Ia Manatua Pea o Ia
Mai se saunoaga na tuuina atu i le Iunivesite o Polika Iaga–Idaho i le aso 27 o Ianuari, 2009. Ina ia faalogologo i le saunoaga lenei i le gagana Peretania, asiasi i le web.byui.edu/devotionalsandspeeches/default.aspx.
A tatou manatua pea le Faaola, e mafai ona tatou “faia ma le fiafia mea uma e mafai ona tatou faia,” ma talitonu o Lona mana ma [Lona] alofa ia i tatou o le a mafai ai.
O tatalo o le faamanatuga ua faamautu mai ai o se tasi o faamoemoega autu o le faamanatuga e pei ona sa faia e le Alii o Iesu Keriso, ia mafai ona tatou “manatua pea o ia” (MFF 20:77, 79). O le manatuaina o le Faaola e mautinoa lava le aofia ai o le manatua o Lana Togiola, lea e faatusaina i le falaoa ma le vai o faatusa o Ona puapuaga ma le maliu. E le tatau ona galo ia i tatou le mea sa Ia faia mo i tatou, aua ana leai Lana Togiola ma le Toetu, e leai se uiga o le olaga. Ae, o Lana Togiola ma le Toetu, ua maua ai ni avanoa e faavavau ma paia o o tatou olaga.
Ou te fia auiliiliina ni vaega se tolu o le uiga o le “manatua pea o ia”: muamua, saili ia iloa ma mulimuli i Lona finagalo; lua, iloa ma talia o tatou tiute e tali atu ia Keriso mo mafaufauga, upu, ma amioga uma; ma lona tolu, o le ola ma le faatuatua e aunoa ma le matau, e mafai ona tatou vaai atu e le aunoa i le Faaola mo fesoasoaniga tatou te manaomia.
1. Saili ia iloa ma mulimuli i le finagalo o Keriso, e pei lava ona Ia sailia le finagalo o le Tama.
O le faamanuiaina faalefaamanatuga o le falaoa tatou te tautino atu ai ua tatou loto e ave i o tatou luga le suafa o le Alo “ma manatua pea o ia ma tausia ana poloaiga ua ia tuuina mai ia i [tatou]” (MFF 20:77). O le a talafeagai foi le faitauina o lenei feagaiga ia “manatua pea o Ia ia tausi i Ana poloaiga.” O le auala lenei e manatua ai pea e Ia le Tama. E pei ona Ia fetalai, “Ou te le mafaia ona fai o se mea e tasi, na o a’u: e faatatau la’u faamasinoga i lo’u faalogo: ua tonu lava la’u faamasinoga; aua ou te le usiusitai i lo’u lava loto, a o le finagalo o le Tama, o le na auina mai a’u” (Ioane 5:30).
Sa maua e Iesu le tasi lelei atoatoa ma le Tama e ala i le gauai atu o Ia lava, i le tino ma le agaga, i le finagalo o le Tama. E faatatau atu i Lona Tama, na fetalai ai Iesu, “Ou te faia pea lava o mea lelei ia te ia” (Ioane 8:29). Ona o le finagalo o le Tama, o lea na gauai atu ai Iesu e oo lava i le oti, “ua faaumatia foi le loto o le Alo i le finagalo o le Tama” (Mosaea 15:7). O Lona taulai atu i le Tama o se tasi lea o mafuaaga autu na i ai le manino lelei ma le mana i le galuega a Iesu.
I le ala lava lea e tasi, e mafai e outou ma a’u ona tuu Keriso i le totonugalemu o o tatou olaga ma tasi ai ma Ia e pei ona tasi o Ia ma le Tama (tagai i le Ioane 17:20–23). E mafai ona tatou amata i le aveese o mea uma mai o tatou olaga ona toe tuu faatasi lea i le faasologa o mea e aupito taua ae faaogatotonu ai le Faaola. E tatau ona tatou faatulagaina muamua mea e mafai ai ona manatua pea o Ia—tatalo e le aunoa ma le suesueina o tusitusiga paia, o le suesue ma le mafaufau loloto i aoaoga faaaposetolo, sauniuniga faalevaiaso e fetagofi atu ma le agavaa i le faamanatuga, tapuaiga i Aso Sa, ma le tusitusia ma le manatuaina o mea e aoao mai e le Agaga ma aafiaga ia i tatou i le avea ai ma soo.
