Haʻu Mateuteu ke Vaʻinga
ʻOku ʻikai feʻunga hoʻo haʻú pē.
Ko e pasiketipoló ko e taha ia ʻo e ngaahi meʻa mahuʻinga taha ʻi he moʻui ʻa Lousa ʻEniliki Velasikuesi Paletesí, ka ʻoku ui pē ko Koki ko ʻene faingofua ange hono puʻakí ʻi he taimi ʻoku toe siʻi ai ʻa e taimí pea taʻe-mahino mo e tuʻunga ʻo e vaʻingá.
Ko Kokí, ko ha mēmipa ia ʻo e Uooti Vikatōliá ʻi he Siteiki Puno Pelū Lotolotó, pea naʻá ne vaʻinga ko ha foueti ʻi he timi Penisoni Sesi siʻi hifo he taʻu 17, ko ha timi liiki fakakolo naʻe fakalele ʻe he kāingalotu ʻo e Siasí ʻi Puno, Peluú. Naʻe teʻeki foʻi tuʻo taha ʻa e timi ʻa Kokí ʻi heʻene hū mai ki he tau haú he toʻu vaʻinga ʻe ua kuo ʻosí pea naʻe fika ua ʻi he ongo taʻú fakatouʻosi.
Ne ʻikai ngata ʻi hono akoʻi ʻa Kiko ʻe he meʻa kuó ne foua mo e timi pasiketipoló, ka naʻá ne ako lahi ki hono moʻui ʻaki e ongoongoleleí mo hono ʻai ke mahuʻingamālie ange ʻa e seminelí.
Naʻá ne kata pē mo pehē, “ ʻOku ʻikai fuʻu faikehekehe ʻa e seminelí mo e pasiketipoló. Kuo pau ke u ʻā pongipongia kiate kinaua fakatouʻosi.”
ʻOku fakakata, ka ʻoku ʻilo ʻe Koki ha ngaahi meʻa mahuʻinga ʻoku faitatau ai ʻa e vaʻinga ʻoku saiʻia aí pea mo e ongoongolelei ʻokú ne moʻui ʻakí: kuo pau ke ke fanongo ki he faiakó, fakaʻaongaʻi ʻa e meʻa ʻokú ne akoʻí, pea ʻoua naʻa toe tuku hoʻo ʻahiʻahi ke fai ʻa e meʻa kuó ke akó.
Fakafanongo ki Hoʻo Faiakó
ʻOku pehē ʻe Koki ʻoku sai ʻaupito ʻene faiakó, ka ʻoku ʻikai hano ʻaonga e lelei hoʻo faiakó kapau he ʻikai ke ke fanongo. ʻOku ʻikai toe kehe ia mo e Seminelí.
ʻOku pehē ʻe Koki, “ ʻOku ou fakatou maʻu ai ha faiako lelei ʻi he pasiketipoló mo e seminelí. Ka, ʻo kapau he ʻikai te u fanongo, he ʻikai ke u toe lelei ange.”
ʻOku feinga e faiakó ke ne akoʻi ʻa e taha vaʻingá ʻi he ngaahi meʻa ʻe toe lelei ange aí, hangē ko e founga fakahuú. ʻOku pehē ʻe Koki, “ ʻOku fakahoko ʻe he faiakó ʻa e meʻa tatau.” ʻI he ngaahi meʻa kehe ke faí, ʻoku feinga ʻa e kau faiakó ke tokoniʻi ʻa e kau akó ke nau ikunaʻi honau fili ʻi he moʻuí. “ ʻOku nau feinga ke akoʻi kitautolu ʻi he founga ke tukuange ai ʻa māmaní pea mo fakamālohia kitautolu ke tau matuʻuaki ʻa e fakatauelé.”
Kuo ʻilo ʻe Koki ʻoku ʻikai feʻunga ʻa e haʻú, ke lelei ange ai ha taha ʻo tatau ai pē ʻi he pasiketipoló, seminelí pe ko e lotú. Kuo pau ke ke fanongo ki he faiakó.
Fakaʻaongaʻi ʻa e Meʻa Kuo Akoʻi Atú
ʻOku feinga ʻa Koki ke fanongo lolotonga hono fakamatalaʻi ʻe he faiakó ha meʻa ʻoku foʻou. Ka kuó ne ʻilo kapau ʻokú ne fie maʻu moʻoni ke mahino ʻa e meʻa ʻoku lea ʻaki ʻe he faiakó, kuo pau ke ne hanga ʻo fakaʻaongaʻi ia.
ʻOku pehē ʻe Koki ko hono fakaʻaongaʻi pe ngāue ʻaki iá, ko ha konga mahuʻinga ia ʻo e akó. ʻE lava ha faiako ʻo fakamatala he ʻahó kakato fekauʻaki mo e fakahū leleí pea aʻu ʻo ne toutou fakatātaaʻi, ka ʻo kapau he ʻikai ke ke ako ke fakahoko ʻa e meʻa ʻokú ne akoʻí, he ʻikai ke ke ʻilo ʻe koe ʻa e founga ke fakahoko ai iá.
ʻOku pehē ʻe Koki, “Ko e founga ia ne u ako ai ʻa e lotú.” Naʻe akoʻi kiate ia ko e faʻa lotu fakatāutahá te ne fakaafeʻi mai e tokoni ʻa e ʻEikí. “Ka naʻá ku toki ʻilo pē hono moʻoní ʻi he hili ʻeku ʻahiʻahi fakahoko iá.”
