Nahea to’u vai-puai-raa i roto i te evanelia

Na Tua Rogers

Ua bapetizohia vau i te 12raa o to’u matahiti, e no te hoê tau matahiti roa, o vau ana‘e te melo o te Ekalesia i roto i to’u utuafare. E ere i te mea ohie roa, aua‘e râ, ua haamaitaihia vau e te tahi feia faatere maitai o tei tauturu ia’u i ni‘a i to’u e‘a no te haapiiraa i te mau haapiiraa tumu o te evanelia e no te faaohiparaa i taua mau haapiiraa tumu ra no te haapuai e no te haamaitai i to’u nei oraraa. No to’u faaotiraa ia tape‘a maite i te mea ta’u i tiaturi, ua ite au i te mau haamaitairaa rahi tei tae mai i roto i to’u nei oraraa, e i muri iho roa, tei tae mai i roto i te oraraa o te mau melo o te utuafare.

Teie te tahi o te mau mea tei tauturu ia’u ia vai puai noa :

Haafatata noa i te Metua i te Ao ra na roto i te mau ohipa mai te pure e te tuatapaparaa papa‘iraa mo‘a. Ua ite Oia i te mea ta tatou e faaruru nei. Na te haafatataraa Ia’na i tauturu ia’u ia haamana‘o noa e, o vai au.
Pee i te parau a‘o a te feia faatere o te Ekalesia. Ua ite au i roto i to’u nei oraraa i te parau mau no te parau a‘o a te mau peropheta e a te mau aposetolo.
Ia ite e, na te oraraa i te evanelia e faatupu i te oraraa maitai i teie nei e a muri noa’tu. Na te reira i tauturu ia’u ia tape‘a noa i ta’u mau faatureraa e to’u faaroo. Ua faaitoito te feia faatere ia’u ia haere i te hiero, e ua tauturu te reira ia’u ia feruri i te ora mure ore.
Amui atu i te mau hoa maitai, te mau hoa hoê â mau faatureraa i ta outou iho. Ua haamaitaihia vau e te mau hoa maitai tei faaohie mai i ta’u mau faaotiraa ia vai ti‘a noa e i to’u faaroo ia vai puai noa.
Haafatata noa i to outou utuafare. Ua here au i to’u nei utuafare e ua hinaaro roa vau ia haamau i te mau auraa puai i rotopu ia matou.
Ora i te oraraa. A haapa‘o i te mau faatureraa e a rohi i roto i te mau faanahoraa a te Ekalesia. E tauturu te reira ia outou ia faaanaana i to outou faaroo e ia rave i te mau ma‘itiraa maitai. E faaohie noa te mau ma‘itiraa maitai i te oraraa, e faatae noa mai te reira i te oaoa rahi.