Hupot ngadto sa mga Pakigsaad
Samtang kita adunay hugot nga pagtuo diha ni Kristo ug naghupot ngadto sa atong mga pakigsaad, atong madawat ang kalipay nga gipamulong diha sa balaan nga mga kasulatan ug gisaad pinaagi sa atong mga propeta sa ulahing mga adlaw.
Ipataas ang imong kasingkasing ug paglipay, ug hupot ngadto sa pakigsaad nga ikaw mihimo.”1 Dili nako mabasa kining kasulatan nga dili mobati og kalipay. Nagmaya ang akong kasingkasing samtang naghunahuna ko sa mga saad ug sa daghang mga panalangin nga nahimong kabahin sa akong kinabuhi samtang naningkamot ko sa paghupot ngadto sa mga pakigsaad nga akong gihimo ngadto sa Langitnong Amahan.
Tungod kay ang akong mga ginikanan namatay na, importante nga niining tuiga sa paglimpyo sa ilang panimalay aron andamon kini nga mabaligya. Niining milabayng pipila ka bulan, samtang ang akong mga igsoon ug ako nanglimpyo ug nanghapnig sa panimalay sa akong mga ginikanan, nakit-an namo ang mga kasaysayan sa pamilya ug daghang importanting mga papeles ug mga dokumento. Nahimong madanihon ang pagbasa sa personal nga mga kasaysayan ug sa patriyarkal nga mga panalangin sa akong mga ginikanan ug mga apohan. Napahinumduman ko sa mga pakigsaad nga ilang gihimo ug gihuptan.
Ang akong apohang babaye nga si Ellen Hanks Rymer usa ka batan-ong inahan niadtong 1912 sa dihang iyang nadawat ang iyang patriyarkal nga panalangin. Sa diha nga akong gibasa ang iyang panalangin, kini nga mga linya mipatigbabaw ug mipabilin sa akong hunahuna. “Ikaw gipili gikan sa wala pa ang katukuran sa yuta, ug usa ka pinili nga espiritu nga motungha niining adlawa. … Ang imong pagpamatuod mapadako ug ikaw makahimo sa pagpamatuod. … Ang tiglaglag naningkamot sa paglaglag kanimo, apan kon ikaw mohupot ngadto sa imong Dios, siya [ang tiglaglag] dili makabaton og gahum sa pagdaut kanimo. Pinaagi sa imong pagkamatinud-anon ikaw makabaton og dakong gahum ug ang tiglaglag mopalayo gikan kanimo tungod sa imong pagkamatarung … Kon ang takna sa kahadlok ug mga pagsulay moabut kanimo kon ikaw motago aron mag-ampo ang imong kasingkasing pagahupayon ug ang mga kalisud mawala.”2
Ang akong apohan nga babaye gisaaran nga kon siya mohupot sa iyang mga pakigsaad ug mopaduol sa Dios, si Satanas dili makabaton og gahum batok kaniya. Makaplagan niya ang kahupayan ug panabang sa iyang mga pagsulay. Kini nga mga saad natuman diha sa iyang kinabuhi.
Karong adlawa buot akong mosulti mahitungod sa (1) importansya sa paghupot ngadto sa mga pakigsaad ug (2) kalipay ug proteksyon nga moabut tungod sa paghupot ngadto sa atong mga pakigsaad.
Ang pipila sa mga ehemplo nga akong gamiton magagikan sa Anak nga mga Babaye sa Akong Gingharian: Ang Kasaysayan ug Buhat sa Relief Society. Ang basahon puno sa mga ehemplo sa kababayen-an kinsa nakakaplag og dakong kalipay diha sa paghupot ngadto sa mga pakigsaad.
