M̧aanjepopo n̄an Kōjeram̧m̧an ko an Tampeļ

Eļtōr Russell M. Nelson

Jen Doulul eo an Jon̄oul Ruo Rijjilōk ro

Kajjojo tampeļ ej kōkkaļļe in ad tōmak ilo Anij im juōn kein kam̧ool kōn ad tōmak ilo mour ālikin mej. Tampeļ eo ej menin jibadōk an aolep m̧akūtkūt ko, aolep katak, aolep buñtōn in eddōkļo̧k ilo Kabuñ eo.

Āinwōt an tampeļ ko m̧aanjepopo ñan armej ro, armej ro rej aikuj kōpooj er make ñan etal ñan tampeļ eo.

Kar jei ioon kajjojo tampeļ rej naan ko “kwojarjar ñan Irooj.”¹ Naan in ej jim̧or kōn kwaļo̧k tampeļ eo im wūn ko an rekwojarjar. Ro rej deļo̧ñ ilo tampeļ eo rej barāinwōt bōk jinōkjeej in kwojarjar eo.² Āinwo̧t an tampeļ ko m̧anjepopo ñan armej, armej ro rej aikuj kōpooj er make bwe ren etal n̄an tampeļ eo.

Juōn tampeļ ejenolo̧k jān m̧ōn jar ko jet. Ej jab āinwōt m̧ōn jar ko, tampeļ eo ej kilōk ilo Jabōt bwe armej ren etal in jar im pād ippān baam̧le ko aer ilo raan eo ekwojarjar. Tampeļ ko rej peļļo̧k ñan jerbal ko rekwojarjar ilo raan ko jet ilo wiik eo. Juōn tampeļ ej lukkuun m̧weo im̧ōn Irooj, im emōj kōpooj ñan kien ko raurōk ñan indeeo. Kain̄i ko ekoba peptaij, m̧are, menin letok kwojarjar ko, im liāp ko.

Kajjojo tampeļ ej kōkkaļļe in ad tōmak ilo Anij im juōn kein kam̧ool kōn ad tōmak ilo mour ālikin mej. Tampeļ eo ej menin jibadōk an aolep m̧akkūtkūt ko, aolep katak, aolep buñtōn in eddōkļo̧k ilo Kabuñ eo. Aolep ad kijjejeto ko ilo kwaļo̧k ko̧o̧jpeļ eo, kowāppenļo̧k armej ro rekwojarjar, im lomo̧o̧ren ro remej rej tōl ļo̧k ñan tampeļ eo ekwojarjar. Kain̄i ko an tampeļ eo relukkuun aurōk. Jeban ro̧o̧ļo̧k ñan aiboojoj an Anij eļan̄n̄e ej kōn er.

Kajjojo kain̄i an tampeļ ej juōn jerbal in kalim̧m̧ur ejjab pata

Ilo tampeļ eo jej bōk juōn menin letok kwojarjar, me ej, ilo lukuun kōnono, juōn menin letok. Jej aikuj in meļeļe aurōk in jetōb eo an im aurōk in dāpij bujen im eddo ko rekwojarjar jej kōm̧m̧ani ilo bōk menin letok in. Kajjojo kien in tampeļ ej juōn m̧antin kabuñ ñan deplo̧ke, ej juōn jerbal in kalim̧ur ejjab pata.³

Menin letok kwojarjar eo an tampeļ eo ekar leļo̧k kōn m̧ōdānļo̧k. Āindein, em̧m̧antata meļeļe kōn m̧ōdānļo̧k, emmourur in bukōte kōn juōn bōro erreo. Būreejtōn Brigham Young ar kōmeļeļe bwe “menin letok kwo̧jarjar am̧ ej, ñan bōk aolep kien kaņ ilo m̧weo im̧ōn Irooj, me rej menin aikuj ñan kwe, ālikin am̧ ilo̧k jān mour in, ñan kwe bwe kom̧ maron̄ in ro̧o̧l ļo̧k ñan ippān Jemed, ļeiļo̧k jān enjeļ ro ro rej jutak āinwōt riwaj, … im bar juōn am̧ utiej tata indeeo.⁴

