Faatura i ta tatou mau fafauraa

A tai‘o i teie haapiiraa na roto i te pure, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa.

Te Faaroo, Te Utuafare, Te Totauturu

E faaiteraa te hahaereraa a te mau tuahine no to tatou aupĭpĭraa e e rave‘a atoa te reira no te faatura i ta tatou mau fafauraa ia tavini e ia haapuai ia vetahi ê. E mea mo‘a te hoê fafauraa e e euhe te reira i rotopu i te Atua e Ta’na mau tamarii. « Ia ite ana‘e tatou e e mau tamarii tatou no te fafauraa, e ite ïa tatou e o vai râ tatou e eaha ta te Atua e tia‘i nei ia tatou », te parau ïa a Elder Russell M. Nelson no te Pŭpŭ no te Tino Ahuru Ma Piti Aposetolo. « Ua papa‘ihia Ta’na ture i roto i to tatou aau. O Oia to tatou Atua e o tatou To’na nunaa ».¹

Ei tuahine hahaere, e nehenehe ta tatou e haapuai ia ratou o ta tatou e hahaere nei no te faaitoitoraa i ta ratou mau tutavaraa ia haapa‘o i ta ratou mau fafauraa mo‘a. Na roto i te reira, te tauturu nei tatou ia ratou ia faaineine ia ratou no te mau haamaitairaa o te ora mure ore. « Te mau tuahine atoa o te Ekalesia tei rave i te mau fafauraa i mua i te Fatu, e tonoraa hanahana to ratou ia tauturu e faaora i te mau varua, ia arata‘i i te mau tuahine o teie nei ao, ia haapuai i te mau nohoraa no Ziona, e no te patu i te basileia o te Atua »,² te parau ïa a Elder M. Russell Ballard no te Pŭpŭ no te Tino Ahuru Ma Piti Aposetolo.

Ia rave e ia haapa‘o ho‘i tatou i te mau fafauraa mo‘a, e riro tatou ei mauhaa i roto i te rima o te Atua. E ti‘a ïa ia tatou ia faahiti i to tatou mau tiaturiraa e ia haapuai i to te tahi e to te tahi faaroo i te Metua i te Ao ra e ia Iesu Mesia.

No roto mai i te mau papa‘iraa mo‘a

1 Nephi 14:14 ; Mosia 5:5–7 ; 18:8–13 ; Te Parau Haapiiraa e te mau Parau Fafau 42:78 ; 84:106

No roto mai i to tatou aamu

I te matahiti 1833, ua heheu mai te Fatu i te peropheta Iosepha Semita e, ua riro te hiero « ei vahi haamaitairaa no te mau feia mo‘a atoa ». Ua riro te reira « ei vahi haapiiraa hoi no ratou atoa o te parauhia i te ohipa no te evanelia i roto i to ratou mau faataaraa e te mau toro‘a hoi ; ia ti‘a ia haapapuhia ratou i roto i te iteraa i ta ratou ohipa, i roto i te mana‘o, i roto i te parau tumu, e i roto i te parau haapiiraa, i roto hoi i te mau mea atoa no ni‘a i te basileia o te Atua i ni‘a i te ao nei » (PH&PF 97:13–14).

I te omuaraa o te mau matahiti 1840 i Nauvoo, i Illinois, ua tauturu te mau tuahine o te Sotaiete Tauturu i te tahi e te tahi no te faaineine no te mau oro‘a o te hiero. I roto i te mau oro‘a no te autahu‘araa teitei ta te Feia Mo‘a i farii i roto i te hiero no Nauvoo, « [ua] faaitehia mai te mana no te huru Atua ».(PH&PF 84:20). « A haapa‘o ai te Feia Mo‘a i ta ratou mau fafauraa, ua haapuai e ua paturu teie mana ia ratou na roto i to ratou mau ati i te mau mahana e te mau matahi i mua ».³

I roto i te Ekalesia i teie mahana, te tamau nei te mau vahine e te mau tane haapa‘o maitai na te ao taatoa nei i te tavini i roto i te hiero e ia ite i te puai i roto i te mau haamaitairaa o te nehenehe noa e fariihia na roto i te mau oro‘a no te hiero.

Hiero no Nauvoo Illinois, na Scott Goodwin