Ko e Ngāue ʻi he Siasí

Ko Hono Foaki ki he Fānaú ha Faingamālie ke Tokoni

Fai ʻe Jenny Baker

ʻE lava ke talaatu ʻe ha taha pē ʻoku ngāue ʻi he Palaimelí ʻoku faʻa faingataʻa ki he fānaú ke nau omi ki he Palaimelí kuo nau mateuteu ke tangutu fakalongolongo mo ako. Tatau ai pē pe ko e hā ʻa e taukei ʻo ha taki pe ko e lahi ʻo e ʻofa ʻa e kau faiakó ʻi heʻenau kalasí, ʻoku ʻi ai pe ʻa e taimi ia ʻoku pauʻu ai ʻa e fānaú.

Kuo ʻosi fakahā ki he Kāingalotu ʻo e Ngaahi ʻAho Kimui Ní ʻoku fie maʻu ʻe he kāingalotu foʻou kotoa pē ʻo e Siasí ha fatongia.¹ ʻOku tokoniʻi e ʻi ai honau fatongiá ke nau ongoʻi ko ha konga kinautolu ʻo e Siasí pea ʻoange ai kiate kinautolu ha faingamālie ke nau ako mo tupulaki ai. ʻE lava ʻa e fānaú ke nau maʻu ʻa e ngaahi tāpuaki tatau ʻi he taimi ʻoku ʻoange ai kiate kinautolu ha faingamālie ke nau tokoní.

ʻOku ʻikai foaki ha ngaahi fatongia ki he fānaú, ka ʻe lava ʻa e kau taki ʻo e Palaimelí ʻo kumi ha ngaahi faingamālie tokoni ʻo aʻu ki he kiʻi tamasiʻi siʻisiʻi tahá. Ko ha ngaahi fokotuʻu fakakaukau ʻeni ʻe niʻihi:

• ʻAi ha taha ʻo e fānau lalahi angé ke tokoniʻi ha taha ʻo e fānau iiki angé he lolotonga e taimi feʻinasiʻakí.

• Fakaafeʻi ha taha ʻo e fānau naʻe aʻu vave maí ke tuʻu he matapaá ʻo talitali ʻa e toengá ʻi heʻenau hū mai ki he Palaimelí.

• Vahe ki ha taha ʻo e fānau lalahi angé ke ne tokangaʻi hono fakapapauʻi kuo ʻosi fakamoʻui ʻa e meʻa fakaongo leʻo lahí.

• Kole ki ha niʻihi ʻo e fānau lalahi angé ke nau ʻomai ha sioka, meʻa tāmate palakipoe, kala valivali, pe ha toe ngaahi meʻa kehe mei he laipelí.

• Kole ki ha taha ʻo e fānau ʻoku poto he tā pianó ke ne tā ʻa e fasi teuteú pe himi mātukú.

• Vahe ha ongo kaungāmeʻa ke na tangutu ofi ki ha tokotaha ʻaʻahi pe mēmipa foʻou peá na tokoni ki he tokotaha ko iá ke ne ongoʻi lata.

• Fakaafeʻi ha taha ʻo e fānaú ke tokoni ʻi hono tā ʻo e hivá.

• Vahe ki ha niʻihi ʻo e fānaú ke nau tokoni ʻi hono fokotuʻutuʻu mo hono pelu ʻo e ʻū seá.

• Kole ki ha taha ʻo e fānaú pea mo hono fāmilí ke nau ʻaʻahi ki ha taha ʻo e fānau foʻou ʻi homou uōtí pe koló.

• Kole ki ha taha ʻo e fānaú ke ne pukepuke ha fakatātā.

• Kole ki ha taha ke ne tā ha kiʻi fakatātā faingofua ke fakaʻaongaʻi ʻi hoʻo lēsoní.

• Kole ki ha niʻihi ʻo e kalasí kuo fili ke nau faʻu ha fakahaka ʻo ha foʻi hiva foʻou ʻoku nau ako.

• Tokoni ki ha taha taʻu 11 ke ne palani ha ʻaho ʻekitivitī ʻa e Palaimelí. ʻE tokoni ʻeni ki he kiʻi tamasiʻí ke ne fakakakato ha fie maʻu ʻi he Tui ki he ʻOtuá.

Tatau ai pē pe ko e hā hano lahi pe siʻisiʻi honau fatongiá, manatuʻi ke fakamālō ki he fānaú ʻi heʻenau tokoní.

Kuó u fiefia he ngāue mo e fānaú ʻi heʻenau ako ke tokoní. ʻOku fakafiefia ke te mamata ʻi heʻenau tupulaki mo fakaʻaongaʻi ʻa e ngaahi taukei ʻi he polokalama ʻa e Kau Talavoú mo e Kau Finemuí ʻa ia naʻa nau kamata fakatupulaki ʻi he Palaimelí.

Maʻuʻanga Fakamatalá

1. Vakai, Gordon B. Hinckley, “Kau Uluí mo e Kau Talavoú,” Tūhulu, Siulai 1997, 55.

Ko e Meʻa ʻOku Mahuʻinga Moʻoní

ʻOku fakamatala ʻa ʻEletā Kēneti Sionisoni ʻo e Kau Fitungofulú ki ha taimi naʻá ne vali ai e tuʻa fale honau ʻapí pea kole ange hono kiʻi foha taʻu nimá ke tokoni: “[Hili ʻeku ʻoange] ki ai haku sote motuʻa naʻe tōtōlofa, ʻo meimei aʻu ki he falikí pea toe pelu tā tuʻo lahi mo e ongo nimá, ne ma kamata ngāue leva ki he matapā ʻokú ne maluʻi ʻa e hūʻanga ʻi muʻa ki homau falé. Naʻá ne vali ʻe ia ʻa e konga ki laló ka u vali ʻe au ʻa e konga ki ʻolungá. Naʻá ku fakatokangaʻi koeʻuhí ko hono taʻú pea mo hono lahí, naʻe ʻikai ke ne lava ai ʻo vali ke mafola lelei ʻa e valí pea tupu ai ha petepete ʻa e valí. Ko e taimi kotoa pē naʻe punou ai ke unu ʻene polosí, naʻá ku fakahamolemoleʻi fakavavevave ʻa e vali naʻe ʻi he konga ki laló, peá u toe foki ki heʻeku kongá koeʻuhí ke ʻoua naʻá ne fakatokangaʻi ʻa e meʻa naʻá ku faí. Hili ha taimi nounou mei ai peá u pehē ko e meʻa ʻoku toe mahuʻinga ange ʻi ha vali leleí ko e faingamālie ko ia ke ngāue mo hoku fohá. ʻI heʻeku fakakaukau atu ki aí, kuó u fakatokangaʻi ʻa e lelei ʻo ʻene ngāué. Talu mei ai, ko e taimi pē ʻoku ou ofi atu ai ki he matapaá mo fakatokangaʻi e sīpinga makehe hono teuteuʻí, ʻoku fakamanatuʻi mai ai kiate au ʻa e meʻa ʻoku mahuʻinga moʻoni ʻi heʻetau moʻuí.”

Mei he, “We All Have a Father in Whom We Can Trust,” Ensign, May 1994, 30.

Toʻomataʻú: faitaaʻi ʻe Robert Casey