Pokake ñan bujen ko rekwojarjar kar kōm̧m̧ani ilo tampeļ ko ej kōkkare kōj n̄an mour indeeo

Ilo kajjojo tampeļ m̧aroñ in liāp eo an priesthood eo ej jerbal. Būreejtōn Gordon B. Hinckley ekar kōmeļeļe bwe “ejjeļo̧k irooj ļapļap, ejjeļo̧k būreejtōn an juōn ļal, ejjeļo̧k rutiej ilo jabdewōt wāwein ilo laļ in me jej juōn mo̧ttan eo ewōr jabdewōt m̧aroñ ioon men ko ālikin lōb eo. Aolep ejjeļo̧k aer m̧aroñ m̧okta jān tōbar mej, bōttaab ettā tata eo, em̧m̧an, pris eo ejim̧we im utiej eo em̧ōj bōk m̧aroñ in liāp eo emaron̄ liāp ilo lañ ko me emōj kar liāp ioon lalin.⁵

Āindein priesthood ej indeeo—jeļo̧k jinoin ak jemļo̧kin—āindein ej m̧aroñ eo an priesthood eo.⁶ Jujen wōt, kakien im bujen ko an priesthood eo barāinwōt ekejakļo̧k iien. M̧ōdānļo̧k eo kajuōn kar leļo̧k kōn enjeļ eo Moroni ñan Rikaanan Joseph Smith eaar kajjeer ñan m̧aroñ eo an Priesthood in.⁷ Ilo kōmeļeļe ko tokālik ñan rikaanan eo kōn tampeļ eo, Irooj eaar ba.

Kōtļo̧k bwe m̧wiin en ekkal ilo etta, bwe ña in m̧aroñ kwaļo̧k kien ko aō iloan ñan armej ro aō,

Bwe ij lo eiien ñan kwaļo̧k ñan aō kabuñ men ko me raar eņņojak jān im̧aan ļoñtak eo an laļ, men ko me rej tolļo̧k ñan juōn tōre eo kōn tallep in iien ko.⁸

Jej mour ilo epepen eo. Tampeļ ko, kain̄i ko, bujen ko, menin letok kwojarjar ko, im liāp ko emōj kar kōjepļaak tok, jejet in wōt kar kanaan kake. Kain̄i ko an tampeļ rej oņaak medek ko ippān Irooj im liāp eo an baam̧le ko ippān doon ñan indeeo. Pokake bujen ko rekwojarjar kar kōm̧m̧ani ilo tampeļ ko ej kōkkare kōj n̄an mour indeeo—menin letok eo an Anij eļap tata ņan armej.⁹

Jabdewōt eo ej kōņaan lukkuun kapooj e m̧aroñ deļo̧ñ tampeļ eo

Kōnke juōn tampeļ eo ekwojarjar, Irooj ej kajjitōk bwe eņ kōjpārok jān kōtrāe. Jabdewōt em̧m̧aroñ deļo̧n̄e ej aikuj lukuun m̧aanjepopo kōjeram̧m̧an eo. Ļōm̧ņak in m̧anjepopo ej anjo ilo meļan jibadbad ko jet. Ij kememej ke iaar ak juōn laddik jidikdik, iaar ba ñan ro jinō im jema ikōņaan deļo̧ñ iunibōōjjiti. Raar ba im̧aroñ, ak ñe eļap wōt aō jerbal ilo jikuuļ ko ilaļ im kōm̧m̧ani aolepān men ko rej aikuj kōm̧m̧an ñan deļo̧n̄e iunibōōjiti eo. Āinļo̧k wōt, jej aikuj ekkar n̄an deļo̧n̄e tampeļ eo. Jej m̧aanjepopo ilo ānbwin, kaļmenļo̧kijen, im jetōb. Ekkar ej jep ņae kajjojo armej ro rej kanne ñan juōn peba in mālim.

