Buokiia te Roronrikirake N Riki bwa Taan Reireinaki ao Taan Reirei Aika Korakora
Te karikiram ae boou ibukiia te roronrikirake, Come, Follow Me: Learning Resources for Youth (Nakomai, Irirai: Bwaai n Reirei ibukia te Roronrikirake) e kamatatai aua kawai ake kaaro, taan reirei, ao taan kairiiri a kona ni kanakoraoa te ibuobuoki nakoia te roronrikirake n rairaki nakon te euangkerio.
N rongorongon kairaken Iesu Kristo ni koroboki aika a tabu, ti reiakinna bwa teTia Kamaiu ae 12 ana ririki e kuneaki “inanon te tembora, n tekateka ibuakoia taokita, ao a ongora irouna, ao a titirakinna.
“Ao ake a ongo Irouna a bane ni mimi n rabakauna ma ana taeka nako.” (Joseph Smith Translation, Ruka 2:46–47 [n Ruka 2:46, footnote c]).
Man rorona n ataei te Tia Kamaiu e kakaonimaki n irii waaki n reireinaki ao n reirei te euangkerio. Inanon te tembora, te Tia Kamaiu e reirei taekan te euangkerio nakoia ake a atatai riki ao a rabakau riki nakoina. E ngae n anne E ataia bwa karekean ao te angareirei n te euangkerio bon mwakoron ana “mwakuri Tamana” (Ruka 2:49) ao e kakawaki nakon Ana mition mai karawa i aon te aba.
N aki titiraki, Iesu Kristo bon te tia reireinaki ao te tia reirei ae akea n ai arona, e ngae inanon rorona n ataei ni karokoa E rikirake inanon Ana konabwai n oota ao n reirei te tua. Koroboki aika a tabu a taekinna nakoira bwa E “reitinako n taekin ma te akoi nakon te akoi, ni karokoa e reke ae bwanin” (taraa D&C 93:13). Te roronrikirake ni boong aikai a kateimatoai ni kaeti maiuia ma baike a ataia bwa a koaua, a kona naba ni bitaki ni koaua nakon te Tia Kamaiu ao Ana euangkerio ao a karikirakea te wanawana “teutana imwiin teutana, te reirei teuana imwiin teuana” (2 Nibwaai 28:30).
N te kairi nakoia te roronrikirake n aia karikiram ae e boou, te Moan Beretitentii a taekinna, “Ko weteaki iroun te Uea bwa ko na buokiia te roronrikirake n riki bwa taan rairaki nakon te euangkerio.”1 Ngkai ti kamatebwai ao ni katotonga ana reirei te Tia kamaiu, ti na kona n tokanikai ni boutokaia ara roronrikirake inanon mwanangaia n reiakin, maiuakin, ao n reirei ana euangkerio Iesu Kristo. N aron te Tia Kamaiu, ti kona ni katauraoira n te maiu n tamnei, kaeka nakon kainnanoia ara roronrikirake, kaungaia bwa a na kona ni kunei koauan te euangkerio, ao ni kaewenakoia bwa a na riki bwa taan rairaki ngkai a waaki inanon te onimaki.
Katauraoi n te Maiu n Tamnei
Imwin waakinan Ana mwakuri ni Maiuna ae mamate, te Tia Kamaiu e katauraoia n te maiu n tamnei rinanon te mwakuri korakora ni kamatebwai, te tataro, ao n aki mamatam. “E kairaki rake Iesu iroun te Tamnei nakon te rereua ba E na kaririaki iroun te riaboro. Ao E aki mamatam abwi te ngaina ao abwi te bong” (Joseph Smith Translation, Mataio 4:1–2 [ni Mataio 4:1, footnote b]). N tokin Ana aki mamatam, te Tia Kamaiu e kaitarai karirii aika mwaiti man te kaitara. I mwain kamatebwaian koroboki aika a tabu ngke Iesu e kaitara ma kataaki n aekaia nako man te koroboki ae tabu (taraa Mataio 4:3–10). Te katauraoi n te maiu n tamnei e katauraoia tiaki tii ibukin kaitaraan te kariiri n tokanikai ni Maiuna ni kabane, ma n reirei naba te euangkerio ma te korakora rinanon nako Ana tai n tataekina te euangkerio.