Ang Importansya sa Paghupot ngadto sa mga Pakigsaad
Ang Bible Dictionary nagsulti nato nga ang usa ka pakigsaad maoy usa ka kontrata nga gihimo tali sa Dios ug sa tawo. “Ang Dios sumala sa iyang kaayo naghan-ay sa mga kasabutan, diin gidawat sa tawo… . Ang ebanghelyo gihan-ay sa ingon aron ang mga baruganan ug mga ordinansa pagadawaton pinaagi sa pakigsaad nga magbutang sa tigdawat ubos sa dakong obligasyon ug responsibilidad sa pagtahud sa pasalig.”3 Sa hugpong sa mga pulong nga “hupot ngadto sa mga pakigsaad,” ang pulong hupot nagpasabut og “lig-on ug hugtanong magpabilin” ngadto sa usa ka butang.4
Sa mga kasulatan atong nailhan ang mga lalaki ug mga babaye kinsa nakahimo og mga pakigsaad ngadto sa Dios. Ang Dios naghatag og mga panudlo kon unsay buhaton sa pagtahud niadtong mga pakigsaad, ug dayon samtang kadto nga mga pakigsaad gihuptan, ang gisaad nga mga panalangin nagsunod.
Sama pananglit, pinaagi sa ordinansa sa bunyag, naghimo kita og pakigsaad ngadto sa atong Langitnong Amahan. Nag-andam kita sa atong kaugalingon alang sa bunyag pinaagi sa pagbaton og hugot nga pagtuo diha ni Ginoong Jesukristo, naghinulsol sa atong mga sala, ug nagpakaandam sa pagdala diha kanato sa pangalan ni Kristo. Naghimo kita og pasalig sa paghupot sa mga sugo sa Dios ug sa paghinumdom sa Manluluwas kanunay. Nakigsaad kita sa “pagtambayayong sa usag usa nga mga alantuson, nga sila mahimo nga magaan.” Nagpakita kita nga andam sa pagbangutan uban niadtong nagbangutan ug sa paghupay niadtong nagkinahanglan sa kahupayan.5
Sa balaan nga mga templo ang uban nga sagradong mga ordinansa dawaton ug ang uban nga mga pakigsaad himoon. Sa unang mga adlaw sa Pagpahiuli, si Propeta Joseph Smith matinguhaon alang sa mga Santos nga makabaton sa gisaad nga mga panalangin sa templo. Ang Ginoo miingon, “Himoa kini nga balay nga matukod ngadto sa akong ngalan, aron Ako mopadayag sa akong mga ordinansa diha niini ngadto sa akong mga katawhan.”6
“Usa sa mga katuyoan sa Ginoo sa pag-organisar sa Relief Society mao ang pag-andam sa Iyang anak nga mga babaye alang sa mas dagko pang panalangin sa priesthood nga anaa sa mga ordinansa ug mga pakigsaad sa templo. Ang … mga sister sa Nauvoo nagpaabut sa pagkahuman sa templo uban ang tumang kahinam, kay sila nasayud, sigon sa gisaad ni Propeta Joseph Smith kang Mercy Fielding Thompson, nga ang endowment modala kanila ‘paggawas sa kangitngit ngadto sa hilabihang kahayag.’”7
“Kapin sa 5,000 ka mga Santos ang nagdasok sa Templo sa Nauvoo human sa pagpahinungod niini aron madawat nila ang endowment ug ordinansa sa pagbugkos sa dili pa mobiya alang sa ilang biyahe” ngadto sa Salt Lake Valley.8 Si Presidente Brigham Young ug daghang mga lider sa Simbahan ug mga nagtrabaho sa templo mihatag sa ilang panahon, adlaw ug gabii, sa pagserbisyo diha sa templo aron kining importanting buhat mapahigayon alang sa mga Santos.
Ang atong mga pakigsaad nagpatunhay kanato sa maayong mga panahon o sa malisud nga mga panahon. Si Presidente Boyd K. Packer mipahinumdom kanato nga “kita mga tawo sa pakigsaad. Kita nakigsaad sa paghatag sa atong mga kapanguhaan sa panahon ug panalapi ug talento—tanan kon unsa kita ug tanan nga atong gipanag-iya—ngadto sa kaayohan sa gingharian sa Dios dinhi sa yuta. Sa yano nga mga pulong, kita nakigsaad sa pagbuhat og maayo. Kita mga tawo sa pakigsaad, ug ang templo mao ang sentro sa atong mga pakigsaad. Kini mao ang tinubdan sa pakigsaad.”9
Ang mga kasulatan nagpahimangno kanato, “Ug kini mahimo nga atong pakigsaad—nga kita maglakaw diha sa tanan nga mga ordinansa sa atong Ginoo.”10
Dagko ang mga panalangin nga atong madawat samtang kita naghupot ngadto sa atong mga pakigsaad.
