Ou Te Le Fiafia i le Ekalesia
Tanintoa Sexton, Atu Maresala
Ou te lei manao ou te aafia i le Ekalesia ina ua fesili mai lou toalua pe mafai ona aoao e faifeautalai la ma fanau tama. Ae ou te lei fai i ai e leai ona ua uma ona avea o ia ma se tagata o le ekalesia.
Ina ua amata ona o mai faifeautalai i lo matou aiga e faalua i le vaiaso, ou te alu i le fale o lau uo matou te tuaoi. O lau uo o se tagata malosi o se isi lotu Kerisiano. O taimi uma lava ou te asiasi atu ai ia te ia, e manao lava e talanoa e uiga i le Tusi Paia. Na ou fai atu ia te ia, ou te le o fia manao i se mea faapena ma ou te le o fia suesue i se tapuaiga. Ae sa ia taumafai lava e faatalitonu au, ma na iu lava ina ou ioe i ai. Ma o lea sa ma suesue ai ma lau uo i le Tusi Paia mo se taimi umi lava a o aoaoina e faifeautalai ou atalii.
I se tasi aso ua oo i le taimi e o mai ai faifeautalai i lo matou fale. Ae nai lo le tuua [o le fale], na ou filifili ai e nofo i le potu lea e sosoo atu. Ina ua amata ona aoaoina e faifeautalai ou atalii, sa ou lagonaina lou fia faalogo atili. Sa ou soso atu ma faalatalata atili i le faitotoa ina ia ou lagonaina lelei ai. Sa la aoaoina ou atalii e uiga i aposetolo ma perofeta.
Mulimuli ane sa ou iloa ai lou fia aoao atili. Sa ou talanoa i faifeautalai ma filifili ai e faia ni talanoaga ma i la’ua—e le faalauaiteleina. Sa i ai pea lava iina lou toalua, ae lei i ai ma se isi tagata na iloaina.
O lea ina ua o mai faifeautalai e aoao ou atalii e faalua i le vaiaso, ou te alu lea i le fale o lau uo. Ona la aoaoina lea o au i se isi aso e ese mai ai.
I se tasi aso ina ua fai mai e lau uo se tala le lelei e uiga i le Ekalesia, sa ou puipuia. E pei lava foi o le toatele o tagata i le Atu Maresala, e le tele sona iloa e uiga i le Ekalesia ma e sese lona malamalama i nisi o mea e talitonu i ai le Au Paia o Aso e Gata Ai. Ina ua ia fai mai nisi tala le lelei, sa ou toe puipuia foi le Ekalesia.
O le auala lena na faagasolo ai lava mo le fitu masina. Ona oo lea i se tasi aso na ou iloa ai ua faamautinoa mai e le Agaga Paia ia te au o mea uma lava na aoao ai au e faifeautalai e moni. Na ou iloa ua tatau ona ou papatiso, e ui lava ina itiiti so’u malamalama e uiga i le talalelei.
Ina ua maea lou papatisoga i le 2007, sa ou matua fiafia lava. Na amata ona ma faasaoina tupe matou te o ai i le malumalu i Hawaii, lea na faamauina ai maua ma lou toalua, ma le ma fanau e toatolu, ia Tesema 2008.
I le avea ai ma se tagata o le Ekalesia ua tele se aafiaga i lo’u olaga. Na tonu ia te au e tuua lau galuega lona lua o le faafiafia i se faleaiga ona ou te tuai mai ai i le fale ma e matua namu leaga ai ou ofusa i le manogi o le asu o tapaa. E ui i le maimau o lea tupe maua faaopoopo, ae sa lelei lava le tausiga o i matou e le Alii.
Ou te iloa e moni le Ekalesia, ma o Iosefa Samita o se perofeta a le Atua ona o le Agaga sa ou lagonaina ma faamanuiaga ua ou maua.