Mana o Tusitusiga Paia

Saunia e Adam C. Olson

Mekasini a le Ekalesia

Ina ua tuuina atu e ni talavou Tahiti se toalua se avanoa i tusitusiga paia, na suia o la olaga.

E le i manao moni lava Rooma e suesue tusitusiga paia. E le i manao moni foi Vaitiare e alu i le seminare. Ma e le manaomia foi lo la’ua faia. Ae ina ua la filifili e fai, na suia o la olaga.

Aisea e Leai Ai?

Aisea o le a filifili ai se talavou e faaalu se lua itula i po o Aso Tofi uma e suesue faatasi ai ma lona tina i tusitusiga paia? Atonu o se mafaufauga foi lea e tasi a Roma Teroatea o Tahiti i le tausaga ua mavae atu.

O le taimi nei atonu e na te fesili pe aisea o le a filifili ai se talavou e le faia.

I le tolu tausaga o le seminare, sa lei manatu mamafa moni lava Rooma pe a tuu atu e ona faiaoga mau faatonuina e faitau mo le isi lesona. “Ou te le i fia faitauina,” o lana tala lea. “E le i osofaia moni lava au e mau.”

Ae na ia mafaufau pe aisea e faaaoga soo ai ia mau e taitai o le Ekalesia o lana uarota ma le siteki ia latou lauga ma lesona. Sa ia mataituina ona taitai. Sa ia iloaina le faigofie tele mo lana peresitene o le siteki e sii mai mau mai tusitusiga paia.

O lea la ina ua vaevaeina e le Siteki a Faaa i Tahiti tamaiti o le seminare i ni au e fai ai le suegamau i le faagasologa o lona tausaga mulimuli i le seminare, na filifili loa Rooma e tuu atu se avanoa i tusitusiga paia.

O le amataga lena o lana vasega suesue faalevaiaso ma lona tina. O po o Aso Tofi uma lava la te suesue faatasi ai mo le tauvaga a le vasega i le aso e sosoo ai, i le aoaoina po o fea o i ai fuaiupu taua ma e oo lava i le taulotoina o le tele o na fuaiupu.

Ma o iina na amata ai ona i ai se suiga ia Rooma. Na faamalosia e suesuega faatusipaia la la’ua sootaga ma lona tina. Na amata ona ia vaaia le ogatasi o mea o loo aoao mai e tusitusiga paia ma mea o loo tutupu i le lalolagi i aso nei. Ao ia tatalo e uiga i mea na ia faitau i ai, na ia iloa e a le Atua ia.

Na fesoasoani foi ia te ia e taitaia lana au i le manumalo i le suega siamupini o suega mau a le siteki.

Na vaaia e Rooma i faamanuiaga na ia mauaina se lesona na ia aoaoina i ana suesuega. “I le Mosaea 2:24 na aoao mai le Tupu o Peniamina pe afai tatou te filifili e fai le mea ua poloai mai ai le Alii, ua faamanuiaina loa lava i tatou,” o le tala lea a Rooma. O se tasi o faamanuiaga sili ua ia maua “ina ua mae’a ona suesueina ia tusitusiga paia i lenei tausaga, ua ou iloa e moni le Tusi a Mamona.”

Aua Le Tau Maia Ia Te Au Le Mea e Fai

I le amataga o le tausaga faaleaoga, e lei auai Vaitiare Pito i le Ekalesia. O lea la pe na faapefea ona fesoasoani se tagata fou o le ekalesia e lei seminare muamua i le manumalo o lana au i le suega siamupini o suega mau a le siteki a Faaa?

“Ou te le i popole i le le tele o so’u poto masani,” o lana tala lea. “Na ou aoaoina le tele o na mau a o fai au lesona faafaifeautalai.”

O le toatele o le aiga o Vaitiare na liliu mai i le Ekalesia ina ua maliu faafuasei lona tama ma na aumai e le taitai misiona a le uarota ia faifeautalai i le fale o Vaitiare. Na latou talanoa e uiga i le lotogatasi o le aiga ma le faatasia e faavavau. “Na matua aumaia ai se suiga i lo matou aiga,” o lana tala lea.

Peitai, e lei suia ai uiga fia saoloto o le 17-tausaga. “Ina ua uma ona ou papatiso, fai mai tagata ia te au e tatau ona ou alu i le seminare,” o lana tala lea. “Ou te le fiafia i le faatonu mai o au i le mea e fai, o lea na fai ai sina umi faatoa ou alu.”

Na iu lava ina ia filifili lava ia e alu ma iloa ai e na te fiafia i ai. Sa tofia o ia e avea ma se vaega o le au lava lea e tasi o le suega mau lea e i ai Rooma.

E lei i ai sana taumafaiga i le taimi muamua lava e faitau mau ia na faatonu mai. Ae ina ua ia filifili o le a ia faia, na vave ona ia iloaina nisi o faamanuiaga

“Na matua tele le fesoasoani o mau,” o lana tala lea. “Ua ou aoao mai mau le tele o mea,” e aofia ai le taua o le tatalo ma o le a tali mai le Tama Faalelagi i na tatalo.

Na ia aoao foi afai e na te filifili e tautino atu i se mea, e pei o le alu i le seminare po o le faitauina o tusitusiga paia, e sili atu le faigofie o le tausia o le tautinoga nai lo lona faia ona e tatau ai pe ona e “manaomia” ona ia faia.

O lenei la ua maea le tausaga faaleaoga, ua faafetai Vaitiare na ia filifili e alu i le seminare ma suesue i tusitusiga paia: “Ou te iloa a tatou faitau i tusitusiga paia, e faamanuiaina i tatou.”

Ina ua malaga Rooma Teroatea (lalo) ma ana uo seminare i nuu tuaoi o Moorea (agavale) e suesue lo latou malamalamaaga i tusitusiga paia, e le i taua le taunuuga—ua leva lava ona manumalo Rooma.

O le taimi lava na filifili ai Vaitiare Pito o Tahiti e suesue tusitusiga paia, na amata ai ona ia iloaina faamanuiaga.