O Iesu Keriso o Lo’u Faaola & Togiola

Saunia e Ana Maria Coburn ma Cristina Franco

E mafai ona e faaaogaina le lesona ma le gaoioiga lenei e aoao atili ai e uiga i le autu o le Peraimeri i le masina lenei.

“Matou te talitonu e faaolaina tagata uma lava i le Togiola a Keriso, pe a tausia poloaiga ma sauniga o le Talalelei” (Mataupu Faavae o le Faatuatua 1:3).

O le a se mea e te naunau e tuuina atu mo se tasi e te matuai alofa lava i ai? E matua alofa lava lo tatou Faaola, o Iesu Keriso, ia i tatou ma o lea na Ia tuuina mai ai Lona lava soifua mo i tatou.

Na silafia e le Tama Faalelagi, pe afai tatou te agasala ma faia ni mea sese, o le a le mafai ona tatou toe mau faatasi ma Ia. O lea na ofo mai ai Lona Alo, o Iesu Keriso, e avea ma o tatou Faaola. Na filifilia o Ia e le Tama Faalelagi e laveaiina i tatou aua ua na o Ia lava e mafai ona soifua i se olaga e aunoa ma se agasala.

Na puapuagatia ma maliu Iesu ina ia laveaiina i tatou mai le oti ma a tatou agasala. O lenei galuega alofa ua taua o le Togiola. Ona o le Togiola, ua mafai ai ona tatou salamo mai i a tatou agasala, ma faamagaloina, ma mama ma faasinasinaina e pei o Iesu.

Na faasatauroina Iesu ma na maliu, ae ina ua mavae aso e tolu sa toetu mai o Ia. Ua toe soifua mai o Ia! Ona ua toetu mai o Ia, o le a faapena foi ona tatou toetutu. O lona uiga o le a toe tuufaatasia o tatou tino ma agaga e faavavau.

E moni lava, o Iesu Keriso o lo tatou Faaola ma le Togiola. O Ia o le faataitaiga atoatoa mo i tatou uma lava. Na Ia aoao i tatou i le auala e agalelei atu ai le tasi i le isi. Na Ia aoao i tatou i le auala e auauna atu ai le tasi i le isi. Na Ia aoao foi i tatou i le auala e avea ai ma tagata sili atu ona lelei. O le a le mafai ona tatou ola i se olaga atoatoa e pei o Ia, ae e mafai ona tatou toe foi atu ma mau faatasi ma Iesu ma le Tama Faalelagi e ala i le usitaia o poloaiga ma faia le mea sili tatou te mafaia. E manaomia lo tatou mulimuli ia Iesu Keriso i aso uma.