Newel K. Whitney (1795–1850)

Ua fanauhia o Newel Kimball Whitney i Vermont, HAM, i te 5 no fepuare 1795. E taata aravihi oia i roto i te ohipa putu faufaa, e ua faatupu oia i te hoê auhoaraa e te hoê apitiraa ohipa e o Sidney Gilbert. I te omuaraa o ta raua ohipa putu faufaa, ua ratere haere pinepine raua. I roto i te hoê o te reira mau tere ohipa, ua farerei o Newel ia Elizabeth Ann Smith i Kirtland, Ohio. E toru matahiti to Newel raua o Ann haamatauraa e ua faaipoipohia raua i te matahiti 1823.

Ua imi amui o Newel e o Ann i te parau mau, e no te hoê tau, ua amui atu raua i roto i te taatiraa Campbel, e taatiraa teie o tei poro i te parau no te faaho‘i-raa-hia mai te Keretetiano i tahito ra. I te hoê pô ua pure o Newel e o Ann « no te ani i te Fatu e nahea [raua] e farii ai i te horo‘a o te Varua Maitai ». Ua faaite mai o Ann i te orama ta raua i farii ei pahonoraa i ta raua pure : « Ua tae mai te Varua i ni‘a iho ia raua e ua tapo‘ihia to raua fare i te maru ata … I muri iho, ua faaroo a‘era maua i te hoê reo na roto mai i te ata, i te na ôraa mai e : ‘A faaineine no te farii i te parau na te Fatu, no te mea, te tae mai nei te reira’ ».¹

I muri noa mai i teie pahonoraa o te pure, i te ava‘e atopa 1830, ua tae mai te mau misionare Feia Mo‘a i te mau Mahana Hopea nei i Keterani. I te ava‘e novema, ua bapetizohia o Newel raua o Ann. Tau ava‘e noa i muri mai, ua tae mai ra o Iosepha raua o Emma Smith e ua patoto mai i ni‘a i te uputa o te utuafare Whitney. A aroha ai o Iosepha ia Newel ma te faahiti i to’na i‘oa, aita ta Newel e nehenehe e parau e, ua ite oia i te i‘oa o te Peropheta, no reira ua pahono atura o Iosepha e, « O Iosepha vau, te Peropheta ; ua pure oe ia tae mai au i ô nei, i teie nei eaha ta oe e hinaaro nei ia’u ? »² Ua tapea o Whitney ma ia Iosepa e o Emma Smith i to raua utuafare e rave rahi hepetoma te maoro, e ua itehia te hoê fare no raua i te ava‘e setepa 1832.

Taa ê noa’tu te imiraa i te hoê vahi faaearaa no te taea‘e e te tuahine Smith, ua horo‘a atoa o Newel i te tahua i ni‘a o ta’na faretoa ei vahi ohiparaa na te Ekalesia. Ua faatupu te feia faatere o te Ekalesia i te mau apooraa e i te Haapiiraa a te mau Peropheta i roto i te faretoa a Whitney.

I te ava‘e titema 1831, ua piihia o Newel te piti o te episekopo o te Ekalesia e i muri a‘e, ua riro oia ei ti‘a faatere no te tereraa faufaa a te Ekalesia, no te tauturu i te Ekalesia ia faatere i ta’na faufaa e eiaha ia tarahu. I te pu‘e tau haapoheraa raau no te matahiti 1838, ua reva’tu te utuafare Whitney i Far West, Missouri, e ua pii-faahou-hia o Newel ei episekopo i reira, e hoê 10 matahiti i muri mai, ua ratere to’na utuafare no te haere i Roto Miti, i reira oia i tavini ai ei Episekopo Faatere Rahi no te Ekalesia.

Ua pohe o Newel i te 24 no setepa 1850, i Roto Miti no te aho pau.

I raro nei, te afata i te aui : Hoê hoho‘a nana’o no Newel K. Whitney. I raro nei, te afata i te atau : Te e‘a ta‘uma o te faretoa a Newel K. Whitney i Kirtland, Ohio, i reira hoi i faaterehia ai te Haapiiraa a te mau Peropheta. I raro roa : Te faretoa a Whitney.