O Ona Puapuaga ua FAATOAFILEMUINA AI I TATOU
Barbara Winter, Arisona, ISA
I le avea ai ma se teine tausimai i le iunite e i ai pepe faatoa fananau mai e tigaina, ou te tausia pepe mamai, o nisi taimi e matua laiti lava ia pepe. O se tasi po na tofia ai au e vaai se pepe tama, e 17 vaiaso ua vave ai ona fanau mai ma e sili atu na o le tasi le pauna (0.5 kg) lona mamafa. O ona lima e matua laiti lava, o ona ogavae laiti e pei lava o le lapopoa o ou tamatamailima, ma o ona vae e pei o le tele o lou lima matua. Ona o faafitauli ogaoga o lona ālā mānāva, na lei manatu ai fomai e ola i le po atoa.
E i ai se lagona filemu i le iunite atoa pe a fanau mai se pepe fou o loo tauivi mo lona ola. E faateleina le popole o tagata uma, aemaise lava o le tausimai a le pepe, ma o le po lenei o lea ua oo ia te au. Sa faatasi o ia ma ona matua i le tele o taimi o le aso, ae ua lelavava i laua. Sa foi atu lona tina i lona potu mo se malologa ua matua manaomia lava.
O le potu faapitoa o le pepe o loo i ai se pusa tioata soloatoa (incubator), masini e iloa ai lona tulaga, āla’ea, ma pamu o IV ia e tausia ai o ia, ia ola. Ona o lona ma’i tele ma manaomia ai lea ituaiga tausiga, o lea sa leai se isi ma’i na tofia i ai au i lena po. O le a ou i ai i ona tafatafa i le po atoa, e taulimaina i taimi uma vailaau faafomai, mataituina lona tulaga, togafitiga, ma suesuega.
A o mavae malie atu le po, sa ou taumafai e manatunatu po o a ni ou lagona pe ana faapea o au o lona tina. O le a le mafai ona tatalia le lotonutimomoia.
Sa ou soloina lemu ona foliga, pai atu i ona tamai lima ma vae, sui ma feliuai o ia ma faataoto o ia i se palanikeke fou ma malulu. Sa ou manatunatu po o le a se isi mea e mafai ona ou faia mo lau mai itiiti. O le a se mea o le a faia e lona tina? O le a le mea e finagalo le Tama Faalelagi ou te faia?
O lenei agaga itiiti, mama ma le faapelepele e le o toe mamao ae toe foi atu i lona Tama oi le Lagi. Ou te le iloa pe o fefe o ia. Sa ou mafaufau i lau fanau. A o laiti ma fefefe i latou, sa ou pesepese i ai. “O Au o se Atalii o le Atua” latou te fiafia tele i ai. Sa tau taofiofi o’u loimata, a o’u usuina se pese i le pepe.
I le avea ai o se teine tausimai sa ou vaai i faagaau ma le toto, ma faitau le manavanava o le fatafata o le pepe, faalogo i le tata o lona fatu, ma vaavaai i numera o loo i le masini e siaki ai. I le avea ai ma se tasi o le Au Paia o Aso e Gata Ai sa ou vaai ai i se agaga selesitila ma maofa i le ata o le faaolataga.
A o faagasolo pea le po, sa faifai malie atu lona malosi. Na iu ai lava ina sao atu le toto i ona mama.
I le taeao na moe filemu atu lava si au ma’i itiiti ma ui atu ai i le veli. Sa ia tuua lima o lona tina ma “ua aveina atu i le maota o le Atua, o Le na foai mai le ola ia te [ia]” (Alema 40:11).
Sa ou faalatalata atili atu i le Faaola ma le Tama Faalelagi i lena po. Na ou mauaina se malamalamaaga sili atu e uiga i le alofa o le Alii mo tagata—ma Lona alofa mo au. Sa faamanatu mai ia te au, e ofo ai, i le loloto o le alofa na ou lagonaina mo Ia. Ma sa ou lagonaina se manao ina ia agalelei atili, agamalu atili, faamagalo atu atili, ma agaalofa atu atili—ia avea atili faapei o Ia—ia tasi le aso ma ia tasi le tata o le fatu i le taimi.