I Tala Fou
Ua Faatuina e Elder Perry le Uluai Siteki i Guam
Na asiasi atu Elder L. Tom Perry o le Korama a Aposetolo e Toasefululua i Guam ia Tesema 2010 e faavae le Siteki o Barrigada Guam, o le uluai siteki i le teritori o Guam. A o i ai iina Elder Perry, o le na auauna atu i le Marine Corps a le Iunaite Setete i le eria i le taimi o le Taua Lona II a le Lalolagi, na ia asia ai foi le Falemataaga o Taua a le Pasefika ma le motu tuaoi o Saipani. E 1,971 tagata o le Ekalesia e nonofo i Guam. O le teritori o Guam o se vaega o le Eria o Asia i Matu o le Ekalesia.
Ua Togafitia e Fomai AAG le Kolela i Papua Niu Kini
Na faaaluina e se vaega o fomai AAG mai Ausetalia se taimi i le togafitiina o tagata ua maua i le faamai o le kolela lea na faateteleina i se tamai nuu maotua i matusisifo o Papua Niu Kini i le faaiuga o le 2010.
E fiaselau tagata mamai na togafitia e fomai, ma na faasaoina mai se tamaloa e toatasi toetiiti lava a maliu i le taimi na taunuu ai i le falemai ma isi o e semanu e le atoa le 24 itula e ola ai e aunoa ma ni togafitiga.
Na lolofi atu tagata i le laueleele faapea ma vaaalo i fomai. Na fai mai David Williams o Brisbane ma Anthony Mahler o Cairns, na la togafitia tagata e 200 e maua i le kolela i totonu lava o le aso e tasi na la taunuu ai i le nuu o Sogere. I le toe ta’ua ai o le aotelega o le aafiaga, fai mai, Dr. Mahler, “[Sa] avea ma se aafiaga faamanuiaina faapolofesa o lo’u olaga,” e ui i le tele o faafitauli ma galuega faavaivai tagata.
E le gata i le auina atu o fomai, na tuuina atu foi e le Ekalesia ni sapalai mo toomaga, e aofia ai ni fesoasoaniga faafomai ma ni faamama mo vai. Na auina atu foi ni uta o meaai ma fasimoli taele i le eria lea na aafia ai, mai le Ekalesia i Port Moresby, na auina atu foi ni uta o tamai ato o loo i ai mea e manaomia mo le tumama faaletagata lava ia lea na auina mai Port Moresby ma Brisbane. Na malaga atu i Papua Niu Kini se ulugalii faamisiona e i ai lo la tomai i le faamamaina o vai ina ia fesoasoani i le faamaopoopoina o taumafaiga faamama avega.
O Le DVD ua Folasia Mai ai le Autu o le Mutuale mo le 2011
Na amata ia Ianuari ona tufatufa atu e le Ekalesia ia DVD 2011 Strength of Youth, We Believe, i iunite o le Ekalesia i le lalolagi atoa ina ia faaaoga e lagolago ai le autu o le Mutuale i le 2011.
Ua tumu le DVD i ni mamanu o faasalalauga eseese e fesoasoani ai i le autalavou ia avea le autu, Mataupu Faavae o le Faatuatua 1:13, o se vaega tutotonu o o latou olaga. O loo faaalia ai foi i nisi vaega ia Peresitene Thomas S. Monson, peresitene aoao o Alii Talavou ma Tamaitai Talavou, musika, molimau a le autalavou, ma le tele o isi mea.
O le tele o mea o loo i ai e aofia ai molimau a le autalavou ma aafiaga faaosofia.
E mafai ona faaaoga musika, savali, ma molimau e faa’oa ai vasega a le autalavou, fonotaga, ma gaoioiga i le tausaga atoa.
O loo maua uma anomea i luga o le initoneti e sii mai i le youth.lds.org.
Ua aofia ai foi i DVD faaliliuga i gagana nei: Saina, Peretania, Farani, Siamani, Italia, Iapani, Korea, Potukale, Rusia, ma le Sipaniolo.