Filifiliga a Niya
Sa taalo Niya i luma o lona fale ae fono atu le fafine o lona aiga e sau i totonu. “Niya, e mafai ona e alu i le faleoloa o fualaau aina e faatau mai ni karoti mo le meaai o le afiafi?” o le fesili lea a le fafine.
“Ioe!” o le tali fiafia lea a Niya. E fiafia o ia e alu i le faleoloa, ma e fiafia e fesoasoani i le fafine o lona aiga.
Na ave e Niya le tupe na tuu atu e le fafine ma savali i le auala i le faaleoloa e lata ane.
“Ou te manao e faatau mai ni karoti mo le meaai o le afiafi,” o le tala lea a Niya i le faatauoloa.
Na tuu e le faatauoloa karoti i le ato a Niya ma ta’u ia te ia le tau. Na tuu atu e Niya le tupe ia te ia.
“O lau sui lea,” o le tala lea a le faatauoloa a o ia toe faafoiina atu se tupe.
Na faafetai atu Niya ia te ia ma amata loa ona savali i le fale. A o savali o ia, na ia tilotilo i le tupe lea na tuu atu e le faatauoloa ia te ia. “Ua ova le sui na ia tuu mai,” o lona manatu lea. “Ia o le a ave la le tupe lea ma au!”
Peitai na tu ia Niya. “E le fiafia le Tama Faalelagi ia te au pe a ou tuuina le tupe lenei,” o lona manatu lea. “E tatau ona ou faamaoni i au upu ma amioga.”
Na liliu Niya ma toe foi i le faleoloa. “Ua ova le sui na e aumaia ia te au,” o lana tala lea i le faatauoloa a o ia toe faafoi atu le tupe.
Na ave e le faatauoloa le tupe. “O oe o se teine lelei.” o lana tala lea. Ona ia tuuina lea o ni apu i totonu o se tagapepa ma avatu ia Niya. “Faafetai mo lou faamaoni. Faamolemole ave apu ia ma le tou aiga.”
Na lagona e Niya le mafanafana ma le fiafia i totonu a o ia savali i le fale. Na ia iloa ua fiafia le Tama Faalelagi aua ua ia filifili e faamaoni.
Ata na tusia e Louise Parker