Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nai faataitaiga nei.

“Ia Manatua Pea o Ia,” itulau 20: Mafaufau e talanoaina o se aiga le fautuaga a Elder Christofferson “E mafai ona tatou amata i le aveese o mea uma mai o tatou olaga ona toe tuu faatasi lea i le faasologa o mea e aupito taua ae faatotonugalemu ai le Faaola.” Mafaufau e talanoaina nisi o faamanuiaga na ta’ua e Elder Christofferson lea e oo mai pe a tatou “manatua pea le Faaola.”

“Mana o Tusitusiga Paia,” itulau 52: Pe a maea ona faitauina faatasi lenei tusiga, valaaulia tagata o le aiga e faasoa mai o latou lagona e faatatau i le faitauina o tusitusiga paia ma le o i le seminare. Valaaulia i latou e tusi i totonu o a latou api o talaaga a latou molimau e uiga i le mana o tusitusiga paia. Fautuaina lau fanau e suesue ma tauloto ia mau tauloto.

“O Le Puluvaga o Iesu Keriso,” itulau 56: A o outou faitauina faatasi le tusiga lenei, valaaulia lou aiga e faalogo i le taua o se puluvaga. Fesili ia i latou po o le a se mea semanu e tupu pe ana le fesoasoani le puluvaga i le alii lea na aitalafu. E mafai foi ona outou faitauina ma talanoaina mau e uiga i le auala o loo avea ai le Faaola ma o tatou puluvaga. Mafaufau e faitau le 2 Nifae 2:27–28 ma le Alema 42:24–25.

“Ua Sauni Lelei Ofu,” itulau 70: Mafaufau e valaaulia tagata o le aiga e ofuina ni ofu o ni tagata lauiloa pe faafoliga i se isi tagata. Tuu atu le avanoa i tagata taitasi e faasoa mai ai po o ai i latou. Pe a maea ona faitauina le tala, faamalamalama atu e tusa lava po o le a le matafaioi tatou te tauaveina, o i tatou lava o fanau a le Atua.

O Taimi Fiafia ma Noataga e Faavavau

A o laiti la’u fanau, sa fiafia lava e taaalo i ni taaloga pe a uma le matou afiafi faaleaiga. O se tasi o taaloga e fiafia i ai, o le “Trunky le Elefane,” sa faaigoa i se pese na aoaoina e se tasi o le ma fanau teine, o Jocelyn, i le aoga. A uma ona matou usuina uma le pese, ona fai lea o a’u ma Trunky ae tietie la’u fanau i lo’u tua. E oso muamua i luga lo’u atalii e lua tausaga, o Jorge; ona sosoo lea ma lo’u afafine e fa tausaga, o Jocelyn, ae mulimuli lo’u toalua, o Elisapeta. Ona ou faataamilo lea i le potu malolo, a o tietie uma le toatolu lea i lo’u tua. Matou te fiafia ai lava.

I ni tausaga mulimuli ane, sa faatalitali ai la’u fanau ina ua matutua mo o la’ua valaauga faamisiona. I se tasi o afiafi faaleaiga, sa la manatua ai “Trunky le Elefane.” Sa matou usuina faatasi le pese; ona ou toe avea ai foi lea ma elefane, i le mavae ai o le tele o tausaga talu ai. Na muamua oso lo’u atalii, ona sosoo ai lea ma lo’u afafine, ae mulimuli lo la’ua tina. Na iu ina ou papaioa i le fola, ma sa matou talie ai lava.

O le manatua o lena taimi matou te maua ai le agaga faafetai ona sa aoaoina i matou e perofeta e uiga i afiafi faaleaiga. Sa matou aoaoina po o le a lava le faigofie o se afiafi faaleaiga, o le mea aupito sili ona taua o le maua o taimi e fiafia faatasi ai ma o matou aiga, ma taimi e faamalolosia ai o matou noataga e faavavau.

Víctor G. Chauca Rivera