Ang Balaan nga Templo
Sa mga templo, ang mga miyembro sa Simbahan kinsa mihimo sa ilang kaugalingon nga angay makaapil sa labing mahimayaon sa matubsanon nga mga ordinansa nga sukad gipadayag ngadto sa katawhan.
Sa mga templo kita makaapil sa labing mahimayaon sa matubsanon nga mga ordinansa
Adunay daghang mga rason nga ang usa ka tawo gusto gayud nga moadto sa templo. Bisan ang panagway sa gawas niini ingon og nagpakita sa lawom nga espirituhanong mga katuyoan. Mas makita kini sa sulod sa mga bong-bong niini. Ibabaw sa pultahan sa templo makita ang pasidungog “Pagkabalaan sa Ginoo.” Kon kamo mosulod sa bisan unsa nga gipahinungod nga templo, anaa kamo sa balay sa Ginoo.
Sa mga templo, ang mga miyembro sa Simbahan kinsa mihimo sa ilang kaugalingon nga angay makaapil sa labing mahimayaon sa matubsanon nga mga ordinansa nga sukad gipadayag ngadto sa katawhan. Didto, sa usa ka sagrado nga tulumanon, ang usa ka indibidwal mahugasan ug madihogan ug matudloan ug ma-endowed ug ma-sealed. Ug kon kita makadawat na niini nga mga panalangin alang sa atong mga kaugalingon, kita mahimong mangalagad alang niadtong namatay nga wala makabaton sa sama nga oportunidad. Sa mga templo ang sagrado nga mga ordinansa gipahigayon alang sa mga buhi ug sa mga patay.
Ang mga ordinansa ug mga tulumanon sa templo yano, matahum, ug sagrado
Ang mainampingong pagbasa sa mga kasulatan nagpadayag nga ang Ginoo dili mosulti sa tanang mga butang ngadto sa tanang mga tawo. Adunay pipila ka mga kwalipikasyon nga gihan-ay nga gikinahanglan sa dili pa modawat sa sagrado nga impormasyon. Ang mga tulumanon sa templo anaa sa sulod niini nga kategoriya.
Dili nato hisgutan ang mga ordinansa sa templo sa gawas sa mga templo. Dili gayud tuyo nga ang kahibalo mahitungod niining mga tulumanon sa templo mahimong limitado lamang ngadto sa pipila nga pinili kinsa obligado sa pagsiguro nga ang uban dili gayud makahibalo niini. Sukwahi kini, sa tinuoray. Uban sa dakong paningkamot kita nag-awhag sa matag kalag nga magmahimong sarang ug mangandam alang sa pag-adto sa templo. Kadtong kinsa nakaadto na sa templo natudloan og baruganan: Sa umaabut nga panahon ang matag buhi nga kalag ug ang matag kalag nga sukad nabuhi adunay oportunidad sa pagdungog sa ebanghelyo ug sa pagdawat ug sa pagsalikway sa unsay gitanyag sa templo. Kon kini nga oportunidad gisalikway, ang pagsalikway anaa na sa indibidwal.
Ang mga ordinansa ug mga tulumanon sa templo yano, matahum, ug sagrado. Kini matahum. Kini sagrado. Kini gipabiling kompidensyal basin og mahatag kini ngadto niadtong kinsa dili andam. Ang pagkakuryuso dili usa ka pagpangandam. Ang lawom nga interes mismo dili usa ka pagpangandam. Ang pagpangandam alang sa mga ordinansa naglakip sa nag-una nga mga lakang: hugot nga pagtuo, paghinulsol, bunyag, kumpirmasyon, katakus, kahingkod ug kaligdong nga angay sa usa kinsa gidapit nga mosulod isip usa ka bisita ngadto sa balay sa Ginoo.
Kadtong kinsa takus mahimong mosulod sa templo
Ang tanan kinsa takus ug sarang sa matag paagi mahimong mosulod sa templo, didto ipaila ang sagrado nga mga buluhaton ug mga ordinansa.
Sa higayon nga kamo adunay pagbati alang sa bili sa mga panalangin sa templo ug alang sa kasagrado sa mga ordinansa nga gipahigayon diha sa templo, magduhaduha ka sa pagpangutana sa taas nga sumbanan nga gihan-ay sa Ginoo alang sa pagsulod sa balaan nga templo.
