ʻOku ou faʻa kole ki hoku ngaahi kaungāmeʻa teʻeki Siasí ke mau ō ki he lotú. ʻE sai pē ke u ʻalu mo kinautolu ki heʻenau lotú kapau te nau kole mai ke mau ō?

Neongo ʻoku ʻikai totonu ke ke liʻaki hoʻo ngaahi houalotú ka ke ʻalu ki ha siasi kehe mo hao kaungāmeʻa, ʻoku sai pē ke ke ʻalu he taimi ʻe niʻihi mo ho ngaahi kaungāmeʻá ke ke sio ʻi he anga ʻo ʻenau lotú. Te ke maʻu ai ha faingamālie ke ako ki he ngaahi tui fakalotu kehé pea mo e meʻa ʻoku tau faikehekehe aí. Manatuʻi ke ke anga fakaʻapaʻapa ki heʻenau ngaahi mōihuú, ʻo hangē pē ko ʻenau fakaʻapaʻapaʻi ʻetau ngaahi founga lotú.

Mahalo ʻe hanga ʻe hoʻo ako ki he tui fakalotu ho ngaahi kaungāmeʻá ʻo ʻai ke mou lava ʻo talanoa tauʻatāina fekauʻaki mo ha ngaahi tefito fakalotu. ʻE tokoni e mahino ki he ngaahi meʻa ʻoku mahuʻinga kiate kinautolú ki hono fakamatalaʻi ʻo e meʻa ʻoku mahuʻinga kiate koé. Te nau houngaʻia ʻi hoʻo feinga ke ʻilo lahi ange kiate kinautolu pea mo ʻenau tuí.

Tokanga ʻi hoʻo fakahoko ʻení. Fakaʻehiʻehi mei hano fai ha faʻahinga meʻa he ʻikai te ke ongoʻi fiemālie ai pe fakatupu ai haʻo fakafehuʻia hoʻo tui fakalotú pea mo e ngaahi tuʻunga moʻui totonú. Kimuʻa peá ke ʻalú, lotu ke ke maʻu ʻa e Laumālié. Peá ke fiefia ʻi he faingamālie ke fakalahi ai hoʻo ʻilo ki he ngaahi tui fakalotu kehekehé, ka ʻi he taimi tatau pē, maʻu ha mahino lahi ange fekauʻaki mo hoʻo tui fakalotú.