O Se Feagaiga E Faavavau
Pe a oo i faaiuga ua ou faia e avea o se vaega o se feagaiga ma se Tama Faalelagi alofa, e le afaina po o a tala a le lalolagi.
A o avea au ma se talavou, sa tuuina mai e lo matou peresitene o Tamaitai Talavou se meaalofa i tamaitai talavou taitoatasi: o se ata o le malumalu. Sa ia talanoa mai ia i matou e uiga i feagaiga ma le ola ai i ni olaga mama. Ona ia faamalosiau mai lea ia i matou e faatu se sini e o i le malumalu i se aso.
Sa ou teufatuina i lou loto le fautuaga a lenei tina ma filifili ai e avea ia tapenaga ma se mea e faamuamua. Sa leai se malumalu i Costa Rica i lena taimi, ae sa ou iloa mai lou papatisoga faatoa mavae le uiga o se feagaiga, ma sa ou tulimatai atu i se avanoa e osia ai ni feagaiga faaopoopo ma le Alii.
E leai ma se isi o lou aiga na avea ma se tagata o le Ekalesia i lea taimi, o lea e lei aoaoina ai le talalelei i totonu o lo matou aiga. Ae na ou filifili pea, e mafai ona ou aoao lava au e uiga i tulaga faatonuina o le talalelei ma mulimuli ai. O au tapenapenaga na aofia ai le auai i le seminare, e ui lava na faataunuuina i le taeao po. Na aofia ai ma le le mafai ona tafao faamasani seia atoa lo’u 16 tausaga. Ma o lona uiga o le ola ai i le tulafono o le legavia—e mautinoa lava e le o se mea e taatele pe masani ai le toatele o au uo, ae o se mea na ou iloa e mafai ona ou ou faia ona ua uma ona ma osi feagaiga ma le Alii o le a ou faia.
O le suesueina o tusitusiga paia e au lava ia ma i le seminare, ua faamalosia ai lau faaiuga e ola i se olaga mama aiai. Ou te manatua le musuia ai faapitoa o au e le autau talavou totoa e 2,000. E pei ona fai mai leAlema 53:20–21, o nei alii talavou, “ua matua totoa foi i le lototele ma le malosi atoa ma le atamai; a e peitai, faauta, ua le gata i lea—o tagata faamaoni i latou i aso uma, i mea uma ua tuuina atu ia te i latou. … O tagata faamaoni ma le faautauta i latou, aua ua aoaoina i latou e tausi i poloaiga a le Atua ma savavali ma le amio sao i ona luma.” Ou te fia faamaoni foi i mea ua tuuina mai ia te au, e aofia ai lau feagaiga o le papatisoga.
Na oo mai se malamalama faaopoopo o feagaiga ina ua valaauina au e auauna atu i le Misiona a El Salvador San Salvador i Sasae. Ina ua maua o’u faaeega paia i le malumalu, na oo mai i lou mafaufau le Mataupu Faavae ma Feagaiga 82:10 e faapea: “Ua noatia au le Alii pe a outou faia mea ua ou fai atu ai, ae pe a outou le faia mea ua ou fai atu ai, e leai sa outou folafolaga.” I lau misiona atoa, o lena manatu o feagaiga—o le faia o la tatou vaega ma le faia e le Alii o Lana vaega—na faaosofia ai au e faia le mea silisili ou te mafaia. A o ou faia la, sa faamanuiaina maua ma lau soa i la maua galuega.
Ua mavae atu le tele o tausaga o lau misiona, ae o loo faaauau pea ona ou maua le malosi mai le tausia o au feagaiga. Ua faamanuiaina foi au talu ona ou galue i le Malumalu o San José Costa Rica mo le fitu tausaga. I lau auaunaga o se tagata faigaluega o le malumalu, sa ou mauaina soo ni avanoa e manatua ai feagaiga na ou osia. Sa ou mauaina foi ni faamanatu tali tutusa i lau auaunaga i le faalapotopotoga a Tamaitai Talavou, lea sa ou taumafai ai e aoao atu le taua o feagaiga e pei foi ona aoao ai au e ou taitai.
O le tausiga o a tatou feagaiga e le faigofie ai pea. Mo se faataitaiga, e tele tagata latou te vaai i le tulafono o le legavia (po o, i nisi tulaga, o uiga faalelotu lautele) o se mea ua le o toe faaaogaina. Ae o le mea e lelei ai, ou te le o lagonaina se faamalosia mai ia i latou o e le talitonu i ou talitonuga pe mai le taimi ua alu. Sa ou toe tepa i tua i mea na ou lagonaina a o ou teine talavou pe a faamalosiau mai lo matou taitai ia i matou ia saunia ma ola mo feagaiga o le malumalu. O le faaiuga na ou faia i lena taimi lea o loo ou mulimulitai ai lava e oo mai i le aso.
E mafai ona ou tu mausali i au faaiuga aua e le o ni faaiuga na ou faia na o au, mo au lava ia. Ae o faaiuga na ou faia o se vaega o se feagaiga ma se Tama Faalelagi alofa. E le afaina po o le a le mea e tau mai e le lalolagi. Sa ou folafola atu i le Alii o le a ou usitaia Ana poloaiga. O se mataupu o le mamalu. O feagaiga na ou osia i le papatisoga ma feagaiga na ou osia i le malumalu o loo aoga pea i le aso e pei lava o le aso na ou osia ai. O se feagaiga ma le Atua e faavavau.
E le faigofie pea le ola ai i le ala ua faatonuina ai i tatou e le Atua tatou te ola ai, ae ou te molimau atu e mafai. E mafai ona tatou mauaina le toamalie ma le mana mai le ola ai i a tatou feagaiga, ma e mafai ai ona tatou mautinoa o le a le tuulafoaiina lava i tatou e le Tama Faalelagi. I Lona faatasi mai i lo tatou itu, ua mafai ai ona tatou faia mea uma lava (tagai i le Moronae 7:33).
O feagaiga na ou osia i le papatisoga ma feagaiga na ou osia i le malumalu o loo aoga pea i le aso e pei lava o le aso na ou osia ai.
Ata na tusia e Scott Greer