Ko e Ongoongoleleí ʻi Heʻeku Moʻuí
Koeʻuhí ke Tau Maʻu ʻa e Fiefiá
Ko e meʻa kotoa pē naʻá ne ʻai ke faingataʻa ʻeku ngāue fakafaifekaú naʻe hangē naʻá ne taʻofi au ke ʻoua naʻá ku fiefia. Ka ʻoku pau nai ke pehē?
Naʻe ʻikai fuoloa kuó u fakatokangaʻi ʻe mātuʻaki kehe ʻeku ngāue fakafaifekaú mei he meʻa naʻá ku ʻamanaki ki aí. Naʻá ku fehangahangai mo ha ngaahi faingataʻa taʻe-ʻamanekina. Naʻá ku feinga ke u maʻu ha loto hangamālie, ka naʻe faʻa fehālaaki maʻu pē ʻeku ngaahi feingá, peá u loto foʻi ai. Meʻamālié, he naʻá ku maʻu ha fakalotolahi ʻi heʻemau ngaahi konifelenisi fakasouní, ʻa ia ʻoku fakaʻosi maʻu pē ʻaki ha houa fakamoʻoni.
ʻOku ou manatuʻi ha konifelenisi fakasouni ʻe taha naʻe tuʻu kotoa ai ʻa e kau faifekaú, ʻo fakahaaʻi ʻa e fiefia ʻi he ngāue fakafaifekaú. ʻI he lolotonga ʻo e fakatahá, naʻá ku kamata ke ongoʻi taʻe-fiemālie. Kuo ʻosi ʻeni ha taʻu ʻe taha ʻo ʻeku hoko ko ha faifekaú, ka kuo teʻeki ai ke u ongoʻi ʻa e fiefia ʻoku fakamatalaʻi ʻe he niʻihi kehé. Naʻá ku foki mei he konifelenisi ko iá mo e loto mafasia mo puputuʻu, pea mo fehuʻia pe ko e hā ʻoku ou ngāue fakafaifekau aí. Ko e hā ʻoku fehālaaki ʻiate aú? Ko e hā ʻoku ʻikai ke u lava ai ʻo ongoʻi ʻa e fiefia tatau ko iá? Naʻá ku fakahā ki he Tamai Hevaní ʻi he fuoloa ange ʻo e pō ko ʻení ʻa ʻeku hohaʻá mo kole kiate Ia ha founga ke u ongoʻi ai ʻa e faʻahinga fiefia peheé.
Ne ʻosi mei ai ha ngaahi uike, pea lolotonga haʻaku kau atu ki ha konifelenisi fakasiteiki, naʻá ku maʻu e talí lolotonga ha lea ʻa ʻeku palesiteni fakamisioná. Neongo ko ʻene leá ki he lauingeau ʻi he haʻofangá, ka naʻá ku ongoʻi ko ʻene lea fakahangatonu maí kiate au. Naʻá ne lea ʻo kau ki he fiefia ʻi he Huhuʻi ʻa Kalaisí ʻoku lava ke tau ongoʻi fakaʻahó. Naʻá ne fakamoʻoniʻi, naʻa mo e lolotonga ʻo e taimi faingataʻa mo taʻe-paú, te tau kei lava pē ke ongoʻi ʻa e fiefia mei he mahino kiate kitautolu ʻa hono mahuʻinga ʻo e Fakalelei ʻa e Fakamoʻuí.
Naʻá ku ʻiloʻi ko e ngaahi lea ko iá ko e ngaahi lea kiate au. Ne tali ʻe he Tamai Hēvaní ʻeku lotú. Mahalo naʻe ʻikai tatau ʻeku ngāue fakafaifekaú mo e anga ʻo ʻeku fakakaukaú, ka naʻe ʻofa ʻa e Fakamoʻuí ʻiate au pea naʻá Ne fai ʻa e fakalelei ki heʻeku ngaahi angahalá. Ko e fiefia naʻá ku pehē naʻe teʻeki ke u teitei maʻú naʻá ne takatakaiʻi au. Naʻe ʻikai pē ke u fakaava ʻe au hoku lotó ke u ongoʻi ia.
Naʻe kei hoko atu pē ʻa ʻeku faingataʻaʻiá, ka naʻe akoʻi au ʻe he meʻa ko ʻeni naʻe hokó te u lava ʻo ongoʻi ʻa e fiefiá ʻi haʻaku fili ke fakaava hoku lotó ki he mālohi ʻo e huhuʻi ʻa e Fakamoʻuí pea mo vahevahe ʻeku fakamoʻoni ki he mālohi ko iá mo e niʻihi kehé.
Talu mei heʻeku ngāue fakafaifekaú mo e mahino kiate au ʻoku ʻikai ha mālohi tuʻuloa ʻo e ngaahi tūkunga pea mo e ʻātakaí, ke uesia ʻetau fiefiá. Ka, ko e fiefia moʻoní ʻoku maʻu ia mei he talangofua pea mo e tui ki he Tamai Hēvaní pea mo Hono ʻAlo ko Sīsū Kalaisí, ʻa ia naʻá Ne fakatupu ʻa e moʻui ko ʻení—pea mo e moʻui ka hokó—“koeʻuhí ke [tau] maʻu ʻa e fiefiá” (2 Nīfai 2:25).
Te tau lava ʻo ongoʻi ʻa e fiefiá ʻi he mahino kiate kitautolu hono mahuʻinga ʻo e Fakalelei ʻa e Fakamoʻuí.
Ko e Tokotaha Maʻongoʻonga Tahá, tā ʻe Del Parson, fakaʻaongaʻi ʻi he angalelei ʻa e Musiume Hisitōlia ʻo e Siasí