Jabdewōt ro rej kabwijer kii in maroñ ko an priesthood im eddo rej jipañ kōj m̧anjepopo ilo kōm̧m̧ani intōrpiu ko an peba in māļim an tampeļ. Ritōl rein rej kea kōn kōj im jipañ kōj jep ņae ñe jepojak ñan deļo̧ñ ilo tampeļ eo. Rej barāinwōt iakwe Irooj im raar lukkuun lale bwe ejjeļo̧k men etoon en kar kōtļo̧k ñan itok iloan [m̧weo] im̧ōn.¹⁰ Āindein, iien ekkōnono ko rej kōm̧m̧ani ilo jitbōn ekkajet.

Ewi wāwein am̧ m̧anjepopo ñan juōn peba in mālim an tampeļ? Komaroñ bōk rejañ ippān bisoprik, barāinwōt ro jinōm̧ im jem̧ōm̧, baam̧le, stake būreejtōnji, rikaki ro, ak rikapilōklōk ro an doulul ko. Menin aikuj ko repidodo. Ilo tu kadu in, juōn armej ej aikuj dāpij kien ko An im ej m̧weo im̧ōn. Eaar kōllaajraki jon̄ak ko. Jej deļo̧ñ tampeļ eo āinwōt rilotok ro.

Irooj enaaj m̧ōņōņō ñe aolep rūtto ro uwaad renaaj erreo—im bōk—juōn peba in mālim an tampeļ. Iien ekkōnono ko … ñan peba in mālim an tampeļ, ippān ro uwaan bisoprik eo am̧] im ro uwaan stake būreejtōnji eo am̧ im remminene kōn raurōk. Im, ilo juōn wāwein, rej maroñ watōki eļap meļeļe ñan er ‘kōkkemālmel ko’ ñan kwelo̧k eņ eutiej ñe konaaj jutak im̧aan ekkajet eo eļaptata.¹¹

M̧aanjepopo ilo ānbwin ñan etal ñan tampeļ eo

Kiiō, kōn juōn peba in mālim an tampeļ ilo peim, kwōj pojak ñan bōk kakobaba in m̧anjepopo ko. Kwōn m̧aanjeppo ilo ānbwin kōn nuknuk rekkar ñan etal ñan tampeļ. Ej jab juōn jikin ñan nuknuk bajōk. Rikaanan ro raan kein āliktata raar kōmeļeļe ñan kōj ad kautiej make ānbwinnid. Kautiej in ej aikuj kōm̧m̧an eļaptata jān ro renaaj deļo̧ñ ilo juōn tampeļ ekwojarjar.¹²

Ilo tampeļ eo, aolep rej nuknuk mouj im ejjeļo̧k lippijjinjin ko ie. Kōkaļļe in erreo eo an mouj ej bar āinwōt kakememej kōj bwe Anij en wōr an armej erreo.¹³ Iiō, laļ, kajin—meñe kadkad ilo Kabuñ eo rej karuo ilo aurōk Em̧ōj aō pād iien menin letok kwojarjar ko me Būreejtōn eo an Kabuñ ear bōk koņaan. Aolep em̧m̧aan ilo ruum̧ eo raar kwaļo̧k joñan wōt juōn kautiej eo me kar leļo̧k ñan Būreejto̧n eo. Aolep rej jijet kōjab im watōk er āinwōt juōn ilo mejen Irooj. Kōn juōn kien in nuknuk, pād ilo tampeļ ej kakeememej kōj bwe “Anij ej jab rikautiej in armej ro.”¹⁴

Lim̧aro im ļōm̧aro pāllele rej delo̧ñ ilo tampeļ eo ñan aer m̧are ñan kiiō im indeeo im indeeo. Ilo tampeļ eo, limaro pāllele rej kōnak nuknuk ko me remouj, aitok pā, mmejo̧kunkun ilo ļōmen im ed, im ejjeļok inōknōk in. Em̧m̧aan ro rej jab kopā kilmeej ak nuknuk m̧m̧an Būreejtōn Boyd K. Packer, kiiō Būreejtōn eo an Doulul eo an Joño̧ulruo Ro, ar je: “Ej menin kam̧ōņōņō ñan Irooj ñe jej katutuik ānbwinnid im kōņak nuknuk ko rej erreo, bōtaab nuknuk kein emaroñ dik wōnnāer. Jej aikuj in nuknuk ilo jōkjōk eo me jemaroñ kōjea in pād ilo juōn kwelo̧k in kwōjkwōj ak juōn iien ippān doon eo me ekkar im kautiejej.”¹⁵

