No te Puai o te Feia Apî
Te ahu e te faaneheneheraa : « na te Varua Maitai e arata‘i »
© Busath Photography
Ei ti‘a na te Mesia, te faaite nei tatou i te faatura no to tatou nei tino « i te mau mahana atoa, e i te mau mea atoa, e i roto i te mau vahi atoa » na roto i te auraroraa i te tahi mau faatureraa.
Ua oomo noa Kim i te ahu tano. I te tahi mahana ra, ua ani au i to’na mana‘o no ni‘a i te huru piritoti (jupe) tano, te huru piriaro (blouse) tano e te huru ahu hapu miti (maillot) tano. Ei monoraa i te paraparauraa no ni‘a i te huru tapo‘iraa i te tua e te avae, ua paraparau maua no ni‘a i te mau parau tumu e tu‘ati nei i te ahuraa tano e te fifi no te ite mai i te ahu tano e te au. Ua arearea maua i te imiraa i te tahi mau rave‘a no te faroroa rii â i te hoê piritoti. I te pae hopea, ua ani mai Kim, « Mea huru ê ana‘e no’u ia oomo i te hoê ahu i tera taime matamua ihoa râ, e tapa‘o ïa tera e, e mea tano ore te reira e eita ihoa vau e vai hau ia oomo i te reira. Ta‘u i haapii, oia ho‘i, eiaha roa e hoo mai i te reira. E faaho‘i au i te reira i ni‘a i te faatautauraa ».
Ia tamau noa Kim i te tutava ia ora ma te parau-ti‘a, e nehenehe ta te Varua Maitai e arata‘i ia’na i te ma‘itiraa i to’na ahu. Te ora puai nei oia i te faatureraa no te ahu faito tano e aita roa oia e taui haere nei i te mau ture no te ahu e te faaneheneheraa. Te maramarama nei oia e, e hiero to’na tino (hi‘o 1 Korinetia 3:16) e e hopoi‘a ta’na ia aupuru i te reira, ia paruru e ia ahu tano i te reira.
Ia patuhia’na‘e te hoê hiero, e haapa‘o-rahi-hia te parururaa e te faaneheneheraa o te reira i roto e i rapae atoa. Te hoê taviri no te faaineineraa i te mau hiero, o te haro‘aro‘araa ïa e, e hoho‘a te hiero no te fare o te Fatu. Te faatura nei tatou i te mau hiero ei paturaa mo‘a i reira te feia ti‘amâ ana‘e e tomo atu. Te auraro nei tatou i te mau hiero no te mea na te mau oro‘a mo‘a e te mau fafauraa o ta tatou e rave nei i reira e faati‘a nei ia tatou ia ho‘i atu i to tatou Metua i te Ao ra.
E mea faufaa a‘e to outou nei tino i te hoê noa a‘e hiero nehenehe i ni‘a i te fenua nei. E tamaiti here e e tamahine here outou na te Atua ! E mea hau atu â ïa i teie nau parau tumu—te faahoho‘araa, te faaturaraa e te auraroraa—ia faaohipahia no te aupururaa e te parururaa i to outou tino.
Te faahoho‘araa
I te hepetoma tata‘itahi, ia rave tatou i te oro‘a, te rave nei tatou i ni‘a ia tatou i te i‘oa o te Faaora. E ti‘a tatou No’na i ni‘a i te fenua nei. Te parau nei te hoê o te mau arata‘iraa i roto i te buka iti No te Puai o te Feia Apî : « Na roto i to outou ahu e to outou faaneheneheraa, e nehenehe ta outou e faaite [i te Fatu] e, ua ite outou i te faufaa rahi o to outou tino. E nehenehe ta outou e faaite e, e pĭpĭ outou na Iesu Mesia e ua here outou Ia’na ».1
I te tai‘oraa te hoê taure‘are‘a tamahine i teie parau, ua faaoti roa oia eita oia e hinaaro e haere tapiri roa i te reni no te ahuraa tano ore. Oioi roa to’na tatararaa i te mau mea atoa i roto i to’na vairaa ahu o te ore i tu‘ati i te hiro‘a o te hoê ti‘a na te Faaora. Ua parau oia, « E maramarama roa ïa to’u ahani pai e, aita vau i tamatamata na i roto i te fare toa i te mea eita e ti‘a ia’u i te oomo. No te aha e faahemahia ai ? » Na te parau no te faahoho‘araa i tauturu ia’na ia rave roa i teie faaotiraa.
