Tatou te Talanoa ia Keriso
Salamo, Liliu Atu i le Alii, ma Ia Faamaloloina
“Faauta, o le ua salamo i ana agasala e faamagaloina o ia, ma o au le Alii, ou te le toe manatua lava” (MFF 58:42).
Talu ai nei lava na manua tigaina ai se tamaitai lelei ma faamaoni ou te masani ai i se faalavelave tau taavale. O mea na aofia i ona manuaga o ni ponaivi gaui ma sa gaui foi lona ivitu. O se vaega o ana togafitiga o le tatau lea ona faia se fusi e fusi ai lona tua ma lona ua ia aua nei minoi solo. Sa le maua se lagolelei i le faiga o le fusi. Ae sa tatau lava ona fai. E tuuina mai ai le tulaga e mafai ai ona toe manuia lona tua ma lona ua.
O le salamo e pei lava o lena fusi. A tatou agasala, tatou te faamanualia o tatou agaga, ma e manaomia ai se togafitiga faalelagi e toe faaatoatoa ai i tatou. O le salamo e tuuina mai ai le tulaga e mafai ai e le Faaola, e ala mai i le mana o le Togiola, ona faamalolo i tatou (tagai i le 3 Nifae 9:13). Afai e le maua se lagolelei i nisi o vaega o le salamo—e pei o se fusi i se tua ua gau—e tatau lava ona tatou salamo.
Na aoao mai Peresitene Dieter F. Uchtdorf, Fesoasoani Lua i le Au Peresitene Sili: “O le salamo moni e toe aumaia ai i tatou e faia le mea sa’o. Ina ia salamo moni, e tatau ona tatou iloa a tatou agasala ma ia lagona le faanoanoa, po o le tiga faaleatua, ma ta’uta’u atu na agasala i le Atua. Afai e matuia a tatou agasala, e tatau ona ta’uta’u atu i lo tatou taitai perisitua ua faatagaina. E tatau ona tatou ole atu i le Atua mo se faamagaloga ma faia mea uma tatou te mafaia ina ia faasa’o ai soo se faaletonu ua mafua ona o a tatou faatinoga. O le salamo o lona uiga o se suia lea o le mafaufau ma le loto—tatou te tuu le faia o mea e sese, ma amata ona tatou faia mea e sa’o. E aumaia ai ia i tatou se uiga faaalia fou i le Atua, o le tagata lava ia, ma le olaga lautele.”1
A tatou faamaeaina ma le manuia laasaga o le salamo, o le taunuuga o le faamalologa, toomaga, ma le fiafia. Sa tusia e Dorothy J. R. White:
Mafaufau i loimata e maligi,
Ae faamamaina ai le agaga.2
Ua augani mai le Alii ma le faatauanau, alofa, ma le uunaiga ina ia tatou salamo, aua e finagalo o Ia e faamalolo i tatou. Sa puapuagatia o Ia i Lona tino ma le agaga e totogi le tau mo a tatou agasala pe afai tatou te salamo. Ua Ia fetalai mai:
“Aua faauta, o au le Atua na puapuagatia i nei mea mo tagata uma, ina ia latou le puapuagatia pe afai latou te salamo;
“A e peitai, afai latou te le salamo e ao ina latou tiga e pei o au;
“O le tiga lea na faagateteina ai au lava, o le Atua, le silisili ese i mea uma, ona o le tiga ma na maligi ai le toto mai pu laiti uma lava o le tino, ma na tiga le tino atoa ma le agaga—ma sa ou loto ou te le inu i le upu oona, ae teena—
“A e ui i lea, ia i le Tama le viiga, ma na ou inu ma faaumaina ai a’u sauniuniga i le fanau a tagata.
“O le mea lea, ou te toe poloai atu ai ia e salamo” (MFF 19:16–20).
Talosia ia tatou salamo nei, liliu atu i le Alii, ma ia faamaloloina.
Sa toe foi atu ma le faamaulalo le atalii faamaumau oa i lona tama ma faapea atu, “Lou Tama e, ua ou agasala i le o i le lagi, atoa ma ou luma, ua ou le toe aoga ona ta’ua o lou atalii” (Luka 15:21). Sa talia fiafia o ia e lona tama i le aiga. E faapena foi ona talia fiafia i tatou e lo tatou Tama Faalelagi pe a tatou salamo.
O Le Toe Foi o le Atalii Faamaumau Oa, saunia e James Tissot