Feia apî
Te pure e te hau
I te hoê pô ua maniania vau e to’u nei mama e ua taiâ roa’tura to’u aau. No reira ua faaoti au ia pure. Noa’tu to’u huru hae e to’u hinaaro ore ia « haafatata i te varua », ua ite râ vau e, e tauturu mai te pure ia’u ia faatupu i te aau oaoa a‘e e te maniania ore. I to to’u mama faaru‘eraa i to’u nei piha, ua haamata vau i ta’u pure. « E te Metua here i te Ao ra, tei mua vau ia Oe i teie pô no te mea… » Aita. Ua araara atura vau i to’u na mata e ua tatara vau i to’u na rima ; e mea huru ê roa teie parau. Ua tamata faahou vau. « Te Metua i te Ao ra ua hinaaro vau… » E mea huru ê atoa teie parau. Ua tae mai i to’u nei aau i te mana‘o e, te tura‘i nei o Satane ia haapae au i ta’u pure aniraa i te Metua i te Ao ra i te tauturu.
I tera ihoa taime ra, ua tae mai te faaûruraa ia haamauruuru atu ! E ua na reira vau, e ua haamata mai to’u nei mau mana‘o i te manii mai, no te mau mea rahi ta’u e nehenehe e haamauruuru i to’u nei Metua i te Ra‘i ra. Ia oti a‘era to’u haamauruuururaa Ia’na, ua paraparau atura vau no taua fifi ra.
E i muri mai, ua tae i to’u nei aau i te hau faahiahia, te hoê ho‘i mana‘o tamahanahanaraa e te iteraa e, ua here to tatou nei Metua i te Ao ra e to’u na metua ia’u e ua riro mau vau ei tamarii na te Atua ra. Ua ti‘a atura ia’u ia tatarahapa i mua i to’u nei metua vahine e ia farii atoa mai i ta’na tatarahaparaa.