Kōnono kōn nuknuk in tampeļ, m̧am̧a im būbū ro rem̧m̧aroñ kwaļo̧k juōn kajoor eo eļap ñan em̧m̧an ibūllijjin ro nejier im jūbier. Āinwōt aer kabeel im iien ko kōtļo̧k, rem̧m̧aroñ kwaļo̧k kijejeto eo em̧ool ñan baam̧le ko aer. Menin leļo̧k an juōn jinen kōn juōn añkijjeep inōknōk kōn jerbal in pā ak men ko jet an nuknuk in tampeļ em̧m̧aroñ juōn tōp ekajoor bōttata ñan juōn ajri eobōrak kōn iakwe ak jibwi ñan kaurōke.

Nuknuk kwojarjar in tampeļ ko ej kōkkaļle in juōn lojak e pen ejjeļo̧k jemļo̧kin

Kōkōņņak nuknuk kwojarjar in tampeļ ko ej kwaļo̧k kōkkaļļe eļap an aurōk im ej bōk jikkin juōn lojak e pen im ejjeļo̧k jemļo̧kin. Āindein Rilo̧mo̧r eo Ear letok ñan kōj juōn waan jon̄ak kōn maron̄ eo an ñan niknik n̄an jemļo̧k, kkōņņak nuknuk kwojarjar ej juōn wāwein kwaļo̧k tōmak ekije ilo E im ilo bujen ko An ippād jān indeeo ñan indeeo.

Būreejtōnji Eo Kein Kajuōn ear kapooje juōn leta ñan Kabuñ in kōn menin kōnono kein. Raar je:

Minene ko emmakijkij im jej loi ibwillijjin ro uwaan Kabuñ in rej kwaļo̧k bwe jet uwaan ro rej jab lukkuun meļeļe kōn bujen eo rej kōm̧m̧ane ilo tampeļ eo ñan kōņak nuknuk kwojarjar eo ilo jejjet ippān jetōb eo an menin letok kwojarjar eo ekwojarjar.

“Ro uwaan Kabun̄ eo me em̧ōj aer nuknuj kōn nuknuk kwojarjar eo ilo tampeļ rekar kōm̧m̧an juon bujen n̄an kōņaki ilo aolepen mour ko aer. Menin em̧ōj an ukok n̄an meļeļein bwe ej ekkōņak ium̧win nuknuk ko jim̧or raan im bon̄. … N̄an erreo im lukkuun tōmak ilo kōjparok bujen ko an tampeļ rej jekjek ko n̄an bōk kōjparok im kōjeram̧m̧an kein.

Pedped in katak eo ej n̄an kōņak nuknuk kwojarjar eo im jab pukōt un ko n̄an kōm̧m̧akūt i. Ak, ro uwaan rej jab aikuj kōm̧m̧akūt n̄an jidik ak m̧ōttan nuknuk kwojarjar eo n̄an jerbal peļaakin m̧weo ak n̄an kakkije pajjek peļaakin m̧weo ilo nuknuk in aō ak nuknuk ko rej jab karbab. Ak rej jab aikuj kōm̧m̧akūt i n̄an bōk kuņaer ilo m̧akūtkūt in ikkure ko me emaron̄ kar kōm̧m̧an wōt n̄e nuknuk kwojarjar eo ej jejjet im ekkōņak iumwin nuknuk ko aolep iien. Iien eo nuknuk kwojarjar eo ej aikuj em̧m̧akūt, āinwōt ilo iien aō ko, ej aikuj bar ekkōņak tōre eo em̧ōkaj tata.