O isi mea e mafai ona oo mai i o tatou mafaufau e faapitoa lava ona fetaui ia oe i lenei taimi o lou olaga. A tatou faaavanoaina loa se taimi talafeagai ma mea mo nei tulaga i le faatotonugalemuina o Keriso i o tatou olaga, ona amata loa lea ona faaopoopo atu isi matafaioi ma mea e taua, e pei o tiute i aoaoga ma aiga. O le faiga lenei o le a le fetineia’i ai mea e taua mai o tatou olaga e mea e lelei, ma o mea e itiiti le taua o le a maualalo foi lona tulaga o le faamuamua pe o le a leai atoa lava.
Ua ou iloa o le faaogatasiina o o tatou loto i le finagalo o Iesu Keriso a o Ia faaogatasia Lona loto i le finagalo o le Tama, o se mea e le faigofie ona ausia. Sa talanoa malamalama mai Peresitene Polika Iaga (1801–77) e uiga i o tatou luitau ina ua ia saunoa:
“Ina ua maea mea uma sa talanoaina ma faia, ina ua uma ona ia taitai lenei nuu mo se taimi umi, pe tou te le’i vaaia ea o loo i ai se leai o se talitonu i lo tatou Atua? Pe o mafai ona outou vaaia ia te outou lava? Atonu tou te fesili, ‘[Uso] Iaga, o e vaaia ia te oe lava?’ Ioe, e mafai ona ou vaaia e oo mai i le taimi nei e leai se talitonu, i sina vaega, ia te ia o le ou te faatuatua i ai.—Aisea? Aua e le o ia te au le mana, ona o le taunuuga na aumaia e le pau i o’u luga. …
“… E i ai se mea e sau mai totonu ia te au, i nisi taimi[,] lea e iloa lelei ai le vaseina o se laina e vavaeina ai mea ou te fiafia i ai ma mea e fiafia i ai lo’u Tama oi le Lagi; se mea e le o ogatasi lelei ai mea ou te fiafia i ai ma mea e fiafia i ai lo’u Tama oi le Lagi.
“Ou te iloa e tatau ona tatou lagonaina ma malamalama, i se tulaga e mafai ai, i se tulaga e faatagaina ai i tatou e le natura pau, i se tulaga e mafai ona tatou maua ai le faatuatua ma le poto e malamalama ai ia i tatou lava, e faapea, o mea e fiafia i ai le Atua o lē o loo tatou auauna i ai, o le mea lena tatou te fiafia i ai, ae le o se isi lava mea, i le olaga nei po o le faavavau.”1
E ui atonu e le faigofie, ae e mafai ona tatou fetaomi pea i luma ma le faatuatua i le Alii. E mafai ona ou faamaonia i le aluga o taimi o le a tuputupu ae lo tatou manao ma le gafatia e manatua pea ma mulimuli i le Faaola. E tatau ona tatou galulue ma le onosai e agai atu i le iuga ma tatalo e le aunoa mo le iloatino ma le fesoasoani faalelagi tatou te manaomia. Na fautua mai Nifae, “Ou te fai atu ia te outou e ao ina outou tatalo e le aunoa, aua le faavaivai; aua tou te faia se mea e tasi i la le Atua, sei iloga tou te muai tatalo i le Tama i le suafa o Keriso, ina ia faapaiaina e ia la outou galuega ia te outou, ina ia aoga la outou galuega e faamanuiaina ai o outou agaga” (2 Nifae 32:9).
Sa ou molimauina se faataitaiga faigofie o lenei ituaiga o tatalo ina ua tofia i maua ma Elder Dallin H. Oaks o le Korama a Aposetolo e Toasefululua e taitaia se faatalanoaga i se talanoaga faavitio o se ulugalii i se isi atunuu. I se taimi e le’i mamao ae ma te lei o atu i le potu mo le faatalanoaga, sa ou toe tilotilo tasi ai lava i faamatalaga sa ma mauaina e uiga i le ulugalii ma sa ou lagonaina ua ou saunia mo le faatalanoaga. O ni nai minute a o lei oo i le taimi atofaina, sa ou vaaia ai Elder Oaks o saofai toatasi ma punou lona ulu. E lei umi ae ea a’e ma fai mai, “Faatoa uma la’u tatalo e sauniuni ai mo lenei faatalanoaga. O le a ta manaomia le meaalofa o le iloatino.” Na te lei faagaloina le sauniuniga aupito sili ona taua, o se tatalo e faapaia ai la ma faatinoga mo lo maua manuia ma le mamalu o le Alii.