Kalipay ug Proteksyon Moabut tungod sa Atong Paghupot sa mga Pakigsaad
Diha sa Basahon ni Mormon atong mabasa ang wali ni Haring Benjamin. Gitudloan niya ang katawhan mahitungod ni Jesukristo, nga Siya moanhi sa yuta ug moantus sa tanang matang sa mga kasakit. Gitudloan niya ang katawhan nga si Kristo moula alang sa mga sala sa tanang katawhan ug nga ang Iyang pangalan mao lamang ang pangalan diin ang tawo makaangkon og kaluwasan.11
Human maminaw niining maanindot nga mga pagtulun-an, ang katawhan nahimong mapainubsanon ug naninguha sa ilang tibuok kasingkasing nga maluwas gikan sa sala ug mahimong putli. Sila naghinulsol ug mipadayag sa ilang hugot nga pagtuo diha ni Jesukristo. Sila mihimo og mga pakigsaad ngadto sa Dios nga sila mosunod sa Iyang mga sugo.12
“Ang Espiritu sa Ginoo midangat diha kanila, ug sila napuno sa hingpit nga kalipay, ingon nga nakadawat og usa ka kapasayloan sa ilang mga sala, ug nagbaton og kalinaw sa ilang tanlag, tungod sa naghingapin nga hugot nga pagtuo diin sila aduna diha kang Jesukristo.”13
Lain nga ehemplo sa kalipay nga naggikan pinaagi sa pagkamatinud-anon sa pagsunod sa mga sugo sa Dios ug sa pagpakigbahin sa Iyang ebanghelyo ngadto sa uban gipakita ni Ammon. Si Ammon ug ang iyang mga igsoon nahimong mga instrumento sa pagtabang sa liboan ka mga tawo sa pagduol ngadto kang Kristo. Kini ang pipila sa mga pulong nga gigamit ni Ammon sa paghulagway sa iyang mga pagbati samtang daghan nga mga tawo ang gibunyagan ug mihimo og mga pakigsaad ngadto sa Dios:
“Unsa ka dako ang katarungan nga kita maglipay.”14
“Ang akong hingpit nga kalipay napuno, oo, ang akong kasingkasing tugob sa hingpit nga kalipay, ug ako maglipay diha sa akong Dios.”15
“Ako dili makasulti sa kinagamyan nga bahin sa akong gibati.”16
“Wala pay mga tawo nga adunay dako kaayo nga katarungan sa paglipay sama kanato.”17
Ang paghimo ug paghupot og sagrado nga mga pakigsaad naghimo kanato sa pagbaton sa Balaang Espiritu uban kanato. Kini mao ang Espiritu nga “mopuno sa imong kalag uban sa hingpit nga kalipay.”18
Ang Ikaduhang Gubat sa Kalibutan nakaingon sa hilabihang pag-antus sa daghan nga mga tawo sa tibuok kalibutan. Ang mga Santos sa Germany misagubang og daghan nga mga pagsulay. Usa ka matinud-anon nga presidente sa Relief Society didto sa Stuttgart, Germany, mao si Sister Maria Speidel. Sa paghisgot sa ilang mga pagsulay, siya miingon: “Ang among pagsalig sa Ginoo ug among pagpamatuod sa iyang Simbahan nahimo nga among haligi sa kusog. … Uban sa kamaya among gikanta ang mga kanta sa Zion ug mibutang sa among pagsalig diha sa Ginoo. Maayo niya nga pagkahimo ang tanang butang.”19
Pag-usab, sa diha nga ang mga miyembro mihupot sa ilang mga pakigsaad, ilang gibati ang kalipay bisan nagsinati og makalilisang nga mga hagit.
