O Le Faamoemoega o le Aualofa

Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.

Faatuatua • Aiga • Toomaga

Ina ua faatoa valaauina la matou au peresitene, sa tuuina mai ia i matou nisi o punaoa e uiga i le talafaasolopito o le Aualofa. Sa matou suesueina ma le agaga tatalo nei mea, ma le manao ia iloa le faamoemoega o le Aualofa ma po o le a se mea e finagalo le Alii matou te faia. Sa matou iloa ai o le faamoemoega o le Aualofa e pei ona faavaeina ai e le Alii o le faatulaga lelei, aoao atu, ma uunaia Ona afafine ia saunia i latou mo faamanuiaga o le ola e faavavau.

Ina ia faataunuuina lenei faamoemoega o le Aualofa, ua tofia ai e le Alii ia uso taitoatasi ma le faalapotopotoga atoa e:

Ia faateleina le faatuatua ma le amiotonu o le tagata lava ia.

Faamalolosia o aiga ma auaiga.

Tuuina atu le toomaga e ala i le auauna atu i le Alii ma Ana fanau.

E na o le ala lava a le Alii e mafai ai ona tatou faia lenei galuega, pe a tatou saili, maua ma galulue i faaaliga faaletagata lava ia. A aunoa ma faaaliga faaletagata lava ia, e le mafai ona tatou manuia. Afai tatou te usitai i faaaliga faaletagata lava ia, e le mafai ona tatou toilalo. Ua faatonuina i tatou e le perofeta o Nifae, o le Agaga Paia o le a faaali mai ia i tatou “mea uma e tatau ona [tatou] faia” (2 Nifae 32:5). E tatau ona tatou matuai le gaoia ma ia lava lo tatou fifilemu e faalogologo ai i le leo o le Agaga.

Uso e, ua i ai so tatou tiute taua e fai e fesoasoani ai e fausia le malo o le Atua ma sauni ai mo le afio mai o le Alii. O le mea moni, e le mafai ona ausia le galuega a le Alii e aunoa ma le fesoasoani a Ona afafine. Ona o lena mea, ua faamoemoe mai ai le Alii ia faateleina a tatou taulaga. E leai se isi taimi ua sili ai ona Ia faamoemoe mai ia i tatou e faataunuu le faamoemoega o le Aualofa.

Julie B. Beck, peresitene aoao o le Aualofa.

Mai Tusitusiga Paia

Teuteronome 6:5–7; Luka 10:30–37; Iakopo 1:27; 2 Nifae 25:26; Mosaea 3:12–13

Mai lo Tatou Talafaasolopito

I se fonotaga a le Aualofa i le aso 9 o Iuni, 1842, sa aoao ai e le Perofeta o Iosefa Samita ia tuafafine o la latou faalapotopotoga sa “le gata i le tuuina atu o le toomaga i e matitiva, ae ia laveai foi i agaga.”¹ O lenei faamatalaga e faaleagaga ma faaletino foi lona faamoemoega ua faamatalaina ai le Aualofa i lona talafaasolopito atoa. I le 1906 na aoao mai ai Peresitene Iosefa F. Samita (1838–1918): “O le [Aualofa] ua le gata ina nafa ma mea e manaomia mo e matitiva, o e mamai ma le tagolima, ae o se vaega o lona tiute—ma o se vaega tele foi—o le vaavaaia o le manuia faaleagaga ma le faaolataga o tina ma afafine o Siona; ia vaai ua leai se tasi e faagaloina, ae o i latou uma ua puipuia mai faaletonu, mala, o le malosi o le pouliuli, ma le tiapolo o loo luitauina ai i latou i le lalolagi.”² I le 2001 sa toe faamanatu mai ai e Elder M. Russell Ballard o le Korama a Aposetolo e Toasefululua, “O tuafafine uma i lenei Ekalesia o e ua osi feagaiga ma le Alii, ua ia te i latou se faatagaga paia e fesoasoani ai i le laveaiina o agaga, e taitai tamaitai o le lalolagi, e faamalolosia aiga o Siona, ma fausia le malo o le Atua.”³

Ata pue na saunia e Christina Smith