2. Sauni e tali atu ia Keriso mo mafaufauga, upu, ma amioga uma.
O loo faamanino mai e tusitusiga paia o le a i ai se aso tele o le faamasinoga pe a tulai le Alii e faamasino i tagata (tagai i le 3 Nifae 27:16) ma o le a tootutuli tulivae uma ma o le a ta’uta’u atu laulaufaiva uma o Ia o le Keriso (tagai i le Roma 14:11; Mosaea 27:31; MFF 76:110). O le natura e tasi ma le tulaga o lena faamasinoga o loo faamatalaina e Alema i le Tusi a Mamona:
“Aua o a tatou upu e tausalaina ai i tatou, ioe, e tausalaina i tatou i a tatou galuega uma; e le maua foi i tatou ma le le pona; a e tausalaina i tatou i o tatou manatu; a o faapea ona matautuia tele, tatou te le faamalosi e tepa ae i lo tatou Atua; e fiafia foi i tatou afai e faapea e mafai ona tatou poloai atu i maa ma mauga ia pauu i luga ia te i tatou e natia ai i tatou i ona luma.
“A e peitai, e le mafai ona faapea, a e ao lava ina tatou o atu ma tutu i ona luma i lona pupula, ma lona mana, o lona malosi foi, ma lona mamalu, ma lana pule, ma tautino atu e oo i lo tatou faamaina e le iu, ua tonu ana faamasinoga uma; ma ua amiotonu ia i ana galuega uma, ma ua finagalo alofa o ia i le fanauga a tagata, ua ia te ia foi le mana uma e faaola ai tagata uma o e faatuatua i lona suafa ma fua mai i galuega e tatau ma le salamo” (Alema 12:14–15).
Ina ua faamanino mai e le Faaola Lana talalelei, sa totonugalemu ai lenei faamasinoga. Na Ia saunoa:
“Faauta, ua ou tuuina atu ia te outou la’u tala lelei, o le talalelei lenei ua ou tuuina atu ia te outou—na ou sau i le lalolagi e fai le finagalo o lo’u Tama, aua na auina mai a’u e le Tama.
“Na auina mai au e le Tama, ina ia siitia au i luga o le satauro; ina ua uma ona siitia a’u i luga o le satauro, ia tosina mai tagata uma ia te au, e pei ona siitia au e tagata e faapea ona siitai tagata e le Tama, ina ia laulaututu i o’u luma, ia faamasinoina ai ia latou galuega pe lelei, pe leaga—
“Ona o lenei lava mea ua siitia ai a’u; o lea foi, e tusa ma le mana o le Tama, ou te tosina mai ai tagata uma ia te au, ina ia faamasinoina i latou e tusa ma a latou lava galuega” (3 Nifae 27:13–15).
Ioe o le “siitia i luga o le satauro”, o se auala faafaatusa o le faatatau atu i le Togiola a Iesu Keriso lea na Ia faamalieina ai poloaiga e ono tuuina mai e le faamasinoga tonu ia i tatou taitoatasi. I nisi faaupuga, o Lona puapuagatia ma le maliu i Ketesemane ma i luga i Kolokota, ua Ia totogiina ai mea uma e ono poloaiina e le faamasinoga tonu mai ia i tatou mo a tatou agasala. O lea la e tu ai o Ia i le nofoaga o le faamasino tonu ma o le tagata o le faamasino tonu. E pei lava o le Atua o le alofa, o le Atua foi e tonu. O a tatou aitalafu ma tiute ua o atu nei ia Keriso. O le mea lea, o Ia lava, ua i ai le aia tatau e faamasino ai i tatou.
O lena faamasinoga, sa Ia fetalai ai, e faavae i a tatou galuega. O le “tala fou [faapitoa] e fiafia ai” o Lana talalelei o Lona ofoina mai lea o le meaalofa o le faamagaloga pe afai tatou te salamo. O le mea lea, afai o a tatou galuega e aofia ai le galuega o le salamo, Na te faamagaloina a tatou agasala ma mea sese. Afai tatou te teena le meaalofa o le faamagalo, ma le manao e salamo, ona faamalosia lea o faasalaga o le faamasinoga tonu lea ua fai ai o Ia ma sui. Na fetalai o Ia, “Aua faauta, o a’u le Atua, na puapuagatia i nei mea mo tagata uma, ina ia latou le puapuagatia pe afai latou te salamo; a e peitai, afai latou te le salamo, e ao ina latou tiga e pei o a’u” (MFF 19:16–17).
