O Le Mea Tatou Te Talitonu I Ai

Sa Togiolaina e Iesu Keriso a Tatou Agasala

O se tasi o mafuaaga ua tatou i ai iinei i le lalolagi, ia tatou aoao e usiusitai i poloaiga a le Atua. Sei vagana ai Iesu Keriso, o lē sa soifua i se soifuaga atoatoa, ae o tagata uma o e sa nonofo i le lalolagi ua agasala (tagai i leRoma 3:23; 1 Ioane 1:8). O le agasala o lo tatou solia lea ma le loto i ai o poloaiga a le Atua, ma o agasala uma lava e i ai ma se faasalaga. A tatou agasala, o le faamasinoga tonu e manaomia ai lo tatou tiga i le faasalaga (tagai i le Alema 42:16–22).

Mulimuli ane, o le taunuuga o soo se agasala o le vavae ese lea mai le Atua (tagai i le 1 Nifae 10:21). O lenei vavae ese mai e matuai ogaoga lava, ma e le mafai ona tatou toe faaleleia e i tatou lava.

Ina ia foia lenei vavae ese, ua saunia ai e lo tatou Tama Faalelagi se auala mo Lona Alo Pele e Toatasi, o Iesu Keriso, na te tauave i Ona lava luga avega o a tatou agasala, e mafai ai ona tatou mama faaleagaga ma toe faatasi ai ma Ia. O le fuafuaga lenei o le alofa mutimutivale.

Na aoao mai le Faaola, “Aua faauta, o a’u le Atua na puapuagatia i nei mea mo tagata uma, ina ia latou le puapuagatia pe afai latou te salamo; ae peitai, afai latou te le salamo, e ao ina latou tiga e pei o a’u” (MFF 19:16–17).

O se vaega o Lana Togiola, na puapuagatia ai Iesu mo a tatou agasala i le Faatoaga i Ketesemane ma luga o le satauro i Kalevaria. O le salamo i a tatou agasala, e mafai ai ona tatou aumaia le mana o Lana Togiola i o tatou olaga.

Na fetalai mai Iesu Keriso, o lē sa finagalo malie e togiola mo a tatou agasala:

“Ia outou o mai ia te a’u, o outou uma o e tigaina ma mafatia i avega, o a’u foi e malolo ai outou.

“Ia outou amoina la’u amo, ma ia outou faaaoao ia te au; aua o au le agamalu ma le lotomaulalo: ona maua lea e outou o le malologa mo o outou agaga.

“Aua e avegofie la’u amo, o la’u avega foi e mama ia” (Mataio 11:28–30).

O le Togiola foi ua aumaia ai faamanuiaga nei:

1. O le toetutu i tagata uma e fananau mai i le lalolagi (tagai i le Alema 11:42–45).

2. O le ola faavavau i le afioaga o le Atua mo fanau uma o e maliliu ae le’i aulia o latou tausaga po o le matutua e tali atu ai mo i latou lava, o le valu tausaga (tagai i le Mosaea 3:16; 15:24–25; Moronae 8:8–12).

3. O le mafai ona maua o le toafilemu i taimi o tofotofoga aua na tauaveina e Iesu i Ona lava luga o tatou tiga ma ma’i (tagai i le Ioane 14:27; Alema 7:11–12).

4. O le taui mo e amiotonu ona o faiga le sa’o o lenei olaga (tagai i le Tala’i La’u Talalelei [2004], 52).

Mo nisi faamatalaga, tagai i le Mataupu Faavae o le Talalelei (2009), 65–72; Faamaoni i le Faatuatua (2004), 180–87.

“Faauta, ua ou sau i le lalolagi e aumai le togiola i le lalolagi, e faaola ai le lalolagi ai le agasala.

“O lenei, ai se salamo, ma sau ia te a’u, e pei o se tamaitiiti, ou te talia o ia, aua e faapei o i latou o e o i le malo o le Atua. Faauta, o i latou faapena na ou tuu atu ai lo’u ola, ma toe ava’e, o le mea lea, ia outou salamo, ma o mai ia te a’u, o outou tuluiga o le lalolagi, ma ola ai” (3 Nifae 9:21–22).

“O Iesu Keriso, i le avea ai ma Alo Pele e Toatasi o le Atua, ua na o ia foi le tagata e leai se agasala ua soifua i lenei lalolagi, ua na o ia lava le tagata e mafai ona faia se togiola mo tagata ola uma” (Bible Dictionary, “Atonement”).

Lo’u Tama e, saunia e Simon Dewey; Asiasi Atu Iesu Keriso i Amerika, saunia e John Scott © IRI; ata o se pepe © Getty Images; o isi ata na saunia e Christina Smith