Dan Jones (1810–62)

Ua hau i te hoê mirioni misionare tei piihia mai te taime a faatiahia ai te Ekalesia, tera râ, ua riro o Dan Jones ei misionare taa ê i roto i tera hoê mirioni. No ni‘a i taua misionare ra no te fenua no ‘Galles’, teie te parau a te Peresideni Gordon B. Hinckley (1910–2008), « no ni‘a i te rahiraa o te feia i faafariuhia, e nehenehe e tai‘o ia Dan Jones i roto i na misionare e ono ei mau misionare manuia roa a‘e i roto i te aamu o te Ekalesia ».¹

Hou a riro ai oia ei misionare, ua faaru‘e o Dan i te fenua no ‘Galles’ no te haere atu i te mau Hau Amui no Marite e ua rave i te ohipa i ni‘a i te anavai Mississippi ei raatira no te pahi auahi ra Maid of Iowa, na ni‘a ho‘i i te reira pahi te Feia Mo‘a no te mau Mahana Hopea nei tereraa i Nauvoo, Illinois. Ua tomo mai oia i roto i te Ekalesia i te matahiti 1843 e ua riro mai ei hoa rahi no te Peropheta Iosepha Semita.

Ua riro te mau misioni a Dan ei faatupuraa i te parau tohu hopea a Iosepha Semita. I te pô hou te Peropheta Iosepha Semita a taparahi-pohe-hia ai, ua faaroo oia i te haruru pupuhi i rapae i te haamaramarama o te Fare Tapearaa no Karateti, no reira, ua tarava oia i ni‘a i te tahua. Tei piha‘i iho noa o Dan Jones ia’na. Ua ui atura te Peropheta ia Dan e, te măta‘u ra anei oia ia pohe. Ua pahono maira oia e, « Te mana‘o ra anei oe e, ua tae mai taua taime ra ? I roto i teie huru ohipa, aita vau e mana‘o nei e, e mea ri‘ari‘a te pohe ». I reira, ua tohu ihora o Iosepha, « E ite faahou â oe i te fenua no ‘Galles’, e e faatupu oe i te ohipa i faataahia na oe hou a pohe ai oe ».²

Ua tupu te fafauraa a te Peropheta i te matahiti 1845, i te taime a piihia ai o Dan e ta’na vahine o Jane, ia haere e tavini i ‘Galles’. Ua faaohipa o Dan i to’na tareni paraparau no te haapii i te evanelia ma te puai rahi. E mea papû maitai oia i te reo no ‘Galles’ e i te reo Peretane, e te parau ra te taata e, no te au ta’na paraparau, e nehenehe ta’na e tapea i te anaanatae o te taata e rave rahi hora te maoro i roto i te tahi reo e i te tahi reo.

I te fenua no ‘Galles’ ua nene‘i o Dan i te mau ve‘a, te mau parau faatiani e te mau buka i roto i te reo ‘Galle’ na te Feia Mo‘a i te mau Mahana Hopea nei. I raro a‘e i te faatereraa a Dan Jones, ua haamau te mau misionare i te fenua no ‘Galles’ e 29 amaa e ua bapetizo fatata e 1.000 taata i te matahiti tata‘itahi i roto i ta’na misioni matamua. Ua pii-faahou-hia oia no te piti o te misioni i te fenua no ‘Galles’ i te matahiti 1852, e noa’tu te tupuraa i te rahi te ohipa hamani-ino-raa i te Ekalesia, ua bapetizohia e 2.000 taata i roto e maha matahiti.

I to’na ho‘iraa mai i Utaha, ua tauturu o Dan i te hopoiraa mai i Utaha e rave rahi taata faafariuhia no te fenua no ‘Galles’. I to’na poheraa i te 51raa o to’na matahiti, ua tauturu oia i te hopoiraa mai fatata e 5.000 taata i te mau Hau Amui no Marite.

Na te aui : Hoho‘a o te misionare no ‘Galles’, Dan Jones. E pahi auahi, mai te hoê o ta Dan Jones i pairati, te tapiri nei i Navu, Illinois. Te tauturu nei o Dan Jones i te mau ratere no ‘Galles’.