Kinahanglan nga kamo adunay usa ka rekomend aron makasulod sa templo. Kini nga rekomend kinahanglan nga pinirmahan sa tukma nga mga opisyales sa Simbahan. Kadto lamang kinsa takus ang makasulod sa templo. Ang inyong lokal nga bishop o presidente sa branch adunay responsibilidad sa pagpangutana sa inyong personal nga katakus sa dili pa kamo modawat sa inyong mga ordinansa sa templo. Kini nga interbyu adunay dakong kamahinungdanon, kay usa kini ka higayon sa pag-usisa uban sa usa ka gi-orden nga alagad sa Ginoo sa sundanan sa inyong kinabuhi. Kon adunay problema sa inyong kinabuhi, ang bishop makatabang kaninyo sa pagsulbad niini. Pinaagi niini nga pamaagi, makapamahayag kamo o makatabang sa pag-establisar sa inyong katakus sa pagsulod sa templo uban sa pagtugot sa Ginoo.
Ang interbyu alang sa usa ka rekomend sa templo gipahigayon tali lamang sa bishop ug sa miyembro sa Simbahan nga maoy hingtungdan. Dinhi ang miyembro pangutan-on mahitungod sa iyang personal nga pamatasan, katakus, ug kamatinud-anon sa Simbahan ug sa mga opisyales niini. Ang tawo kinahanglan gayud nga mopamatuod nga siya limpyo sa moral nga paagi ug nagsunod sa Pulong sa Kaalam, nagbayad og hingpit nga ikapulo, nagpuyo nga nahiuyon sa mga pagtulun-an sa Simbahan, ug walay giapilan o gidapigan nga mga grupo sa nag-apostasiya. Ang bishop gipahimangnoan nga ang kakompidensyal sa pagdala niini nga mga butang uban sa matag gi-interbyu mahinungdanon gayud kaayo.
Ang madawat nga mga tubag sa mga pangutana sa bishop temporaryong makaestablisar sa katakus sa usa ka indibidwal aron sa pagdawat og usa ka rekomend sa templo. Kon ang aplikante wala nagsunod sa mga sugo o adunay butang nga wala pa mahinulsuli sa iyang kinabuhi nga gikinahanglang ihan-ay, mahinungdanon kaayo sa pagpakita sa tinuod nga paghinulsol sa dili pa ihatag ang rekomend sa templo.
Human mapahigayon sa bishop ang ingon nga interbyu, ang presidente sa stake sa samang paagi mointerbyu kaninyo sa dili pa kamo makadawat sa inyong mga ordinansa sa templo.
Ang pagtudlo diha sa templo pinaagi sa simbolo
Sa dili pa moadto sa templo sa unang higayon, o bisan human sa daghang mga higayon, makatabang kini kaninyo sa paghunahuna nga ang pagtudlo diha sa mga templo gihimo gamit ang simbolo. Ang Ginoo, ang Bantugang Magtutudlo, mihatag sa kadaghanan sa iyang panudlo sa ingon niini nga paagi.
Ang templo usa ka mahinungdanon nga eskwelahan. Usa kini ka balay sa pagkat-on. Sa mga templo ang palibut gipatunhay aron angayan kini alang sa mga panudlo mahitungod sa mga butang nga hilabihan gayud ka espirituhanon. Si kanhing Elder John A. Widtsoe sa Korum sa Napulog Duha ka mga Apostoles usa ka tinahud nga presidente sa unibersidad ug usa ka inila nga iskolar sa kalibutan. Siya adunay dakong balaan nga pagtahud alang sa buhat sa templo ug miingon sa usa ka higayon:
“Ang mga ordinansa sa templo naglakip sa tibuok plano sa kaluwasan, ingon sa gitudlo sa mga lider sa Simbahan matag karon ug unya, ug nagklaro sa mga butang nga lisud masabtan. Walay pagbaliktad o pagtuis sa pagpahiangay sa mga pagtulun-an sa templo ngadto sa mahinungdanon nga plano sa kaluwasan. Ang pilosopikanhong kakompleto sa endowment usa dakong argumento alang sa kamatuoran sa mga ordinansa sa templo. Gani, kining kompleto nga pagribyu ug pagpasabut mahitungod sa plano sa Ebanghelyo, nakapahimo sa pagsimba diha sa templo nga usa sa labing epektibo nga mga pamaagi sa pagpahinumdom og balik kalabut sa tibuok porma sa Ebanghelyo” (“Temple Worship,” Utah Genealogical and Historical Magazine, Abr. 1921, 58).
