Tala Faamamai o le Talalelei
O Le Mana Faamama o Ketesemane
Sa soifua mai Bruce R. McConkie i le aso 29 o Iulai, 1915, i Michigan, ISA. Sa lagolagoina o ia i le Au Fono Muamua a Fitugafulu i le aso 6 o Oketopa, 1946, ma sa faauuina o se Aposetolo i le aso 12 o Oketopa, 1972. Na maliu o ia i le aso 19 o Aperila, 1985, i le Aai o Sate Leki, Iuta. O le saunoaga lenei sa fofogaina i le konafesi aoao i le aso 6 o Aperila, 1985.
Ou te lagona, ma e foliga mai ua ogatasi foi ma le Agaga, o le aoaoga faavae aupito taua e mafai ona ou folafola atu, ma o le molimau aupito mamana foi lea e mafai ona ou tuuina atu, o le taulaga togiola a le Alii o Iesu Keriso.
O Lana Togiola o le mea aupito sili lea ona faagaeetia ua tupu talu mai le gafoaga o le Foafoaga e oo atu i augatupulaga uma o se faavavau e le muta.
O le faatinoga maualuga lea o le agalelei ma le alofa tunoa lea e na o se atua e mafai ona faatinoina. E ala mai i le Togiola, na aoga uma ai tuutuuga ma tulaga o le fuafuaga e faavavau o le faaolataga a le Tama.
E ala mai i le Togiola le aumaia o le tino ola pea ma le ola e faavavau o tagata. E ala mai i le Togiola, e faaolaina uma ai o tagata mai le oti, seoli, ma le tiapolo, ma le puapuaga e le gata.
Ma e ala mai i le Togiola, o e uma e talitonu ma usitai i le talalelei matagofie a le Atua, o i latou uma e amio sa’o ma faamaoni ma manumalo i le lalolagi, o e uma e puapuagatia mo Keriso ma Lana afioga, o e uma e aoaiina ma sasaina ona o Ia o le ona i tatou—uma, o le a avea e faapei o lo latou Foafoa, ma nonofo faatasi ma Ia i Lona nofoalii ma nofotupu ma Ia e faavavau i le mamalu e faavavau.
I le talanoa ai e uiga i nei mea matagofie, o le a ou faaaogaina ai a’u lava upu, e ui atonu o le a outou faapea o upu ia o tusitusiga paia, upu na tautalagia e isi aposetolo ma perofeta.
E moni na folafolaina muamua lava e isi, ae ua avea nei ma a’u upu, aua ua molimau mai le Agaga Paia o le Atua ia te au ua moni ia, ma ua pei nei ua faaali mai e le Alii ia te au i le taimi muamua. Ua faapea ai ona ou faalogoina Lona siufofoga ma iloa Ana afioga.
I le Faatoaga o Ketesemane
I le lua afe tausaga ua mavae, i fafo atu o puipui o Ierusalema, sa i ai se nofoaga manaia o se faatoaga, o Ketesemane le igoa, lea sa masani ona malolo i ai Iesu ma Ana uo mamae e mafaufau loloto ma tatalo ai.
O iina sa aoaoina ai e Iesu Ona soo i aoaoga faavae o le malo, ma sa latou talanoa uma ai ma Ia o lē o le Tama o i tatou uma, o lana galuega lea sa latou galulue ai ma o Lana feau foi lea sa latou auauna atu ai.
O lenei nofoaga paia, e pei o Etena lea sa nofo ai Atamu, e pei o Sinai lea na tuuina mai ai e Ieova Ana tulafono, e pei o Kalevaria lea na tuuina atu ai e le Alo o le Atua Lona soifua e sui ai le toatele, o lenei laueleele paia o iina na tauvaeina ai e le Alo e leai se agasala o le Tama e Faavavau i Ona lava luga agasala a tagata uma pe a fai e salamo.
Tatou te le iloa, e le mafai ona tatou faamatalaina, e le mafai ona malamalama i ai le mafaufau faaletino i le taua atoa o le mea na faia e Iesu i Ketesemane.
Ua tatou iloa sa puna mai le afutoto i puninii uma o Lona tino a o Ia inuina ‘alu o lena ipu oona na tuuina atu e Lona Tama ia te Ia.