Pedped ko an erreo im kōjparok jejjet in ekkōņak nuknuk rej kwaļo̧k lōke ilo bujen eo im aikuj kein jekjek in ekkōņak aolep nuknuk. Ro uwaan ro em̧ōj aer bōk menin letok kwojarjar eo an Kabun̄ eo rej ekkōņak nuknuk kwojarjar eo āinwōt juon kakememej an bujen ko rekwojarjar rekar kōm̧m̧an ippān Irooj im barāinwōt juon kōjparok ņae kabo im nana. Wāween an kōņake ej kwaļo̧k kōjelin kalim̧m̧ur eo an juon make¹⁶

M̧aanjepopo ilo kōļmenļo̧kijen im jetōb ñan etal ñan tampeļ

Kakobaba ñan m̧anjepopo in ānbwinnid, jej aikuj in pojak ilo kōļmenļo̧kijen im jetōb. Kōnke kaiñi im bujen ko an tampeļ eo relukkuun ekwojarjar, jej pād ium̧win kalim̧uur elukuun dim ñan jab kōnono kake inabōjen tampeļ eo me ej waļok iloan tampeļ eo. Men ko rekwojarjar rej aikuj watwat ko rekwo̧jarjar.

Ilo m̧ōn ekatak in, jej katak ilo jōkjōk eo an Irooj. Jōkjōk ko An rej jab jōkjōk ko ad.¹⁷ Jej aikuj ilbōk elaññe wāwein katakin ko rej oktak jān ro rej kōm̧m̧ani ilo jibadbad in jikuuļ ko eļapļo̧k alikar ñan kōj. Kain̄i im bujen in tampeļ ko rekar baj juōn m̧ōttan eo eaorōk an ko̧jpeļ eo jen tōre ko an Adam im Eve. Ilo etto, kōkkaļļe ko rekar jerbal ñan katakin m̧ool ko rem̧ūllal, im wāwein kameļeļe ko rej jerbal wōt ilo tampeļ ko rainin.

Ej menin aurōk, innām, jen lōm̧ņake kōkkaļle ko kar kwaļo̧ki ilo tampeļ eo im lale m̧ool ko rekajoor im kajjojo kōkkaļle rej jutak ñani.¹⁸ “Kain̄i ko an tampeļ rej kobrak kōn meļeļe in annak ko āinwōt rej boktok juon tokjen em̧m̧an im iien ekkatak eo ejjeļo̧k jem̧ļo̧kin.”¹⁹ Katak ko an tampeļ rej aiboojoj im lukkuun aiboojoj. Rej meļeļe kaki jān ippān ro raar jikuuļ wōt jiddik, bōttaab rem̧m̧aroñ im̧ōk māletlet an eo eļap jeļļo̧kjen.

Ij rejañ bwe uwaan ro rej etal ñan tampeļ im ejkab kein kajuōn ren lūñūri naan ko ilo Bible Dictionary eo me rej kōn tampeļ, āinwōt “Ekkapit,” “Bujen,” “Kaarmejjete Ko,” im “Temple.” Juōn emmaroñ barāinwōt lūñūri Exodus, jepta 26–29, im Livitikōs, jepta 8 Kalim̧uur M̧okta, barāinwōt bok ko an Moses im Abraham ilo Pearl of Great Price eo, rej kalikar ļo̧k wōt rūtto in jerbal ilo tampeļ im wāwein kijenmej kōn kaiñi ko an.

Dāpij juōn bujen ippān Anij ej jim̧or kōjpārok im kammaroñroñ

Ewōr ruo ļōm̧ņak ko raurōk bwe jen aikuj dāpiji ilo kōļmenļo̧kjen ilo āinwōt ad m̧anjepopo ñan etal ñan tampeļ eo. O kajuōn ej bujen eo. Jej aikuj kememej bwe juōn bujen ej juōn kalim̧m̧ur. Juōn bujen eaar kōm̧m̧an ippān Anij ej aikuj likūti ej jab āinwōt menin kamo̧ ak āinwōt menin kōjparōk. Bujen ko ippān E rej kōjparok kōj jān wāween ko rekauwōtata.