Reiakinaia te roronrikirake e tangira te katauraoi riki nakon tarataraan te boki n reirei tabeua te tai I mwain waakinan te angareirei. Te Uea e kairoro: “Tai ukoukora taekinan au taeka, ma ukoukora moa karekean au taeka” (D&C 11:21). Ti katauraoi n te maiu n tamnei man te tataro mwaaka ni kamatebwai ni koroboki aika a tabu ao n ana taeka te burabeti ae maiu n reiakina te reirei ae koaua. Ngkai ti katauraoi n te aro aei, te Tamnei ae Raoiroi e na kamatoai koauan reirei ao ni wirikiriki nakoira bwa ti na uringa maiuakinan te reirei are ti kona n tibwauaia.
Ngkana ti reireiniia ataeinnaine kakaawakin karekean te kaotioti i bon iroum, Estefani Melero mai Lima Peru Curco Titeiki e tuangaki bwa e na tibwa ana namakin ni karekean ana koaua ngke 14 ana ririki. E kakoaua nakoia ataeinnaine bwa ngke e tataro ni kan ata koauan te euangkerio, te bwana e taraa ni wirikiriki inanona are e aki kona ni mwaninga: “Ko ataia bwa e bon koaua, Estefani. Ko a kaman ataia.”
Ngkai ti kamatebwai ao ni maiuakina te reirei are ti taetaekini, ti kona riki are i aon te tia reirei—ti riki bwa taan kakoaua n te koaua.
Titiraki aika a na Iangoaki: Tera tabeua koroboki aika tabu riki aika a kaota aron te Tia Kamaiu ni Katauraoia n anga reirei? E kanga arom ni katauraoi n reirei ni bita nakoraoin am rongorongo?
Kabotoa i aon te Kainnano
Ao ni kaitiboona ma te tia tautaeka ae kairake, te Tia kamaiu e kaotia nakoia bwa E oota ni kainnanoia ake E reireiniia. Te tia tautaeka e titiraki: “Tera arou ae N na karaoia bwa e aonga n reke irou te maiu are e aki toki iai?” Imwiin ana reirei te Tia Kamaiu i aon bwaai aika kakaawaki ni kawakinan tuua, e kaeka te tia tautaeka, “Ni kabane [tuua] I a tia ni kawakin ma ngke I uarereke.” E ata nanon te tia tautaeka ae kabwaka iai “teuana te bwai” Iesu e kaewenakoa te mwaane bwa e na kaboonakoi ana bwai ni kabane, anganiia aika a kainnano, ao n iria. (Taraa Ruka 18:18–23.) Ngkana ti tataro ibukin te kaotioti ao n atai naano, kantaninga, ao ingaingan nanon te roronrikirake, ti na—karaoa ae ai aron te Tia kamaiu—ata aron reireiaia ao kaewenakoaia ni maiuakina te euangkerio n te aro ae nano.
Beretitenti Boyd K. Packer, Beretitenti n te Kooram n Abotoro ake Tengaun ma Uoman, e taekinna bwa ara “kairake a kaikawaaki inanon ana mwaake ara kairiribai.”2 Ngaira aika kaaro ao taan reirei, ti kona n ota n aia kanganga ara roronrikirake ake a kaitarai. Keven Toutai, te tia reirei n te Reirei n Tabati i Columbine Colorado Titeiki, e taekinna, “Te kakaewenako are a kaitara kairake e aki kona n reiakinaki taekana mai tinanikun te boki n reirei. Te kaotioti are i bon iroum are ti karekea ngkai taan reirei ni waaki nako ao ni kona ni katauraoia ara roronrikirake ni buakana Taatan ni katoa bong. I a tia n nooria bwa ko aki tii kona ni kaoti n te Taabati ma te boki n reirei ao n anga te reirei.”
Buokakiia te roronrikirake n reiakin ao ni maiuakina te euangkerio e irekereke ma te mwakuri are e ikotiia kaaro, taan kairiiri, aetuwaitia, ao taan reirei. Ngkai ti ukoukora te ibuobuoki mai iroun te Tamnei ae Raoiroi, ti kona ni kanakoraoa n reiakina te koaua are e na katauraoia te roronrikirake ibukin te karirii ao kakaewenako ake a kaitarai.
