Pehē ange mai te u lava ʻo talaki ki māmani kotoa ʻa e ongoongoleleí. Ka ʻi he taimi ʻoku ou feinga aí, ʻoku ou ongoʻi ʻoku ʻikai feʻunga ʻeku ʻiló. ʻE anga fēfē haʻaku feinga ke vahevahe ʻa e meʻa ʻoku ou tui ki aí?
ʻOku vahevahe ʻe he kakaí ʻenau fakamoʻoní ʻi ha ngaahi founga kehekehe. ʻOku ʻi ai ha kakai ʻe niʻihi ʻoku faingofua pē ʻenau fakahoko ʻenau fakamoʻoní kiate kinautolu ʻoku nau feohí. ʻOku ʻi ai ha niʻihi te nau lava ʻo hiki ʻenau fakamoʻoní ʻi ha mataʻitohi lelei. ʻOku ʻi ai mo ha niʻihi ʻoku nau vahevahe ʻenau fakamoʻoní ʻi he mūsiká pe ʻātí. ʻOku toe vahevahe foki ʻa e fakamoʻoní ʻi he tā-sīpingá, pea mo e anga ʻo ʻetau moʻuí.
ʻE tupulaki hoʻomou fakamoʻoní ʻi hono vahevahé pea te ke maʻu ai ha loto falala ʻo ʻikai ngata pē ʻiate koe ka ʻi hoʻo fakamoʻoní foki. Lotua ha tokoni pea mo ha ivi ke fakatupulaki lelei ange hoʻo malava ke vahevahe ʻa e meʻa ʻokú ke tui ki aí mo e niʻihi kehé. Kuo ʻosi talaʻofa ʻa e ʻEikí kapau te ke fakaava ho ngutú, ʻe fakafonu ia (vakai, T&F 33:8).
Kapau ʻokú ke ilifia ke lea ʻi he ʻao ʻo e kakai kehé, feinga ke ke hiki hoʻo fakamoʻoní peá ke lau leʻo lahi pē ia kiate koe. Mahalo ʻe lava ʻeni ʻo tokoni ke ke ongoʻi fiemālie ange ai ʻi hoʻo vahevahe hoʻo fakamoʻoní. Kamata ʻaki haʻo vahevahe ia mo e fāmilí pe ngaahi kaungāmeʻa ofí. Fakahoko pē ha fanga kiʻi meʻa iiki mo faingofua, ʻo falala ki he ʻEikí, pea hili ha vahaʻa taimi te ke ongoʻi ʻokú ke fiemālie lahi ange ke fai hoʻo fakamoʻoní ʻi he ngaahi houalotu fakamoʻoní pe ki ha taha te ke fetaulaki mo ia.
ʻOua te ke hohaʻa koe pe ko e hā e fakakaukau ʻa e kakaí kiate koé. Kapau kuo nau mateuteu, ʻe fakaafeʻi ʻe hoʻo fakamoʻoní ʻa e Laumālie Māʻoniʻoní ke ne ueʻi kinautolu. Manatuʻi ko hoʻo fakamoʻoní ʻoku ʻaʻau ia pea ʻoku mahuʻinga ia ki he ʻEikí pea kiate koe foki.
Naʻe pehē ʻe Palesiteni Tōmasi S. Monisoni: “ ʻOku ʻi ai hoʻomou fakamoʻoni: vahevahe atu ia. ʻOua naʻa mou teitei taʻe-tokaʻi ʻa e mālohi kāfakafa ʻo hoʻomou fakamoʻoní” (“Ke Mou Hoko ko ha Faʻifaʻitakiʻanga,” Liahona, Mē 2005, 115; “A Code to Live By,” New Era, Sept. 2005, 8).