Ļōm̧ņak in ej jab kāāl. Ñe bōnjan ad dān ej ilo kajjitōk kake, ñan waan joñak, jej kōjerbal kein liklik dān eo. Ainļo̧k wōt, bujen ko rekwojarjar ko rej kōbalbel kōj jān jorrāān. Ñe jenaaj kālet ñan karmejetreik kōj jān aolep jab wanōk²⁰ jej luuji ejjeļļo̧k menin aurōk im bōk aiboojoj jeļā kake wōt ñan ro rej bōk mour indeeo. Dāpij juōn bujen in tampeļ ej jab keiñtaanan ak kōmmaroñroñ. Ej ļōbat lōñļo̧k kōj jim̧a jān maroñ in ad make kōļmenļo̧kjen im kajoor. Ej āinwōt oktak eo ikōtaan kaburbur ilo juōn meļan pedkat im kelo̧k imejatotoļo̧k ibuļōn lañ ko ilo juōn baļļuūn elukkuun mōkaj. Dāpij juōn bujen ippān Anij ej jim̧or kōjparok im kōmmaroñroñ.

Ļōm̧ņak eo karuo ñan kemļeļeikļo̧k ad pojak ilo kōļmenļokjen ej Pinmuur. Pinmuur eo an Jisōs Kraist ej kōm̧m̧an eo dileppān aolep bwebwenato in armej. Ej boļ eo ilo karōk in lomo̧o̧r eo. Jaab kōn Pinmuur eo ejjeļo̧k jem̧ļo̧kin, aolep armej renaaj kar jako ñan ban. Kain̄i im bujen in tampeļ ko rej katakin kōj kōn kajoor in lo̧mo̧o̧r eo an Pinmuur eo.

Mour indeeo ej ñan kōj jān ad pokake bujen ko kar kōm̧m̧ani ilo tampeļ

Jerbal ilo tampeļ ej bōktok kōjeraam̧m̧an ko ņan kōj ilo mour in barāinwōt indeeo im indeeo. Eltōr Neal A Maxwell eo an Doulul eo an Rijilōk Ro Joñoul Ruo ear ba bwe “jerbal in tampeļ ej jab jako jān laļ in ak ej kapenļo̧k aikuj ko ad n̄an laļ eo em̧m̧anļo̧k ilo ad kōpooj kōjmake n̄an bar juon laļ ettoļo̧k im em̧m̧anļo̧k.” Kōn men in, pād ilo m̧eo im̧ōn Irooj emaroñ jipañ kōj oktak jān laļ ņan kōm̧m̧an eļapļo̧k oktak ilo laļ.²¹

Ñe jej m̧ool im lukuun tōmak ilo mour in, jemaroñ bōk mour indeeo. Jab wabanban ej mour ñan indeeo. Mour indeeo ej meļeļe in eļapļo̧k jān baj pād in jab wabanban. Mour indeeo ej ñan bōk utiej tata eo ilañ im mour ilo juōn doulul in baam̧le. Anij ar kwaļo̧k ke ennaan in mijen eo An im eļap—“jerbal eo aō im aiboojoj eo aō”—ej “n̄an bōk m̧aantak jab wabanban im mour indeeo eo an armej.”²² An menin letok ej bwe jen jab wabanban eo im ejeļo̧k wōnāān—juōn menin letok in lomo̧o̧r ejeļo̧k wōnāān ņan aolep armej. Maroñ in mour indeeo—aeet utiej tata—ej ñan kōj ilo ad pokake bujen ko kar kōm̧m̧ani im kain̄i ko kar bōki ilo tampeļ kwojarjar an Anij.

Kōjeram̧m̧an ko an tampeļ eo reromr ļaptata tokjāer ñe ro jej iakwe kar bōk er ilo mej jān kōbobo in baam̧le ko ad. Ñan jeļā bwe iien ad jeno̧lo̧k ej ak jiddik wōt iien ej kowaļo̧k aenōm̧m̧an eo ej eļļe ilikin m̧iio̧ in kōļmenļo̧kjen.²³ Būreejtōn Joseph Fielding Smith ar je, “Jen kajoor eo an priesthood in eo Elijah ekar letok ioon, ļōmaro im limaro pālele maron̄ liāp, ak m̧are n̄an indeeo, ajri ro remaron̄ liāp n̄an ro jinier im jemer n̄an indeeo, bwe baam̧le ej kōm̧m̧an n̄an indeeo, im mej eban kōjepel ro uwaer.”²⁴ Kar kōjeram̧m̧an kōn liāp ko ñan indeeo, jej maroñ jelm̧ae mej āinwōt juōn menin aikuj ilo karōk in m̧ōņōņō ko reļļap an Anij.²⁵