Kon kamo moadto sa templo ug mohinumdom nga ang pagtudlo pinaagi sa simbolo, dili gayud kamo moadto uban sa tukma nga kinaiya nga mobiya nga ang inyong panabut wala mapalambo, dili mobati nga mas nahimaya, nga ang inyong kahibalo wala madugangan kalabut sa mga butang nga espirituhanon. Ang plano sa pagtudlo talagsaon kaayo. Dinasig kini. Ang Ginoo Mismo, ang Bantugang Magtutudlo, sa kanunay mitudlo sa Iyang mga disipulo pinaagi sa mga sambingay—usa ka paagi sa pagsulti sa pagrepresentar sa mga butang sa makahuluganong paagi nga tingali lisud usab nga masabtan.
Ang templo mismo nahimong usa ka simbolo. Kon kamo nakakita og usa sa mga templo sa gabii, puno sa mga suga, nakahibalo kamo kon unsa kana kaanindot tan-awon. Ang balay sa Ginoo, gipalibutan og kahayag, nagdan-ag diha sa kangitngit, nahimong simbolo sa gahum ug inspirasyon sa ebanghelyo ni Jesukristo nga nagbarug isip usa ka banwag diha sa usa ka kalibutan nga nag-anam og kaunlod ngadto sa espirituhanong kangitngit.
Sa pagsulod sa templo, inyong ilisan ang inyong gisul-ob nga sinina og puti nga sinina alang sa templo. Kining pag-ilis og sinina adto buhaton sa lawak ilisanan, diin ang matag indibidwal hatagan og usa ka locker ug usa ka luna nga ilisanan nga pribado gayud kaayo. Sa templo ang gikinahanglan nga tarung nga sininaan mainampingong gipadayon. Sa inyong pagbutang sa inyong sinina sa sulod sa locker, inyong biyaan didto ang inyong mga kabalaka ug mga problema ug mga makabalda uban niini. Mogawas kamo gikan niining gamay nga ilisanan nga nagsul-ob og puti, ug mabati ninyo ang pagkausa ug ang pagkapatas, kay ang tanan sa inyong palibut susama ang mga gisul-ob.
Ang kaminyoon sa templo mao ang labing mahinungdanon nga ordinansa sa templo
Kadtong uban kaninyo nga nangandoy og kaminyoon sa templo tingali gustong mahibalo kon unsa ang mahitabo. Dili nato kutluon ang mga pulong sa ordinansa sa sealing (kaminyoon) sa gawas sa templo, apan mahimo natong ihulagway ang sealing room nga matahum kaayo kon tan-awon, hilum ug malinawon ang diwa, ug gibalaan sa sagrado nga buhat nga gipahigayon didto.
Sa dili pa ang magtiayon moadto sa altar alang sa ordinansa sa sealing, mao kini ang kahigayunan alang sa officiator sa pagpadangat, ug sa bag-ong magtiayon sa pagdawat, sa pipila ka tambag. Mao kini ang pipila sa mga opinyon nga mahimong madunggan sa bag-ong magtiayon niining higayona.
“Karon mao ang adlaw sa inyong kasal. Mapuno kamo sa emosyon mahitungod sa inyong kaminyoon. Ang mga templo gitukod isip usa ka santuwaryo alang sa ingon nga mga ordinansa sama niini. Kita dili iya sa kalibutan. Ang mga butang sa kalibutan walay kalabutan dinhi ug kinahanglan nga dili moimpluwensya sa unsay atong pagabuhaton dinhi. Migawas kita gikan sa kalibutan paingon sa templo sa Ginoo. Nahimo kining labing importante nga adlaw sa inyong kinabuhi.
“Gipakatawo kamo, gidapit dinhi sa yuta, sa mga ginikanan nga miandam og usa ka mortal nga tabernakulo aron kapuy-an sa inyong espiritu. Matag usa kaninyo nabunyagan na. Ang bunyag, usa ka sagrado nga ordinansa, mao ang simbolo sa paglimpyo, simbolo sa kamatayon ug pagkabanhaw, simbolo sa pagbangon ngadto sa usa ka bag-ong kinabuhi. Naglakip kini sa paghinulsol ug kapasayloan sa mga sala. Ang sakrament sa Panihapon sa Ginoo usa ka pagbag-o sa pakigsaad sa bunyag, ug kita, kon magsunod niini, makabaton og kapasayloan sa atong mga sala.
“Ikaw, pamanhonon, gi-orden ngadto sa priesthood. Ikaw unang gihatagan og Aaronic Priesthood ug siguro miuswag ngadto sa tanang mga katungdanan niini—deacon, teacher, ug priest. Dayon ang adlaw miabut nga ikaw nakita nga takus sa pagdawat sa Melchizedek Priesthood. Kana nga priesthood, ang mas taas nga priesthood, gihulagway isip ang priesthood sumala sa balaan nga kapunongan sa Dios, o ang Balaan nga Pagkapari, sunod sa Kapunongan sa Anak sa Dios (tan-awa sa Alma 13:18; Helaman 8:18; Doktrina ug mga Pakigsaad 107:2–4). Gihatagan ka og katungdanan diha sa priesthood. Ikaw karon usa na ka elder.
