Elder Tad R. Callister

Sa Kapangulohan sa Seventy

Si Elder Tad Richards Callister, bag-ong gipaluyohan ngadto sa Kapangulohan sa Seventy ug miyembro sa Ikaduhang Korum sa Seventy, mipasabut nga usa sa tumong sa Kaigsoonan mao ang pagpahinabo sa “tinuod nga kalamboan” sa Simbahan. “Kana nagpasabut nga mas daghang tawo nga dili lang motambong sa miting sa sakrament apan moambit usab sa sakrament, modawat sa mga ordinasa nga gitanyag sa Simbahan, ug motuman sa ilang mga pakigsaad,” siya miingon.

Nagtinguha nga makatabang sa mga lider sa Simbahan niana nga paningkamot, si Elder Callister mapasalamaton nga ang Ginoo naghatag kaniya og mga oportunidad sa pagserbisyo og daghang calling. “Nakasinati sa kasinatian sa mga tawo ang akong ikatrabaho—mga presidente sa stake ug mga bishop ug mga presidente sa elders quorum—unta kini mas makapasensitibo ug makapasayud kanako sa ilang mga panginahanglan,” siya mipasabut.

Si Elder Callister nagserbisyo isip full-time nga misyonaryo sa Eastern Atlantic States Mission, presidente sa elders quorum, stake mission president, magtatambag sa presidente sa stake, bishop, presidente sa stake, regional representative, Area Seventy, presidente sa Canada Toronto East Mission (2005–08), ug nagserbisyo isip Presidente sa Pacific Area sa dihang gitawag isip Kapangulohan sa Seventy.

Natawo ngadto kang Reed ug Norinne Callister niadtong Disyembre 1945, sa Glendale, California, USA, si Elder Callister nakadawat og degree sa accounting sa Brigham Young University niadtong 1968. Siya migradwar og law sa University of California Los Angeles niadtong 1971. Niadtong 1972 iyang naangkon ang LLM (master’s) degree sa tax law sa New York University. Gikan 1972 hangtud 2005 nagtrabaho siya isip abogado, ug nagsulat og mga libro kabahin sa Pag-ula ug Apostasiya ug Pagpahiuli.

Iyang giminyoan si Kathryn Louise Saporiti niadtong Disyembre 1968 sa Templo sa Los Angeles California. Sila adunay unom ka mga anak.

Si Elder Callister miila sa kamot sa Ginoo sa iyang kinabuhi. “Ang gugma sa Manluluwas hilabihan kaayo nga sa akong hunahuna Siya ug ang atong Amahan sa Langit ganahan kaayo nga mopanalangin kanato bisan sa pinaka gamayng kaayohan nga atong nahimo, tungod kay mao kana ang Ilang kinaiya.”