Ua tatou iloa sa puapuagatia o Ia, i le tino ma le agaga, e sili atu nai lo mea e mafai ona tigaina ai le tagata, sei vagana ai e oo i le oti.
Ua tatou iloa i se isi itu, e le mafai ona tatou malamalama i ai, o Ona puapuaga na faamalieina ai manaoga o le faamasinoga tonu, faasaolotoina ai tagata salamo mai tiga ma faasalaga o le agasala, ma mafai ai ona maua le alofa mutimutivale e i latou o e talitonu i Lona suafa paia.
Ua tatou iloa sa faō o Ia i luga o le eleele ona o tiga ma mafatiaga o se avega e le mafuatia lea na mafua ai ona gatete o Ia ma na toetoe a le mafai ona Ia inuina le ipu oona.
Ua tatou iloa na oo mai se agelu mai malo o le mamalu e faamalosia o Ia i Ona puapuaga, ma ua tatou faapea o le agelu sili o Mekaeli, o le na muai pa’ū ina ia i ai le tagata.
I le latalata e mafai ona tatou faamasinoina ai, o nei tiga e le i’u—o lenei tigaina e le mafaatusalia—sa faaauauina lava mo le tusa i le tolu po o le fa itula.
O Lona Pue Faapagotaina, Faamasinoga, ma le Sasaina
Ina ua uma lena—o Lona tino ua fetosoa’iina ma vaivai i le leai o se malosi—sa faafesaga’i ai o Ia ma Iuta ma isi tagata faatiapolo, o isi e mai le aufono a Iutaia anamua lava; ma sa taitai ese atu o Ia i se maea sa i Lona ua, e pei o se tagata solitulafono masani, e faamasinoina e tagata na sili ona solitulafono, o e o tagata Iutaia sa nonofo ai i le nofoa o Arona, ma o e o tagata Roma na faaaogaina le pule a Sesa.
Sa latou aveina atu o Ia ia Anania, ia Kaiafa, ia Pilato, ia Herota, ma toe aumai ai ia Pilato. Sa tuuaia o ia, fetuuina, ma sasaina. O o latou faua namuleaga sa tafe ifo i Ona foliga a o atili faavaivaia e ta saua Lona tino ua gapelu i le tiga.
O ofe o le ita sa latou ta faalausosooina ai Lona tua. Sa tafe ifo le toto i Ona foliga a o tutui e se pale tuitui Lona muaulu gatete.
E ui i na mea uma sa sasaina o Ia, sa sasaina i ta e 40, sa sasaina i se fue mafiafia lea sa faapipii ai ni ponaivi ma ni fasi uamea maamaai.
E toatele tagata e maliliu mai le na o le sasaina, peitai sa tulai ae o Ia mai tiga o le sasa ina ia mafai ona Ia maliu i se oti faalumaina i luga o le satauro saua o Kalevaria.
Ona Ia amoina lea o Lona lava satauro seia oo ina sulu ona o le mamafa ma le tiga ma le o’oo’o o le matuitui o ia mea uma.
I Luga o le Satauro
Mulimuli ane, i luga o se mauga e ta’ua o Kalevaria—sa i fafo foi o puipui o Ierusalema—a o vaavaai atu le au soo ma le leai o se mea e mafai ona latou faia, ma lagonaina i o latou lava foi tino ia tiga o le a lata ina oti, sa faataoto ai o Ia e fitafita Roma i luga o le satauro.
Faatasi ai ma ni samala tetele sa latou tutuiina ai ni fao maamaai i Ona vae ma lima ma tapulima. E moni lava sa manua o Ia ona o a tatou solitulafono ma momomo ona o a tatou amioletonu.
Ona faatu ae lea o le satauro ina ia mafai e tagata uma ona vaai, ma sioa, ma fai upu leaga, ma tauemu i ai. Sa latou faia lenei mea leaga inosia, mo le tolu itula mai le 9:00 i le taeao seia oo i le aoauli.
Ona pogisa ai lea o le lagi. Sa ufitia le laueleele i le pouliuli mo le umi e tolu itula, e pei ona sa oo foi i sa Nifae. Sa i ai se matagi malosi, na pei na tiga foi le Atua o le lalolagi.