“Matag usa kaninyo nakadawat na sa inyong endowment. Niana nga endowment inyong nadawat ang puhunan sa mahangturon nga potensyal. Apan kining tanan nga mga butang, sa usa ka paagi, mga pasiuna ug pagpangandam alang sa inyong pag-anhi sa altar aron ma-sealed isip bana ug asawa sa karon ug sa tibuok kahangturan. Karon nahimo na kamo nga usa ka pamilya, gawasnon sa pagbuhat sa paglalang sa kinabuhi, aron adunay oportunidad pinaagi sa debosyon ug sakripisyo sa pagdala og mga anak nganhi sa kalibutan ug sa pagpadako kanila ug pag-amuma kanila sa luwas nga paagi lahus sa ilang mortal nga pagpakabuhi; aron makita sila nga moanhi usa ka adlaw, sama sa inyong pag-anhi, sa pag-apil niining sagrado nga mga ordinansa sa templo.
“Mianhi kamo sa andam nga paagi ug nahukman nga takus. Ang pagdawat sa usag usa diha sa pakigsaad sa kaminyoon usa ka dakong responsibilidad, usa ka responsibilidad nga nagdala og mga panalangin nga dili masukod.”
Ang gahum sa sealing nagbugkos dinhi sa yuta ug didto sa langit
Kon gusto natong masabtan ang kasaysayan ug doktrina mahitungod sa buhat sa templo, kinahanglan gayud nga atong masabtan kon unsa ang gahum sa sealing. Kinahanglan gayud nga atong malantaw, labing minus ngadto sa usa ka ang-ang, kon ngano nga ang mga yawe sa awtoridad sa paggamit sa gahum sa sealing mahinungdanon kaayo.
“Sa pag-abut ni Jesus sa kayutaan sa Cesarea Filipo, ang iyang mga tinun-an gipangutana niya, nga nag-ingon, Sumala sa sulti sa mga tawo kinsa man kuno ang Anak sa Tawo? …
“Ug si Simon Pedro mitubag nga nag-ingon, Ikaw mao ang Kristo, ang Anak sa Dios nga buhi.
“Ug kaniya mitubag si Jesus nga nag-ingon, Dalaygon ikaw, Simon Barjona: kay wala kini ipadayag kanimog tawo, kondili gipadayag kini kanimo sa akong Amahan nga anaa sa langit.
“Ug sultihan ko ikaw, nga ikaw mao si Pedro, ug sa ibabaw niining bato pagatukoron ko ang akong iglesia; ug ang mga gahum sa kamatayon dili gayud makabuntog kaniya.
“Ug hatagan ko ikaw sa mga yawe sa gingharian sa langit: ug bisan unsay imong pagabugkuson dinhi sa yuta, didto sa langit pagailhon kini nga binugkos: ug bisan unsay imong pagaluagan dinhi sa yuta, didto sa langit pagailhon kini nga linuagan” (Mateo 16:13, 16–19).
Si Pedro mao ang gitugyanan sa mga yawe. Si Pedro mao ang gitugyanan sa gahum sa sealing, kana nga awtoridad nga nagdala og gahum sa pagbugkos o pag-seal dinhi sa yuta o pagluag dinhi sa yuta ug mao usab kini ang mahitabo didto sa kalangitan. Kadto nga mga yawe gikuptan sa Presidente sa Simbahan—ang propeta, manalagna, ug tigpadayag. Kanang sagrado nga gahum sa sealing anaa sa Simbahan karon. Walay lain nga gitamud nga mas sagrado nga pagpamalandong niadtong kinsa nasayud sa kamahinungdanon niini nga awtoridad. Walay lain nga mas gihuptan og maayo. Adunay pipila lamang ka mga lalaki nga gihatagan niini nga gahum sa sealing dinhi sa ibabaw sa yuta sa bisan unsang higayon—sa matag templo may mga kaigsoonan kinsa gihatagan sa gahum sa sealing. Walay usa nga makakuha niini gawas kon gikan sa propeta, manalagna, ug tigpadayag ug Presidente sa Ang Simbahan ni Jesukristo sa mga Santos sa Ulahing mga Adlaw.