O le mea lea, o le manatua pea o Ia, o lona uiga tatou te manatua i taimi uma e leai se mea e natia mai ia te Ia. E leai se vaega o o tatou olaga, po o amioga, upu, e oo foi i mafaufauga, e mafai ona natia mai le silafia e le Tama ma le Alo. E leai se kopi i se suega, leai se tulaga o le gaoi, leai ni faamemelo i tuinanau po o tuinanauga, ma e leai se pepelo e misia, lē iloaina, natia, pe galo. Po o le a lava le mea tatou te “sao mai ai” i le olaga pe mafai foi ona natia mai isi tagata, e tatau lava ona tatou toe faafesagai pe a oo mai lena aso tuupoina lea e sii ae ai i tatou i luma o Iesu Keriso, le Atua o le faamasino mama ma le atoatoa.
O lenei mea moni sa fesoasoani e faamalosia ai au i ni taimi eseese, a le o le ia salamo po o le aloese atoa mai le agasala. I se tasi mea na tupu e faatatau i le faatauina atu o se fale, sa i ai se sasi i faamatalaga sa tusipepaina, ma sa ou oo i se tulaga ou te mauaina faaletulafono mai ai se tupe faasili mai le tagata na faatauina le fale. Sa fesili mai lo’u sui sa nafa ma le faatautaia o le faatauina o le fale pe sa ou manao e tuu le tupe aua o la’u aia lea e tuu ai. Sa ou mafaufau lava i le faafesagai ai ma le Alii, le tamalii o le faamasinoga tonu, ma taumafai ai e faamatala atu i ai sa ou maua lava le aia tatau faaletulafono e tuu ai ona o se mea sese a le tagata na faatauina. Sa le mafai ona ou faatalitonuina a’u lava, ae maise atonu o le a ou talosaga atu mo le alofa mutimutivale i le taimi lava lena. Sa ou iloaina e le mafai ona aluese ma a’u ia lagona pe ana ou le faamaoni ma tuu le tupe. Sa ou tali atu i lo’u sui o le a matou o pea i le faafetauaiga e pei ona matou malamalama uma ai i le amataga. E tele atu se taua ia te au nai lo soo se aofaiga o se tupe, le iloa e leai se mea ou te salamo ai e uiga i lena faafetauaiga.
I lo’u talavou sa i ai se taimi sa ou faatamala ai i se auala na mafua ai se manuaga mitimiti i se tasi o o’u uso. Ou te lei ioe i lo’u faavalevalea i lena taimi, ma e leai se isi sa iloaina lo’u aafia ai i lena tulaga. O tausaga mulimuli ane, sa ou tatalo ina ia faaali mai ia te au e le Atua soo se mea i lo’u olaga sa manaomia ona ou faasa’oina ina ia mafai ona taliaina lelei au i Ona luma, ma sa faapea ona oo mai lenei mea na tupu i lo’u mafaufau. Sa galo ia te au, ae sa musumusu mai le Agaga o se solitulafono lenei e lei faaleleia. Sa manaomia ona ou ta’uta’u atu. Sa ou telefoni atu i lo’u uso, faatoese i ai, ma talosagaina lana faamagaloga, lea sa vave lava ona ia tuuina mai ma le agalelei. Na semanu e itiiti lo’u maasiasi ma lo’u faanoanoa pe ana ou faatoese ia te ia i le taimi na tupu ai le faalavelave.
Sa manaia ma taua ia te au le lei faagaloina e le Atua o lena mea na tupu i se taimi ua leva e ui lava ina sa galo ia te au. E le mafai e agasala ona faaleleia i latou lava pe faapea foi e mou ese lava i latou. E le faapea foi e “tafi ma nana i lalo o se fala” i le tulaga faavavau o mea. E tatau lava ona taulimaina, ma o le mea e manaia ai, ona o le togiola alofa a le Faaola, e mafai ai ona taulimaina i se auala e sili atu le fiafia ma tau le tiga nai lo le faamalieina o poloaiga a le faamasinoga tonu e i tatou lava.
E tatau foi ona tatou manatua pe a mafaufau i se faamasinoga e leai se mea e misi i le vaai, aua o lona uiga foi, e leai se amioga usiusitai, leai se agalelei, leai se galuega lelei e tusa lava pe o le a le itiiti, e faagaloina, ma e leai se faamanuiaga e faatatau i ai e taofia ai.