Ma e moni lava sa tiga o Ia, aua a o tautau o Ia [Iesu] i luga o le satauro mo le isi tolu itula, mai le aoauli e oo i le 3:00 i le afiafi, sa toe foi mai ai puapuaga e le mafaitaulia ma tiga faalealofa o Ketesemane.
Ma mulimuli ane, ina ua uma lava ia puapuaga ma tiga o le togiola—ina ua malo le manumalo, ina ua faataunuuina e le Alo o le Atua le finagalo o Lona Tama i mea uma—ona Ia faapea atu lea, “Ua maea” (Ioane 19:30), ma sa Ia tuuina atu ma le malie lona agaga.
I Le Lalolagi o Agaga
A o faasaolotoina o ia e le filemu ma le mafanafana o se maliu agalelei mai tiga ma faanoanoaga o le olaga nei, na ulufale atu ai o Ia i le parataiso o le Atua.
Ina ua Ia faia Lona agaga o se taulaga mo agasala, sa saunia o Ia e iloa Lana fanau, e tusa ai ma le fetalaiga faamesia.
O nei [fanau], e aofia ai perofeta paia uma ma le Au Paia faamaoni mai augatupulaga ua mavae; o nei fanau, e aofia ai i latou na tauaveina i o latou luga Lona suafa, ma o e, ua fanauina faaleagaga e Ia, na avea ma Ona atalii ma Ona afafine, e faapena foi ia i tatou; o nei tagata uma sa faapotopotoina i le lalolagi o agaga, iina e vaai ai i Ona fofoga ma faalogo i Lona siufofoga.
I le tuanai ai o le tusa ma le 38 pe 40 itula—e tolu aso e pei ona ta’ua ai i taimi faa-Iutaia—na oo mai ai lo tatou Alii faamanuiaina i le tuugamu o Arimataia, lea na tuu ai e Nikotemo ma Iosefa le Arimataia ia Lona tino ua uma ona uuina ma auiina.
O Lona Toetu
Ma, i se auala tatou te le malamalama i ai, sa Ia aveina ae ai lena tino e le’i pala ma toetu ae i lena tino ola pea faamamaluina lea na avea ai o Ia e pei o Lona Tama toetu.
Ona Ia maua ai lea o le pule uma i le lagi ma le lalolagi, maua isi faaeaga e faavavau, faaali mai ia Maria le Makatala ma le tele o isi tagata, ma afio ae i le lagi, o iina e nofo ai i le itu taumatau o le Atua le Tama Silisili Ese, ma ia nofotupu e faavavau i le mamalu faavavau.
O Lona toetu mai le oti i le aso tolu na faamaeaina ai le Togiola. Ma, i se isi foi auala e le mafai ona tatou malamalama i ai, ua oo mai taunuuga o Lona Toetu i tagata uma ina ia mafai ona toetutu mai le tuugamau.
E pei ona oo mai le oti ona o Atamu, ua aumai e Keriso le ola; e pei ona avea Atamu ma tama o le tino faalelalolagi, ua avea Keriso ma tama o le tino ola pea.
Ma a aunoa ma ia mea e lua, o le tino i le olaga nei ma le tino ola pea, e le mafai e le tagata ona galue mo lona faaolataga ma alu ae i na mea maualuluga i tua atu o lagi lea e nonofo ai atua ma agelu e faavavau i le mamalu e faavavau.
O Se Malamalama i le Togiola
O lenei la, o le Togiola a Keriso o le aoaoga faavae autu sili lea ma le taua o le talalelei, ma o le aoaoga faavae foi e sili ona itiiti se malamalama i ai o upumoni uma ua faaalia mai.
O le toatele o i tatou ua i ai se malamalama papau ma faalagolago i le Alii ma Lona agalelei e fesoasoani ia i tatou i tofotofoga ma faigata o le olaga.
Ae afai tatou te faatuatua e pei o Enoka ma Elia, e tatau ona tatou talitonu i mea sa la talitonu i ai, iloa mea sa la iloaina, ma ola e pei ona la ola ai.
Ou te valaaulia outou ina ia tatou auai faatasi i le mauaina o se malamalama lelei ma le mautinoa i le Togiola.