Hoho‘a faahoho‘araa na Cody Bell
Te faaturaraa
Ei ti‘a na te Mesia, te faaite nei tatou i te faaturaraa i to tatou nei tino « i te mau mahana atoa, e i te mau mea atoa, e i roto i te mau vahi atoa » (Mosia 18:9) na roto i te auraroraa i te tahi mau faatureraa. Te faataa nei te Fatu e, o ratou ana‘e tei mea mâ e tomo atu i roto i te hiero. E tapa‘o papû ta outou ma‘itiraa ia ora i te oraraa mâ no to outou faaturaraa i te Fatu e to outou iho ho‘i tino tahuti.
E ti‘a atoa ia tatou ia faaite i te faaturaraa i te tino o vetahi ê e ia tauturu ia ratou ia ora i te oraraa mâ. Ua parau Elder M. Russell Ballard no te Pŭpŭ no te Tino Ahuru Ma Piti Aposetolo : « E ti‘a [i te feia apî tamahine] ia maramarama e ia ahu ana‘e ratou i te mau ahu vî roa, poto roa aore râ e vaitahaa roa, aita ïa ratou e horo‘a noa ra i te parau poro‘i hape i te feia apî tamaroa o ta ratou e faahoa ra, te faatupu tamau atoa râ ratou i roto i to ratou iho mau feruriraa i te mana‘o hape e te faufaa no te hoê vahine tei ni‘a noa ïa i to’na huru faatiani i te tane. E ere roa teie huru e aita roa’tu teie huru i te auraa mau no te hoê tamahine haapa‘o maitai a te Atua ».2
E te feia apî tamahine, a faatura i to outou tino e a tauturu ia vetahi ê, te feia apî tamaroa ihoa râ, ia faatupu noa i te mau mana‘o mâ e te mau ohipa mâ. A faatura i to outou nei tino ma te ite e, na te oraraa parau-ti‘a o te mahana tata‘itahi e horo‘a ia outou i te faufaa mure ore.
Te auraroraa
Ua haapii Elder Robert D. Hales no te Pŭpŭ no te Tino Ahuru Ma Piti Aposetolo : « Mai ta te aua o te hiero e faaite nei i te huru mo‘a e te auraroraa no te mea e tupu nei i roto i te hiero, te faaite atoa nei to tatou ahu i te nehenehe e te ateate o to tatou roto taata. Te huru o to tatou ahu, e faaiteraa ïa te reira e, e faatura ti‘a to tatou no… te mau oro‘a e te mau fafauraa mure ore e e faaiteraa atoa ïa i te mea e, te faaineine nei tatou no te farii i te reira ».3
A faaite i to outou auraroraa i te tusia taraehara a to tatou Faaora na roto i te ahuraa i to outou « ahu sabati » no te rave i te oro‘a. « E ahu te feia apî tamaroa i te ahu ma te tura a faatere ai ratou i te oro‘a no te oro‘a mo‘a ».4 E te feia apî tamahine, a ahu i te ahu tano.
A ti‘a mai i ni‘a ! A riro ei hi‘oraa no te ahuraa tano i te fare, i te haapiiraa, i te pae miti, i te mau oriraa e aore râ i te mau ohipa tuaro. A pee i te hi‘oraa o Kim no te ma‘itiraa i to outou ahu, ma te vaiiho i te Varua Maitai ia arata‘i ia outou i roto i ta outou mau faaotiraa. A ui ia outou iho e, « E vai hau anei au i roto i to’u faaneheneheraa ahiri e, tei mua vau i te aro o te Fatu ? »5
Mai te mea e ora outou i teie na toru parau tumu—te faahoho‘araa, te faaturaraa e te auraroraa—ia ma‘iti outou i to outou mau ahu, e « anaana mai » outou (Te Parau Haapiiraa e te mau Parau Fafau 115:5) ei mau ti‘a here na te Faaora.