2012
Te mau pahonoraa a te Haapiiraa Sabati
Atopa 2012

Te taviniraa i roto i te Ekalesia

Te mau pahonoraa a te Haapiiraa Sabati

Na Emma Addams

E ohipa matau na’u te imiraa i te mau pahonoraa rahi i ta’u mau tamataraa—ia ani i te Fatu ia tauturu mai ia’u ia ite mai i taua mea ra e tataî i te mau fifi atoa. Ua haapii au e, e riro teie reni arata‘i i te faataupupu i te mau mea atoa.

I to’u haapiiraa i te piha haapiiraa no te haapiiraa tumu o te evanelia i roto i ta’u paroisa, ua faaoti papû vau i te ui i te mau uiraa hohonu e haamahiti mai i te anoenoe e te mau pahonoraa rahi e te apî e te aravihi. E nehenehe atoa e parau e, ua hinaaro vau i te ape i te faahiti-faahou-raa i taua mau pehe tahito ra, « Te mau pahonoraa a te Haapiiraa Sabati » o ta te mau melo e horo‘a noa mai i te hepetoma tata‘itahi.

A tuatapapa hohonu ai au i te Faufaa Apî no ta’u faaineineraa, ua hiti mahuta vau i te faaohiparaa o te ta‘o haapa‘o, tei na ni‘a iho noa te faaohiparaa. Te tahi hi‘oraa, te parau nei te Ioane 15:10, « I haapa‘o outou i ta’u ra parau, e vai herehia’tu â outou e au ; mai ia’u i haapa‘o i te parau a tau Metua ra » (reta tei faahuru-ê-hia).

I roto i Ta’na pure arai, te pure nei te Faaora no Ta’na mau pĭpĭ ia « riro ratou ei hoê ; mai ia oe, e tau Metua, i roto ia’u nei ra, e mai ia’u hoi i roto ia oe na, ia hoê atoa ratou i roto ia tâua » e « ei roto vau ia ratou, e ei roto oe ia’u, ia ti‘a to ratou amuiraa » (Ioane 17:21, 23).

Te mea roa ta’u i imi na, o te rave‘a ïa e nehenehe ta’u e riro hoê e te Fatu, nahea ta’u e nehenehe e haapa‘o i roto i To’na here, e nahea, i te pae hopea, e nehenehe ai ta’u e faarahi faahou â i to’u faaoroma‘i—faaoroma‘i o ta’u e hiaai roa nei ho‘i no te faataui i ta’u mau iteraa, mai te mea rohirohi rahi roa ino i te mea faaitoito rahi e te haamo‘a atoa.

E te mea huru ê, a imi noa ai au i na mea e piti, te haro‘aro‘araa i te ta‘o haapa‘o e te pahonoraa i te mau tamataraa o ta’u i faaruru noa na i te mau mahana atoa, ua faaho‘i-roa-hia vau i te mau pahonoraa a te Haapiiraa Sabati o ta’u i tamata noa na i te haapae. Ua ite atura vau i te pahonoraa i ta’u mau tamataraa na roto i te tai‘oraa i te mau papa‘iraa mo‘a, te pureraa i te mau mahana atoa, te taviniraa i to’u utuafare e ia vetahi ê atoa, e te haereraa i te hiero e i ta’u nei mau pureraa i te mahana sabati. Ua haapii mai au e, na te reira mau ohipa ohie e faatupu i te taa-ê-raa i rotopu i te tape‘a-noa-raa e te tape‘a-maite-noa-raa ma te faaoromai.

O te mau pahonoraa a te Haapiiraa Sabati te mau pahonoraa maitai roa a‘e.