E tatau ona tatou lafoai i filosofia o tagata ma le poto o e popoto, ae faalogo atu i lena Agaga lea ua tuuina mai ia i tatou e taiala i tatou i upu moni uma.
E tatau ona tatou suesue i tusitusiga paia, ma ia talia o le mafaufau ma le finagalo ma le siufofoga o le Alii ma o le mana lava lea o le Atua i le faaolataga.
A o tatou faitau, mafaufau loloto, ma tatalo, o le a oo mai i o tatou mafaufau se vaaiga o faatoaga e tolu a le Atua—o le Faatoaga o Etena, o le Faatoaga o Ketesemane, ma le Faatoaga o le Tuugamau Avanoa, lea sa faaali mai ai Iesu ia Maria le Makatala.
O Le Foafoaga, Pau, ma le Togiola
I Etena, o le a tatou vaai ai i mea uma na foafoaina i se tulaga faaparataiso—e leai se oti, e leai se mana o le foafoaga, e leai ni aafiaga faataitai.
O le a tatou iloa o lena ituaiga o foafoaga, lea ua le iloa nei e tagata, sa na o le pau lea o le ala e aumai ai le Pau.
O le a tatou vaai ai ia Atamu ma Eva, o le uluai tane ma le uluai fafine, na o ifo mai lo laua tulaga e le oti ma le mamalu faaparataiso e avea ma uluai tagata faitino i luga o le fogaeleele.
O le olaga nei, e aofia ai le mana foafoa ma le oti, o le a oo mai i le lalolagi. Ma ona o le solitulafono, o le a amataina ai se olaga faataitai o le faaosoosoina ma le tofotofoina.
O Ketesemane o le a tatou vaai ai i le Alo o le Atua o faasaoina le tagata mai le oti faaletino ma le oti faaleagaga lea na oo mai ia i tatou ona o le Pau.
Ma le vaega mulimuli, i luma o se tuugamau avanoa, o le a tatou iloa ai o Keriso lo tatou Alii ua motusia nonoa o le oti ae tulai manumalo ae e faavavau i le tuugamau.
O lea la, o le Foafoaga o le tamā lea i le Pau; ma o le Pau na oo mai ai le olaga nei ma le oti; ma o Keriso na oo mai ai le tino ola pea ma le ola e faavavau.
Ana faapea e leai se Pau o Atamu, lea na oo mai ai le oti, semanu e le i ai se Togiola a Keriso, lea ua oo mai ai le ola.
O Lona Toto Togiola
Ma o lenei, e faatatau i lenei Togiola atoatoa, na oo mai i le faamasaaina o le toto o le Atua—ou te molimau atu sa tupu i Ketesemane ma Kolokota, ma e faatatau ia Iesu Keriso, ou te molimau atu o Ia o le Alo o le Atua soifua, ma sa faasatauroina mo agasala a le lalolagi. O Ia o lo tatou Alii, lo tatou Atua, ma lo tatou Tupu. O lenei mea ua ou iloa mo a’u lava, ou te tutoatasi lava mai se isi lava tagata.
O a’u o se tasi o Ana molimau, ma i se aso o lumanai o le a ou tagotago i faailoga o fao i Ona lima ma i Ona vae, ma o le a susu Ona vae i o’u loimata.
Ae o le a le sili atu se isi mea ou te iloa i lena taimi nai lo le mea ua ou iloa nei, o Ia o le Alo o le Atua Silisili Ese, o Ia o lo tatou Faaola ma le Togiola, ma e oo mai ma ala mai le faaolataga i Lona toto togiola ae le o se isi lava ala.
Talosia i le alofa o le Atua ia mafai e i tatou uma ona savavali i le malamalama, e pei ona i ai le Atua lo tatou Tama i le malamalama, ina ia tusa ai ma folafolaga, ia faamamaina i tatou e le toto o Iesu Keriso, Lona Alo, mai agasala uma.
Faamatala mai le Aua Nei Faia Lo’u Loto, a o Lou Finagalo, saunia e Harry Anderson © Pacific Press Publishing
Faamatalaga mai le O Toma Masalosalo, saunia e Carl Heinrich Bloch, faaaogaina i le faatagaga a le National Historic Museum i Frederiksborg i Hillerød, Tenimaka