Manava i te hoê tau apî o te ora
Te ora ra anei oe i te hoê fenua e taui te û o te mau tumu raau ia ineine no te tau to‘eto‘e ? Mai te reira te huru no teie nau hoa e maha. Noa B., Dylan L., Patrick M., e Ben M., te ora nei ratou i te motu no Prince Edward Island i tua i te pae hitiaa o te râ o te fenua Canada. Mai te mau tumu raau, te faaineine ra teie nau tamaroa no te hoê tau apî o te ora. E ti‘a to ratou paatoa matahiti i te 12 i roto hoê matahiti te maoro, te auraa ra, e faaru‘e ratou i te Paraimere no te tomo i roto i te Feia Apî Tamaroa. Teie ta ratou i parau no ni‘a i to ratou tupuraa e te haereraa i mua.
Tape‘a noa i to outou iho hiro‘a
I to Noa taeraa mai i ô nei, ua tauturu to’na nau hoa apî ia’na ia haamatau i te oraraa i ni‘a i te hoê motu. I teie nei râ, o oia te mea paari roa a‘e o te pŭpŭ, te tauturu nei oia ia ratou ia haamatau i te oraraa ei Feia Apî Tamaroa. « Ua taiâ rii au eita vau e fariihia e eita atoa vau e matau i te tahi mau pu‘eraa », ua parau mai Noa i te haamataraa i te Feia Apî Tamaroa. « E mea tauturu mau te haereraa i te mau faaoaoaraa ». Te himene au roa a‘e na Noa, o te himene ïa no ni‘a i te nuu faehau a Helamana, e mai te reira atoa to’na hi‘oraa i te pŭpŭ autahu‘araa—ei amuiraa, ei tahoêraa.
Ta’na mana‘o tauturu ? « Tape‘a noa i to outou iho hiro‘a ».
Faatura i te autahu‘araa
No Patrick, e ere te fariiraa i te autahu‘araa i te hoê ohipa matahiti. E ohipa râ e au i te parau-ti‘a e te faaineineraa. « Eita oe e farii i te autahu‘araa no te mea noa ua ti‘ahia te 12raa o te matahiti », te na reira ra o Patrick. « E ti‘a ia oe ia faaineine ».
Ua taa maitai ia Dylan i te faufaa ia faaineine. E tamata oia ia tae i te pureraa 15 minuti na mua a‘e no te faaineine ia’na i te pae varua no te opereraa i te oro‘a. « Ua opere au i te oro‘a e toru e aore râ e maha paha taime, e i te mau taime atoa, ua putapû to’u aau i te Varua. Aita vau e mana‘o nei e, e matau vau i te reira », ta’na ïa parau.
Ua parau Ben e, e faahaamana‘o te opereraa oro‘a ia’na i te Tamaaraa Hopea : « Tei ô o Iesu i te ti‘araa. Te ti‘a nei matou i te vahi ua ti‘a mai Iesu, e ua hinaaro Oia ia tatou ia ti‘a i reira ».
Hi‘o i te hiero
Te ohipa ra Ben no te farii i te feti‘a no te Faaroo i te Atua e te hinaaro roa nei oia ia rave no te taime matamua roa i te mau bapetizoraa no te feia i pohe. « Aita â vau i tae i roto i te hiero, te parau nei râ te tahi mau pu‘eraa no te tamahanahanaraa e te maitai e itehia nei i reira », ua parau mai Ben.
Ua haere Noa i to’na tere hiero matamua aita i maoro a‘enei. Ua parau mai oia e, ua rave maitai te mau tamaroa o te pŭpŭ autahu‘araa ia’na, mai te hoê ra utuafare te huru. « E taiâ rii ihoa oe, e taata râ to ô no te tauturu mai ia oe », ta’na ïa parau. « E ite oe, e farii-maitai-hia oe ».
Noa
Dylan
Patrick
Ben
Hoho‘a na Marissa Widdison