ʻOku hanga ʻe hono fakahoko ʻo e ngaahi tefitoʻi moʻoni ʻo e ongoongoleleí ʻo ʻoange ha faingamālie ki he Laumālie Māʻoniʻoní ke ne fakamoʻoniʻi mai kiate kitautolu ʻoku moʻoni ʻa e tefitoʻi moʻoni ko iá.
ʻOku pehē ʻe Koki, “Kapau ʻoku tau ako ha meʻa foʻou ka ʻoku ʻikai ke tau fakahoko ia, ʻoku hangē pē ne ʻikai ke tau ako iá.”
Fakaʻaongaʻi Ia naʻa Mole
Naʻe fanongo ʻa Koki ʻi he taimi naʻe fakahinohino ai ʻene faiakó fekauʻaki mo e fakahuú, peá ne feinga ke fakahoko ʻa e meʻa naʻá ne akó. Ka, koeʻuhí ke fakalakalaka, kuo pau ke faivelenga ʻi hono toutou fakahokó.
ʻOku ʻuhinga ʻa e faivelengá ke līʻoa pe vilitaki ʻi hono fakahoko ʻo e meʻa kuó ke akó ʻo aʻu ai pē ki hoʻo fehangahangai mo e filí.
ʻOku pehē ʻe Koki, “Kuo pau ke u moʻui līʻoa. Kapau ʻe tuku ʻeku fakamālohisinó, ʻe hōloa e taukei kuó u maʻú.”
Ko ha lēsoni mahuʻinga ia kuó ne ako hili ha ʻikai ke lava ʻo fakamālohisino ʻi ha kiʻi vahaʻataimi nounou ʻi ha lavea hono ihú ʻi ha vaʻinga mo ha kau vaʻinga naʻe mātuʻotuʻa ange.
ʻOku pehē ʻe Koki, “Kapau he ʻikai ke tau ako ke fakahoko ia, he ʻikai ngata pē ʻi he tuʻu ʻo ʻetau fakalakalaká—ʻoku tau holomui. Ko e meʻa tatau pē ʻi he moʻui fakalaumālié. Kapau te tau tokanga mo fakaʻaongaʻi ʻa e meʻa ʻoku tau akó, te tau lava ʻo ako ha meʻa lahi ange. Ka ʻikai, ʻe mole meiate kitautolu ʻa ia ʻoku tau maʻú.”
ʻOua Naʻá ke Foʻi
Naʻe fai ʻe he kaungā vaʻinga ʻo Kokí honau lelei tahá ke fakafanongo ki he faiakó pea fakaʻaongaʻi ʻa e meʻa kuó ne akoʻi ange kiate kinautolú. ʻOku laulau houa ʻenau ako vaʻingá ke nau manatauʻi ʻa e meʻa kuo nau akó.
Kuo nau ʻilo foki neongo kotoa ʻeni, ʻoku kei malava pē—pea ʻoku fakamamahi—ke tōnounou mei he haohaoá. ʻOku pehē ʻe Koki, “Naʻa mau ngāue mālohi. Ka ʻoku fakatupu lotofoʻi ke toe foʻi pē ʻi he tau haú.”
Pea neongo ʻoku ʻikai fakapapauʻi ʻa e haohaoá, ka ʻe taʻe-malava, kapau ʻe tuku ʻenau feingá. ʻI he taimi tatau pē, kuo ʻosi fakatokangaʻi ʻe Koki ʻoku lahi ʻa e ngaahi olá, kau ai ʻa e laka ki muʻa pea mo e fakalakalaka ʻoku maʻu mei he feingá.
Kuo ʻosi mamata ʻa Koki, ʻa ia ʻoku hoko he taimí ni ko ha taki faifekau ʻo e uōtí, ki he ngaahi pale ʻo e faivelenga ʻi he loto malaʻé pea mo tuʻa foki. Naʻe tokoni ʻi hano palani ha ngaahi pō heleʻuhila, ngaahi nofo kemi, pea mo ha ngaahi ʻekitivitī sipoti ke tokanga mai ai ʻa e kau talavou ʻi hono uōtí naʻe kiʻi fuoloa ʻenau liʻaki lotú. ʻOkú ne pehē, “ ʻI he kamataʻangá naʻe pau ke mau ō ʻo ʻomi kinautolu, he ka ʻikai he ʻikai ke nau ō mai. Ko e taimi ní ʻoku nau ō mai pē ʻiate kinautolu. Naʻe kiʻi fuofuoloa pea naʻe lahi mo e ngaahi ʻaʻahi kiate kinautolú, ka kuo hokohoko ʻeni ʻenau ō maí.”
ʻI he pasiketipoló, ʻalu ki he seminelí pea mo e ngāue ʻi he Siasí, kuo ʻilo ai ʻe Koki ʻa e ʻuhinga ʻa e Tuʻi ko Penisimaní ʻi heʻene pehē kuo pau ke tau faivelenga ke “maʻu ai ʻa e palé” (Mōsaia 4:27).
Kuó ne toe ʻilo foki ʻoku mahuʻinga hono ngāueʻi ʻa e palé, ʻo tatau pē ʻi he loto malaʻe vaʻingá pea mo tuʻa.
Ngaahi faitā ʻa Adam C. Olson