J. Reuben Clark Jr.: O Se Tamalii o Meaalofa Tulaga Ese

Sa soifua mai Joshua Reuben Clark Jr. i Grantsville, Iuta, i le aso 1 o Setema, 1871. E ui ina sa itiiti se tulaga faaleaoaoga sa ia maua ma sa le mafai ona aoga i se aoga maualuga, ae sa faiaoga lona tina ia te ia, ma sa fiafia o ia e suesue. Sa faauuina o ia ma le tulaga muamua i lana vasega mai le Iunivesite o Iuta, ma se tikeri o le tagata malaga i le faasaienisi ma agai atu ai i le mauaina o se tikeri i mea tau tulafono mai le aoga faaloia a le Iunivesite o Kolomupia i le Aai o Niu Ioka.

Sa faaipoipo Uso Clark ia Luacine Annetta Savage i le Malumalu o Sate Leki i le 1898, ma sa avea i laua o ni matua o se fanau e toafa.

I le taulimaina ai o se tikeri faaloia ma se mafaufau atamai, sa agai atu ai J. Reuben Clark Jr. i se matata iloga i le tulafono ma auaunaga lautele lea sa faaiuina i le tofia o ia e fai ma amepasa a le I.S i Mekisiko i le 1930. Ae peitai, sa faamutaina lena matata, ina ua lagolagoina Uso Clark o se Fesoasoani Lua ia Peresitene Heber J. Grant i le Au Peresitene Sili i le aso 6 o Aperila, 1933. E ui ina sa avea o ia ma se faitaulaga sili i le taimi lena, sa le o ia o se Pulega Aoao. Sa faauuina o ia o se Aposetolo ina ua sosoo ai ma le lagolagoina o ia o le Fesoasoani Muamua ia Peresitene Grant ia Oketopa 1934. Sa faaauau ona avea Peresitene Clark ma se fesoasoani ia Peresitene Siaosi Alapati Samita ma Tavita O. MaKei.

Faatasi ai ma le tele o ana saofaga i le Ekalesia, o le vaega aupito iloga o le faataitaiga o le lotomaulalo lea sa ia faia ina ua avea Tavita O. MaKei ma Peresitene o le Ekalesia. Sa ia valaauina Peresitene Clark e fai ma ona Fesoasoani Lua. Talu ai o Peresitene Clark sa avea ma se Fesoasoani Muamua i Au Peresitene Sili na muamua atu, sa faapea ona manatu ai nisi na le fiafia o ia, ae peitai sa faamalamalama mai e Peresitene Clark: “I le galuega a le Alii, e le taua le mea [tofiga] e te galue ai ae o le auala e te galue ai. I le Ekalesia a Iesu Keriso o le Au Paia o Aso e Gata Ai, e nofoia e se tagata le nofoaga ua valaauina tonu i ai lena tagata, o lena tulaga e le sailia pe teena foi e se tasi.”¹

Na maliu Peresitene Clark i le aso 6 o Oketopa, 1961.

O Le Au Peresitene Sili i le 1945 (mai le agavale): J. Reuben Clark Jr., Hipa J. Kurene, ma Tavita O. MaKei.

Peresitene Clark (agavale) ma Lamont Toronto, peresitene o le misiona.