Kōļmenļo̧kjen kōn indeeo eo jej bōke ilo tampeļ ej letok kajoor ñan deblo̧ke mālijoñ ko an mour in

Juōn kōļmenļo̧kjen kōn indeeo ej jipan̄ kōj dāpij lukuun m̧ool eo ad n̄an bujen ko jej kōm̧m̧ani. Būreejtōen Packer eaar kemļeļeiki bwe “kain̄i im bujen ko rej erom̧ kam̧ool ko ad ñan deļo̧ñe im̧aan mejen Anij. Ñan ekkar in bōki ej jibadbad eo ekūttūbuuj juōn tōrreen mour; ñan dāpiji er jān ijeņ ej idajoñjoñ eo ilo mour in.²⁶

Kaiñi in tampeļ ko rej jenokwan doon jab wōt ñan aiboojoj indeeo ad ak ñan bar rūtto ro emōj aer moot ļo̧k im̧aan. “Lomo̧o̧r eo an rimej ro ad ej menin aikuj im eļap an aurōk ñan ad lomo̧o̧r … er jab kōn kōj jab maroñ kar kōm̧m̧an wānōk—ainwōt maroñ kōj jab kōn ad rimej kar kōm̧m̧an wānōk”²⁷ Jerbal ilo etaer ej kwaļo̧k juōn iien ņan ad wōnm̧aanļo̧k kōn kabuñ ilo tampeļ. Leļo̧k ilo ejeļļo̧k kūbban āinwōt juōn jerbal ilo etan bar juōn kar ļame ālikin jōkjōk eo an Irooj āinwōt An kōm̧akūt pinmuur eo ñan kōjeraam̧m̧an aolep ro renaaj m̧aroñ mour.

Juōn raan m̧ool jenaaj jelm̧ae ad rikōm̧anm̧an im jutak Im̧aan in ilo ien ekajet eo. Jeje ko rekwojarjar rej katakin kōj bwe “ri lale kōjām eo ej rikwojarjar eo jān Israel; im E jab kōjerbal jabdewōt rikarejeran ijo; im ejeļo̧k bar juōn iaļ eļaññe ej jab ilo kōjām eo; bwe Eban po ilo kapo, Irooj Anij ej etan.”²⁸ Irooj eo make enaaj kejjemooje ñe jaar m̧ool ñan bujen ko jaar kōm̧m̧ani ippān ilo tampeļ eo im innām jinōkjeeje kōjeram̧m̧an ko raiboojoj E ar kalim̧m̧ur ro rej dāpij bujen ko aer.

Kōļmenļo̧kjen in ej letok ñan kōj kajoor ñan deblo̧ke mālijjon̄ ko an mour. Būreejtōn Packer ear kwaļo̧k, “Kōttōpar eo eļaptata an aolepen men ko jej katakin ej n̄an kakobaik ro jinen im jemen im ajri ro ilo tōmak ilo Irooj Jisōs Kraist, bwe er ren m̧ōņōņō ilo m̧weo, liāp ilo juon m̧are indeeo,”²⁹

Kajjojo tampeļ ej jutak āinwōt juōn kōkkaļļe in ad ro uwaan Kabuñ in, āinwōt juōn kōkkaļļe kōn tōmak ilo mour eo ālikin mej, im āinwōt juōn jikkin uwe in dekā ñan aiboojoj indeeo ñan kōj im baam̧le ko ad. Ij jar bwe kajjojo uwaan Kabuñ in renaaj m̧anjepopo ñan kōjeraam̧an ko raiboojoj an tampeļ eo.

Houston Taxes Temple. Kar aje ilo O̧kw. 26, 2000.

Johannesburg South Africa Temple. Kar aje ilo O̧kw. 24, 1985.

Helsinki Finland Temple. Kar aje ilo Okto. 22, 2006.

Recife Brazil Tampeļ. Kar aje ilo Tijem̧ba 15, 2000