3. Aua le fefe ma vaai atu i le Faaola mo se fesoasoani.
I aso popofou o le Toefuataiga, na fautuaina ai ma faamafanafanaina ai e Iesu ia Iosefa Samita ma Oliva Kaotui, o e sa galulue i le faaliliuina o le Tusi a Mamona, ma o e o le a le toe umi ae tuuina mai le perisitua i o laua luga. O Iosefa sa 23 ona tausaga i le taimi lea, ae o Oliva sa 22. Sa tele sauaga ma isi faalavefau na tasoo pe sa i ai e le aunoa. I nei tulaga, ia Aperila 1829, sa fetalai mai ai le Alii i upu nei ia i laua:
“Aua le matatau, le lafu mamoe itiiti e; ia faia mea lelei; ia tuu i le lalolagi ma seoli e autasia oulua, aua afai ua faavaeina oulua i luga o la’u papa, latou te le mafai ona manumalo.
“Faauta, ou te le tausalaina oulua; o ia i o oulua ala ma aua le toe agasala; ia fai ma le faautauta le galuega na ou poloaiina ai oulua.
“Ia faalagolago ia te au i manatunatuga uma; aua le masalosalo, aua le fefe.
“Ia matau lelei i manua na tuia ai lo’u itu, ma tulaga fao foi na tutui ai ou lima ma ou vae; ia faamaoni, tausi i au poloaiga, ma o le a mau tofi oulua i le malo o le lagi. Amene” (MFF 6:34–37).
O le vaai atu i le Faaola i mafaufauga uma, e moni, o le isi lea auala e fai atu ai ia “manatua pea o ia.” A o tatou faia, e le tatau ai ona tatou masalosalo pe matatau. Sa faamanatu mai e le Faaola ia Iosefa ma Oliva e pei ona Ia faamanatu mai ia i tatou, e ala mai i Lana Togiola, ua tuuina atu uma ia te Ia mana o le lagi ma le lalolagi (tagai i le Mataio 28:18) ma ua i ai uma foi le gafatia ma le finagalo e puipui i tatou ma tali mai i o tatou manaoga. E tau lava o lo tatou faamaoni, ae e mafai ona tatou faalagolago atoa atu ia te Ia.
Na muamua atu i le faaaliga faamafanafana ia Iosefa ma Oliva, sa onosaia ai e le Perofeta se aafiaga faamomoiloto ma le tiga, lea sa ia aoao ai e vaai atu i le Faaola ae aua le fefe i manatu, uunaiga, ma taufaamatau a tagata.
Ia Iuni 1828 na faatagaina ai e Iosefa ia Matini Harisi e ave ia uluai itulau e 116 o le kopi o le Tusi a Mamona mai Heremoni, Penisilevania, e faaali atu i tagata o lona aiga i Palamaira, Niu Ioka. Ina ua le toe foi mai Matini e pei ona sa ia tautino ai, sa malaga atu loa Iosefa atuatuvale e ala i se taavale solofanua i le fale o ona matua i Maniseta Township, Niu Ioka. Sa faataalise ona feau atu e le Perofeta ia Matini. Ina ua taunuu ane Matini, sa ia tau sa’o ane sa lei ia te ia ia kopi pe iloa foi le mea o i ai.
Sa alaga Iosefa: “Oi! Lo’u Atua e, lo’u Atua e. … Ua leiloa mea uma, ua leiloa. O le a le mea o le a ou fai? Ua ou agasala. O au lava na tofotofoina le toasa o le Atua i lo’u fesili atu ia te ia mo le mea e le i ai sa’u aia ou te fesili ai. … O le a se aoaiga o le a le talafeagai mo a’u mai le agelu mai le Silisili Ese?”
O le aso na sosoo ai na toe foi ai le Perofeta i Heremoni. O le taimi lava na taunuu ai, fai mai o ia, “Na amata ona ou faamaualalo au lava i le tatalo faatauanau i luma o le Alii … a fai e mafai ou te fia mauaina le alofa i ona aao ma maua ai se faamagaloga o mea uma lava ua ou faia e le tusa ai ma lona finagalo.”2
Ina ua uma ona aoaiina Iosefa ona ua sili lona fefe i tagata nai lo le Atua, sa fetalai atu le Alii ia te ia:
“Faauta, o oe o Iosefa, ma na filifilia oe e faia le galuega a le Alii, peitai ona o solitulafono, afai e te le faaeteete o le a e pau.
