Mai le Misiona
O Le Faaiteite i Lo’u Faamanuiaga
Sa ou auauna atu i le Misiona a Texas Houston i Saute i le gagana Sipaniolo. I se tasi aso sa ma tuitui ai ma lau soa i faitotoa, ma taumafai e saili se tasi e aoao. Sa ma oo atu i se fale o loo i ai se pu tele lava i le poletito laupapa, ua pala.
Na tatala le faitotoa e se tina ua matua ma valaaulia i maua i totonu. Ou te lei mautinoa pe na ia iloaina moni po o ai i maua ma le mea o loo ma faia, ae sa matuai faaaloalo lava o ia. Na amata ona ma aoaoina o ia i le lesona muamua, ma na sologa lelei mea uma. E lei leva ae oo i lo’u taimi e aoao atu ai e uiga ia Iosefa Samita ma le Uluai Faaaliga. Sa ou matauina le faaalia o le le mautonu o foliga vaaia o le tina. Sa manino lava lona le malamalama i mea sa ou taumafai e faamatala atu ia te ia.
Ina ua maea ni nai fesili e uiga i mataupu ua uma ona matou talanoaina ma po o le a le tele o loo malamalama ai, na amata ona ou lagonaina lou atuatuvale ona o lona le malamalama i le mataupu o le Uluai Faaaliga. Sa umi tele lena aso, ma o se mea mulimuli lava e manaomia e se faifeautalai o se tagata ae le malamalama i le mea o loo ia matua manao lava ia iloa e tagata e moni.
Na faafuasei ona ou faalogoina i ou lagona le amata ona suia i le ita, ma na ou manatuaina se tamai fasi fuaitau mai lou faamanuiaga faapeteriaka. O se vaega e uiga i lou aiga i le lumanai lea na fautuaina au ia aoao lau fanau i le lumanai i mataupu o le talalelei. Ao faasolo i lou mafaufau lena parakalafa, na ou iloaina le tau mai e le Agaga ia te au ia aoao lenei tina lotomaualalo i le auala lava lea o le a ou aoao ai se tamaitiiti.
Na amata ona ou aoaoina o ia i se auala e sili ona faigofie ma le alofa. Na ou vaai faalemafaufau i lau lava fanau o nonofo faataamilo i le potu malolo ma tilotilo mai i luga ia te au, lo latou tama, a o ou aoaoina i latou e uiga i le Perofeta o Iosefa Samita. Sa ofoofogia le vaaia o le suiga i ona foliga. Na vave ona atoatoa lana pupula, ma amata ona susulu mai ona mata. O lana pupula le mautonu na liua i le fiafia ma le ofo. A o ou faamatalaina le tala i le faaali mai o le Tama Faalelagi ma Iesu Keriso ia Iosefa Samita, na faatumulia ona mata i loimata ma tafe ifo i ona alafau. Na faatumulia le potu i le Agaga, ma na liua lou atuatuvale i le olioli sili.
O le a le galo lava ia te au lenei aafiaga. O lea la ua ou tau le mafai ai ona faatali e aoao atu na lava mataupu faavae i la’u fanau i se aso ma toe lagonaina lena olioli sili.
Ata na tusia e Brian Call