ʻe 30 (50 km) mei he matāfanga ʻo e motu ʻInitonīsia ko Sumatilaá ʻi he ʻaho 30 ʻo Sepitema 2009. Naʻe toe tō mai he ʻaho hono hokó ha toe mofuike naʻe feʻunga hono mālohí mo e 6.8.

ʻOku laka hake he kakai ʻe 1,100 kuo mate pea laungeau mo e kakai kuo lavelaveá, pea tokolahi mo ha kakai ʻoku kei ʻefihia mo tonumia ʻi he kelekelé. Naʻe haveki ʻe he mofuiké ʻa e ngaahi falemahakí, ʻapiakó, falekoloá, hala-fakakavakavá pea mo e ʻū halá. Naʻá ne motuhi ʻa e uaea ʻuhilá mo fakatupu ha holo ʻa e kelekelé.

Kuo lipooti mai ʻoku hao moʻui kotoa ʻa e kāingalotu ʻo e Siasí pea ʻikai hoko ha maumau ki ha ʻapisiasi; ko e uhouhonga ʻo e mofuiké naʻe feʻunga ia mo ha maile ʻe 500 (800 km) mei he feituʻu ʻoku nofo ai ha kāingalotu.