Si Propeta Joseph Smith miingon nga kanunay siya nga gipangutana “‘Dili ba kita maluwas kon dili kita moagi sa tanan niadto nga mga ordinansa, ubp.?’ Motubag ko, Dili, dili ang kahingpitan sa kaluwasan. Si Jesus miingon, ‘Sa balay sa akong Amahan anaay daghang puy-anan, ug moadto ako ug mag-andam og luna alang kaninyo.’ [Tan-awa sa Juan 14:2.] Ang balay nga ginganlan dinhi kinahanglan nga hubaron og gingharian; ug si bisan kinsa nga tawo nga gihimaya ngadto sa labing taas nga puy-anan kinahanglan nga nagsunod sa celestial nga balaod, ug sa tanan usab nga balaod” (sa History of the Church, 6:184).
Ang buhat sa templo usa ka tinubdan sa espirituhanong gahum
Ang mga templo mao gayud ang pinakasentro sa espirituhanong kalig-on sa Simbahan. Kita kinahanglang magdahum nga ang kaaway mosulay sa pagbalda kanato isip usa ka Simbahan ug sa tagsa-tagsa kanato samtang kita nagtinguha sa pag-apil niini nga sagrado ug dinasig nga buhat. Ang buhat sa templo makadala og hilabihan ka dako nga panlimbasug tungod kay mao kini ang tinubdan sa hilabihan ka dako nga espirituhanong gahum ngadto sa mga Santos sa Ulahing mga Adlaw ug ngadto sa tibuok Simbahan.
Sa pagpahinungod sa cornerstone sa Templo sa Logan Utah, si Presidente George Q. Cannon, nianang higayona anaa sa Unang Kapangulohan, mihimo niini nga pamahayag:
“Ang kada bato sa pundasyon nga ipahimutang alang sa Templo, ug kada Templo nga nahuman sumala sa sugo nga gipadayag sa Ginoo sa iyang balaang Priesthood, mopakunhod sa gahum ni Satanas sa yuta, ug modugang sa gahum sa Dios ug sa Pagkadiosnon, motandog sa mga langit sa kusganong gahum alang kanato, mangamuyo ug mangayo sa mga panalangin sa Mahangturon nga mga Dios, ug kadtong kinsa nagpuyo sa ilang presensya” (sa “The Logan Temple,” Millennial Star, Nob. 12, 1877, 743).
Kon ang mga miyembro sa Simbahan nagkalisud o kon ang mahinungdanon kaayo nga mga desisyon bug-at kaayo sa ilang mga hunahuna, komon kini nga butang nga sila moadto sa templo. Usa kini ka maayong dapit nga mopagaan sa atong mga kabalaka. Sa templo makadawat kita og espirituhanong panglantaw. Didto, atol sa panahon sa tulumanon sa templo, kita “anaa sa gawas sa kalibutan.”
Usahay ang atong mga hunahuna hilabihan gayud nga nabug-atan sa mga problema ug adunay daghan kaayong mga butang nga nanginahanglan sa pagtagad diha-diha dayon nga dili gani kita makahunahuna og klaro ug makakita og klaro. Sa templo ang abug sa pagbalda mora og maklaro, ang gabon ug ang kahanap mora og mahanaw, ug kita “makakita” sa mga butang nga wala nato makita kaniadto ug makakita og paagi pinaagi sa atong mga kalisud nga wala pa nato mahibaloi kaniadto.
Ang Ginoo mopanalangin kanato samtang magpahigayon kita sa sagradong mga ordinansa sa buhat sa mga templo. Ang mga panalangin didto dili lamang limitado sa atong tulumanon sa templo. Kita mapanalanginan sa tanan natong mga kalihokan.
Ang atong mga gipangtrabaho diha sa templo motabon kanato og usa ka taming ug usa ka panalipod
Walay buhat nga mas labaw pa nga panalipod ngadto niini nga Simbahan kay sa buhat sa templo ug sa pagsiksik sa family history nga nagsuporta niini. Walay buhat nga mas labaw pa ka makalimpyo sa espirituhanong paagi. Walay buhat nga atong gihimo nga naghatag kanato og dugang gahum. Walay buhat nga nagkinahanglan og mas taas nga sumbanan sa pagkamatarung.
Ang atong mga gipangtrabaho diha sa templo motabon kanato og usa ka taming ug usa ka panalipod, sa indibidwal nga paagi ug isip usa ka katawhan.
Busa adto sa templo—adto ug kuhaa ang inyong mga panalangin. Usa kini ka sagrado nga buhat.
Templo sa Panama City Panama. Gipahinungod Ago. 10, 2008.
Templo sa Tokyo Japan. Gipahinungod Okt. 27, 1980.
Templo sa Curitiba Brazil. Gipahinungod Hunyo 1, 2008.