Karekea Kinaakin Lorenzo Snow

Iroun Christopher D. Fosse

Aikai bwaai tabeua aika ko aki atai ibukin te kaniman ni Beretitenti n te Ekaretia.

N te ririki aei te boki ni kairi ibukin reirei n te Botaki n Aine ao te Nakoanibonga ae te Merikitereka a kabotoa aia reirei iaon maiun ao ana reirei Beretitenti Lorenzo Snow (1814–1901). Ma ibukin ami roro tao e aki kamanena te boki aei, ane e aki nanonak bwa ko aki kona n reiakin teuana ke uoua te bwaai ibukina. Beretitenti Snow e kaira maiuna ae kamimi ae onrake ma kangaanga ao tokanikai.

Te Tiambion ibukin te Euangkerio

E moan ongo taekan te Ekaretia Lerenzo Snow ngke bon te ataei ngaia. N te moan tai akea ana kantaninga bwa e na bwabetitoaki, e ngae n anne mwanena ae Eliza (titebo ma Eliza R. Snow are e korei anene aika a mwaiti ibukia Aomata aika Itiaki ao ni beku bwa te kauoman ni kauntira n te Botaki n Aine ni Kabuta) e rang ni mwanea te euangkerio. E karaoia, irakin anne, e kunea ana tua te Ekaretia bwa a rang ni kakaongora. Ngke e moana ana reirei n te kaoreti i Oberlin, Ohio, e aki toki n tibwaua ana koaua te Ekaretia ma ataein te reirei ake a reiakinaaki bwa minita n te Boretetanti. E ngae ngke e aki rang n anga nanona bwa e na bwabetitoaki, e a tia ni kaota te euangkerio n ae raoiroi ike a mwaiti ataein te reirei i Oberlin ake a karina te koaua ni kaokan te Ekaretia.

Ngkai te mitinare ae korakora n aron are mai mwaina e kariaia te euangkerio, akea te nanokokoraki bwa Lorenzo e na bon anga nanona nakon karaoan te mwakuri imwiin bwabetitoana. Inanon ana moan ririki ni kaina te Ekaretia, e weteaki bwa e na karaoa ana mwakuri mitinare tabeua n ae bwanin taina. E moan mwakuri i Ohio, imwiina i Missouri, Kentucky, ao Illinois, USA. E a manga kanakoaki imwina nako Great Britain bwa e na buoka wakinan te Ekaretia i England. Ngke mena ikekei, e anga kaobiin ana Boki Momoon nakon Kuin Victoria ao Burinti Albert. Imwiin anne e a manga karaoa ana mition i Italy, Switzerland, ao are e rang ni kinaaki ngkai n aban nako Hawaii.

Te Kakai i Tari

Ngke e kitana Unimwaane Snow England man oki nako Nauvoo, Illinois, e kairia te kurubu ae mwaiti ake a tibwa bwabetitoaki ni mwananga mangaia. A bane ni kabaei araia iaon te kaibuke ae Swanton ao ni katauraoia nakon te mwananga ae ananau nako America Meang.

E ngae n anne te kaben n te Swanton e aki akoi nakoia Aomata aika Itiaki ni Boong aika Kaitira ake iaon te kaibuke, ao e aki iraorao naba nakoia. E aki toki ni kararoa mai irouia. Ma imwiin uoua te wiiki i tari, e riki te bwai teuana. Ana touati te kaben e ikoaki kakaiaki n te kabuanibwai. Akea temanna ae kantaningaia bwa te touati e na maiu n te tairiki anne.

Ma temanna mai buakoia titita ae kakaonimaki are e mena irarikin te touati ae kan mate aei e reke ana iango. E tuanga te touati bwa Unimwaane Elder Lorenzo Snow e kona n anganna te kakabwaia ao e na kona ni kawakinaki maiuna. Te touati—are e mwakuri ibukin buokan buna ao uoman natina ake a tiku i Germany—e rang ni kariaia.

Inanon te nukanibong, e uti Unimwaane Snow ao e butiaki bwa e na nakon te aomata ae a kan mate n ana ruu. Ngke e roko, e kaitibo ma kabenin te kaibuke. E karabwarabwa te kaben n rokona man kaota te bwarannano n te kanganga are e riki. Unimwaane Snow e nooria bwa te kaben e tabe n tang.

E nako n te ru, e katoka baina iaon atun te touati, ao e anganna te kakabwaia n te mwakanibonga. Ni waetata imwiin banen te kakabwaia are e anga Unimwaane Snow, temwaane e tekateka ao n teirake man ana kainiwene. E waekoa ni marurung te touati, ao n okira ana mwakuri n te bong are imwina.

Kakawakiia Aomata

Kamaiuan te touati e biti bwaai iaon te Swanton. Te kaben e moana kabanean ana tai ae mwaiti ma Aomata aika Itiaki ni Boong Aika Kaitira n aron are e mwaawa iai, ao e kamatebwaia te euangkerio ao n iri botakin te Ekaretia. Kaimoa ake tabeman a rang ni miimi. Ngke e a roko te kaibuke n tokin kawaina, kaimoan te kaibuke a kabo nakoia Aomata aika Itiaki ni Boonga aika Kaitira. Rinanon te mwaaka n te nakoanibonga, tiaki ti maiun te mwaane are e kamanoaki, ma iai tabeman ake anganaki aron nooran taraan mwaakan te Atua ao ana tangira. Te touati ao tabeman kaimoa a bon bwabetitoaki.

A mwaiti mwakuri ni kakai ake a riki ni maiun Beretitenti Lorenzo Snow. Ngaia are n te ririki aei, ngkai a kamwatebwaia ikawai Teachings of Presidents of the Church: Lorenzo Snow, e aera ko aki kamatebwaia naba? N taian Tabati ke ngkana iai am tai ae maawa, ko kona ni wareki tabeua ana reirei Beretitenti Snow. Ko kona n anga ae mwaiti riki iaon te maroro n te euangkerio inanon te utu, ao inanon wakina ao ko na kona ni kina te mwaane ae kamiimi are e na riki bwa ana burabeti te Atua.

Mwakuri ni mitinare i Hawaii.

Mwakuri n tabeua mition n te United States.

Reirei reirein te euangkerio n reiakinia ataei.

E kamaiua ana touati te kaben ni mwanangaia nako Meangin Amerika.

E anga katooton ana Boki Momoon nakon Kuin Victoria ao Burinti Albert.