A e manatua, e alofa mutimutivale le Atua; o le mea lea, ia salamo ai i lena mea ua e faia ua le tusa ma le poloaiga lea na ou tuuina atu ia te oe, ma ua filifilia pea oe, ma ua toe valaauina i le galuega” (MFF 3:9–10).
“Mo sina taimi, na aveesea ai e le Alii le Urima ma le Tumema faapea ma papatusi mai ia Iosefa. Ae e lei umi ae toefuatai mai e le alii nei mea ia te ia. ‘Na olioli le agelu ina ua ia toe tuuina mai ia te au le Urima ma le Tumema,’ o le tala lea a le Perofeta, ‘ma faapea mai ua fiafia le Atua i lo’u faatuatua ma lo’u lotomaualalo, ma alofa mai ia te au ona o lo’u faamaoni ma lo’u filiga i le tatalo, lea na matua lelei ai ona ou faataunuuina ou tiute ma … mafai ai ona toe amatalia le galuega o le faaliliuga.’ A o agai i luma Iosefa i le galuega taua ua tuuina mai ia te ia, ua faamalosia nei o ia i faalogona lelei o le mauaina o le faamagaloga a le Alii faatasi ai ma se naunautaiga faafouina ina ia faia Lona finagalo.”3
O le naunautaiga o le Perofeta e faalagolago i le Atua ae le o le fefe i mea e ono fai e tagata sa faapea ona faamausaliina ina ua mavae lenei aafiaga. O lona soifuaga mulimuli ane sa o se faataitaiga pupula o le uiga o le manatua o Keriso e ala i le faalagolago i Lona mana ma le alofa mutimutivale. Sa faailoa atu e Iosefa i upu nei lenei malamalamaaga i le taimi e sili ona faigata ma tofotofoina na faafalepuipuiina ai i Liperate, Misuri:
“Tou te iloa, uso e, e fesoasoani lava le foeuli laitiiti i se vaa tele lava i le taimi o se afa, i le faasaga tonu ai i le matagi ma peau.
“O lea, uso pele e, sei tatou faia ma le fiafia mea uma o loo i ai i lo tatou mana; ona mafai ai lea i tatou ona tumau lava ma le mautinoa mausali, e vaavaai atu i le faaolataga o le Atua, ma le faaalia o lona aao” (MFF 123:16–17).
A faapuupuu, o le ia “manatua pea o ia” o lona uiga ia tatou le ola i le matatau. Ua tatou iloa o luitau, faanoanoaga, ma le faavauvau o le a oo mai ia i tatou i ni auala eseese, ae ua tatou iloa foi i le iuga, ona o lo tatou Fautua paia, e mafai ai ona galulue faatasi mea uma mo lo tatou lelei (tagai i le MFF 90:24; 98:3). O le faatuatua lea na faigofie ona faamatalaina e Peresitene Gordon B. Hinckley (1910–2008) pe a ia saunoa, “O le a lelei mea uma.”4 A tatou manatua pea le Faaola, e mafai ona tatou “faia ma le fiafia mea uma e mafai ona tatou faia,” ma talitonu o Lona mana ma lona alofa ia i tatou o le a mafai ai ona tatou faia.
Talosia ia tatou manatua pea o Ia—“ina ia [tatou] maua pea lona agaga e faatasi ma i [tatou]” (MFF 20:77). Ou te molimau atu i le mana o le Togiola a Iesu Keriso. Ou te molimau atu i le moni o le Alii soifua, toetu. Ou te molimau atu i le alofa e le iu ma le patino o le Tama ma le Alo mo i tatou taitoatasi, ma ou te tatalo ia faapea ona tatou ola e le aunoa e manatua lena alofa i ona faatinoga uma.
Ou te Tuuina Atu ia te Outou le Manuia, saunia e Walter Rane, faaaloaloga a le Falemataaga o Talafaasolopito a le Ekalesia; Falaoa ua Tofitofi, saunia e Walter Rane
O Keriso i Ketesemane, saunia e Heinrich Hofmann, faaaloaloga a C. Harrison Conroy Co.
O Le Afio Mai Faalua, saunia e Harry Anderson © IRI
Na Ia Faauuina Mata o le Tagata Tauaso, saunia e Walter Rane, faaaloaloga a le Falemataaga o Talafaasolopito a le Ekalesia