Si Sarah Rich usa ka matarung nga babaye nga nagpuyo sa Nauvoo kinsa gitawag sa pagserbisyo diha sa templo sa wala pa ang mga Santos papahawaa gikan sa siyudad. Kini ang iyang mga pulong mahitungod sa mga panalangin sa mga pakigsaad sa templo: “Daghang panalangin ang among nadawat sa balay sa Ginoo, nga nakahatag kanamo og kalipay ug kahupayan taliwala sa tanan namong kasub-anan ug nakahatag kanamo og hugot nga pagtuo sa Dios, nahibalo nga Siya mogiya kanamo ug mosuporta kanamo sa wala pa mahibaloi nga biyahe nga nagpaabut kanamo sa unahan.”20
Sa sinugdan nahuman sa mga Santos ang Templo sa Kirtland, ug daghan ang miapil sa pagpahinungod. Human sa pagpahinungod, ang templo gidawat sa Ginoo. Ang Ginoo misulti kanila nga “malipay sa hilabihan sa sangputanan sa mga panalangin nga ibu-bu … diha sa mga ulo sa [Iyang] mga katawhan.”21
Samtang nagkadaghan pang balaang mga templo ang gitukod sa tibuok kalibutan, akong nakita ang mga panalangin nga miabut sa kinabuhi sa mga miyembro. Niadtong 2008 nasaksihan nako ang kalipay sa mga nawong sa usa ka magtiayon gikan sa Ukraine samtang giasoy nila kanako ang mahitungod sa pag-adto sa Freiberg, Germany, aron sa pagdawat sa ilang mga ordinansa sa templo. Ang pagbiyahe ngadto sa templo mokabat og 27 ka oras matag biyahe sa bus alang niining mapahinunguron nga mga miyembro, ug sila dili makahimo sa pag-adto kanunay. Hilabihan ang ilang kalipay nga ang Templo sa Kyiv Ukraine sa dili madugay mahuman na ug sila makahimo na sa pagtambong kanunay. Kana nga templo abli na karon, ug liboan ang nagpahimulos sa mga panalangin didto.
Sa pagbasa gikan sa personal nga kasaysayan sa akong apohan nga babaye, akong nahibaloan ang iyang dako nga kalipay diha sa iyang mga pakigsaad. Ganahan siya nga moadto sa templo ug sa pagpahigayon sa mga ordinansa alang sa liboan ka mga tawo kinsa namatay na. Kini mao ang misyon sa iyang kinabuhi. Miserbisyo siya isip usa ka temple worker sulod sa kapin sa 20 ka tuig diha sa Templo sa Manti Utah. Misulat siya nga siya nakasinati og daghang milagrosong mga pagpang-ayo aron iyang mapadako ang iyang mga anak ug aron sa pagserbisyo sa uban pinaagi sa buhat diha sa templo. Isip iyang mga apo, kon kami adunay nahibaloan bisan unsa mahitungod ni Lola Rymer, kini mao nga siya usa ka matarung nga babaye kinsa naghupot sa iyang mga pakigsaad ug gusto nga kami mobuhat sa ingon. Kon ang mga tawo moutingkay sa atong mga kabtangan human kita mamatay, makit-an ba nila ang ebidensya nga kita naghupot sa atong mga pakigsaad?
Ang atong pinalanggang propeta, si Presidente Thomas S. Monson, misulti kanato sa miaging kinatibuk-ang komperensya: “Samtang kamo ug ako moadto sa balaan nga mga balay sa Dios, samtang kita mahinumdom sa mga pakigsaad nga atong gihimo sa sulod, mas makaagwanta kita sa mga pagsulay ug mas makabuntog sa matag tintasyon. Niining sagrado nga sanktuwaryo makakaplag kita og kalinaw; mabag-o kita ug malig-on.”22
Sa makausa pa: “Ipataas ang imong kasingkasing ug paglipay, ug hupot ngadto sa pakigsaad nga ikaw mihimo.”23 Ang paghupot sa mga pakigsaad usa ka tinuod nga kalipay ug kamaya. Kini kahupayan ug kalinaw. Kini proteksyon gikan sa kadautan sa kalibutan. Ang paghupot sa atong mga pakigsaad motabang kanato sa mga panahon sa pagsulay.
Ako mopamatuod nga samtang kita adunay hugot nga pagtuo diha ni Kristo ug maghupot ngadto sa atong mga pakigsaad, atong madawat ang kalipay nga gipamulong diha sa balaan nga mga kasulatan ug gisaad pinaagi sa atong mga propeta sa ulahing mga adlaw.
Minahal nga mga sister, gihigugma ko kamo ug nanghinaut nga inyong masinati kining dako nga kalipay diha sa inyong kinabuhi. Sa pangalan ni Jesukristo, amen.