Ae E Leai Se Ekalesia Iinei
Julie Ismail, Ausetalia i Sisifo, Ausetalia
I taimi o se faigamalaga i le Meititerane, sa ou auai ai ma le filiga i sauniga a le Ekalesia i soo se mea e mafai ona ou alu i ai. I Seville, i Sepania, sa ou maua le fesoasoaniga a se tamaitai faigaluega o le faletalimalo, o se tusi telefoni a le eria, ma se faafanua o le taulaga e fesoasoani ou te sailia ai le falelotu o le Au Paia o Aso e Gata Ai i le lotoifale. Sa ou tusia i lalo le tuatusi ma le igoa o le Ekalesia i le faaSipaniolo. I le afiafi o le Aso Toonai sa ou tatalo ai ina ia ou iloa le taimi e amata ai ia sauniga, ma sa ou lagona se uunaiga malosi e tatau ona ou i ai iina i le 10:00 i le taeao.
Ae ou te lei alu i le lotu i le 9:30 i le taeao o le Aso Sa, sa ou toe tatalo ina ia mafai ona ou mauaina le falelotu. I le mulimulitaia ai o lau faafanua, na amata ona ou pasia felavasaiga o magaala vaapiapi. O se taeao matagofie tele. Sa ou pasia ni faleaiga ma maketi o manufelelei e faatumulia i manulele o pisapisao ma fetagisi.
Sa ou taunuu i le tuatusi atofaina ae e leai ma se mea e iloa ai sa faatu ai se lotu. Sa ou savali i luga ma lalo o le auala ma saili ma le le manuia. Sa ou le mautonu ma popole, ma ua toeitiiti lava ta le 10:00 i le taeao.
Na iu ina ou tatalo i lou Tama oi le Lagi: “Sa e poloaiina au ou te alu i le lotu, ma o au lenei, ae e leai se lotu iinei.”
I lea taimi na sau ai se alii na laei lelei i se suti o agai mai i le tulimanu o le auala. Sa ia foliga o se tagata o le Ekalesia, ma sa uunaia au e taofi o ia. I se aga le mautonu, sa ou fai atu ia te ia o loo ou saili mo se lotu. Sa ia fai mai se tala ou te le malamalama ai, ma lē mautonu ai la’u vaai. Ona tatalaina lea o lana ato tusi, ma ou vaaia ai ni tusi fusi pau se lua e foliga mai o ni tusitusiga paia. Sa ou tuuina atu i ai lau fasi pepa lea na ou tusia ai le “La Iglesia de Jesucristo” (O Le Ekalesia a Iesu Keriso). Sa ata o ia ma tusi lona lima i tua i le ala na ou sau ai, ma ma savavali faatasi loa i le falesa. E ese le tuatusi e i ai le falelotu e na o ni nai minute e mamao ese mai ai ma e faigofie ona misi pe afai e te le iloaina o loo i ai iina. Sa tu i tua i se tamai lotoa, i tua atu o ni faitotoa tetele.
Na ou iloa i le falelotu o le tagata lea na fesoasoani ia te au, ua le o se isi lava a o le epikopo o le uarota ma na amata le sauniga i le 10:30. Sa ou taunuu o loo lava le taimi.
I le taimi o le sauniga anapogi ma molimau a le uarota, sa uunaia au e tuu atu lau molimau. Faatasi ai ma se faifeautalai sa faaliliuina a’u upu mai le Igilisi i le faa-Sipaniolo, na ou tuuina atu ai lau molimau ma faamatala atu le auala na saunia ai e le Alii se ala mo au e oo atu ai i le lotu. Ona tuuina atu lea e le epikopo o lana molimau ma faamatala mai le tatau ai ona paka mamao o lana taavale i lea taeao, ma o lea na tuai mai ai nai lo le taimi e masani ai. Ina ua ia vaai mai ia te au na ia manatu ou te foliga i se tagata o le Ekalesia, ma o lea na ia tu ai e fesoasoani mai ia te au. Ona ia toe saunoa lea e uiga i tagata o le ekalesia o loo leiloloa faaleagaga ma faapea mai e tatau ona tatou fesoasoani ia i latou e saili le Ekalesia.
Ua mou atu ou manatuaga o vaaiga o Seville i aluga o tausaga, ae o lo’u manatuaga o le sailiga o le lotu iina e le galo. O lena manatuaga o se molimau ia te au o le maoae o le alofa o lo tatou Tama oi le Lagi mo i tatou ma e vaaia pea Ona aao i lo’u olaga pe a tau lava o lo’u saili mo mea uma “e galulue faatasi mo [lo’u] lelei” (Roma 8:28).