E Amiga here e
Tapa‘o aroha na Mexico mai ! Ua anaanatae roa vau i te fariiraa i ta oe rata e i te faarooraa i te parau no to oe mahana fanauraa. E au e, ua pe‘ape‘a rii oe i te faaru‘e i te Paraimere. E nehenehe anei ta’u e parau atu ia oe no to’u tomoraa i roto i te Feia Apî Tamahine ?
Ua pe‘ape‘a rii atoa vau i te faaru‘eraa i te Paraimere. Ua pe‘ape‘a vau i te mea e, aita to’u e hoa i reira. Ua ri‘ari‘a atoa vau i te riroraa ei tamahine apî roa a‘e e ere faahou â i te mea paari roa a‘e.
Aita râ e fifi tei tupu. Ua uiui te episekopo ia’u na mua a‘e to’u mahana fanauraa e ua parau mai ia’u e, e riro te tauiraa i te hoê mea maitai. I te mahana sabati ra, ua haamâ rii au e ua faaea vau i roto i te piha o te Paraimere. Aua‘e râ, ua ite mai te hoê o te feia faatere no te Feia Apî Tamahine ia’u i reira. Ua parau mai oia, « Ua mana‘o ihoa vau e ite vau ia oe i reira ! Haere mai, ua hora no te haere i roto i te piha haapiiraa ».
Ua maeva te tuahine Diaz ia’u i te haamataraa o te piha haapiiraa, e ua horo‘a mai oia ia’u e toru buka o ta’u e au roa nei : No te Puai o te Feia Apî, te Faahaereraa ia’u iho i mua, e te hoê buka aamu. I to’u hi‘oraa i te piha, ua ite atura vau i te tahi o te mau tamahine o ta’u i matau i te Paraimere. Te tahi o te mau tamahine aita vau i matau, ua aroha mai ïa ia’u. Aita i maoro roa, ua hau to’u aau e aita atura e mata‘u faahou.
Ua haere noa te mau mea atoa i te maitairaa i muri a‘e i te reira. Ua au taa ê roa vau i te mau faaoaoaraa a te Feia Apî no te mea na te reira i haapii mai ia’u nahea e ora i te evanelia e nahea e tauturu i to’u nei utuafare e i to’u nei mau hoa. E e mea au atoa te ohipa puhaparaa i te matahiti tata‘itahi ! I teie nei, e Tarona ta’u piha, te mana‘o nei au e faaoti i te faanahoraa te Faahaereraa ia’u iho i mua i teie mau mahana i muri nei. Ua hinaaro roa vau i te farii i te feti‘a a te Feia Apî Tamahine na te reira e faahaamana‘o ia’u i to’u nuuraa e to’u haafatataraa i to’u Metua i te Ao ra na roto i teie mau matahiti.
No reira, eiaha e taiâ e to’u hoa. A faatoro i to pererau e a rere atu i te Feia Apî Tamahine ra. Tiaturi mai oe, eita oe e tatarahapa.
Ua here au ia oe,
Maribel
Faahoho‘araa na Brad Clark