Titiraki aika a na Iangoaki: E kanga ni kaokoro te aonaaba n te bong aei ngke te kairake ngkoe? Baikara kakaewenako aika ko noori ake a kaitara te roronrikirake? Te reirei raa man te euangkerio, ae a riai n ota iai, are e na kona ni buokiia n tokanikai ni kaitarai kakawenako?
Kaoia te Roronrikirake bwa A na Kunea Koauan te Euangkerio
Te Tia Kamaiu e reireiniia Ana reirei n aro are e kaungaia bwa a na kunea te koaua ao ni karekea aia koaua i bon irouia. Ngke e reireiniia Nibwaite, e taku:
“I nooria bwa kam mamaara, n te aro are kam aki kona n oota n au taeka are I tuangaki iroun te Tama bwa N na taekin nakoimi n te tai aei.
“Mangaia, naako okiri batami, man iangoi taeka ake I a tia n taekin, ao bubutia te Tama n arau bwa kam na oota iai, ao katauraoi raoi ami iango ibukin te ingabong” (3 Nibwaai 17:2–3).
Ana reirei Kristo e irekereke riki nakon tii kanakoan rongorongo. E kairiia te roronrikirake n oota n te reirei i bon irouia. Ngkai ti kona ni kaririaki bwa ti na wareki nakoia taekan te euangkerio, ti na kona ni katamaroa riki ngkana ti buokiia ni kunei kaeka i bon irouia, ni kaungaia bwa a na karekei oin aia koaua, ao n reireiniia aron karekean kaeka ngkana iai riki aia titiraki. Ngkai e kabwarabwaraaki man te karikiram ae boou ibukiia te roronrikirake, Come, Follow Me: Learning Resources for Youth (Nakomai, Irirai: Bwaai n Reirei ibukia te Roronrikirake), ti kona naba ni kaoia bwa a na tibwa aia namakin ni maiuakinan te euangkerio ao ni kakoaua nakoia aia roro ni bwaai ake a ataia bwa e bon koaua.
Unimwaane Kim B. Clark, Itingaun n te Aono ao te beretitenti n te BYU–Idaho, e karakina taekan te kooram n riikan are aia atuwaitia e kabwarabwara te tataro ma ngaiia. N te aro ae aki kantaningaia, te beretitenti n te kooram n riikan e katea baina man taku, “I kan titirakina te kooram. Iraman mai iroumi ae e angananona bwa e na kabaeaki n tataro ni katoa moaningabong ni katoabong n te wiiki aei?” Ni kabane membwa n te kooram a katei baia ma tii temanna te ataeinimwaane, are e aki mwengaraoi are e aki kona n rinanon te kakaewenako. Te atuwaitia e tekateka ibuki ao e matakuakiniia membwa n te kooram n reirei ao ni kakoaua nakoia aia roro n taekan te tataro, ni buokiia ni karekea te mweengaraoi ni butimwaea te kakaewenako.
Titiraki aika ana Iangoaki: N te aro raa ae ko nooria taan reirei ni kaungaia kain te kiraati ni karaoi tibwanga inanon te reirei? Ko na kanga ni buokiia te roronrikirake ake ko mwakuri ma ngaia ni karikirakea te anua ni kamatebwaia te euangkerio? Irarikin te maroro, tera riki kawai ni kairia te roronrikirake n reiakina te euangkerio?
Kaunga te Rairaki
Te Rairaki bon te waaki ae teimaan are e irekereke ma reiakinan ao maiuakinan te euangkerio ni katoabong. E mwaiti riki nakon ataakin te euangkerio, te rairaki e “kantaningaira ni karaoi ao n riki iai.”3 I mwiin reireinaia Ana Reirei n taekan te mwakuri n nanoanaga iroun te I-Tamaria ae raoiroi, te Tia Kamaiu e kaewenakoia, “Ko na nako ao kakairi irouna” (Ruka 10:37). E kaungaia bwa a na karakaa riki nakon ae tii taan ongo te taeka ao a mwakuri inanon te onimaki i aon Ana reirei.
Ti riai ni kaungaia te roronrikirake ni mwakuri korakora ni maiuakina te euangkerio ibukina bwa te rairaki e aki riki inanon teuana te tai n reirei. Te rairaki e rereke riki ngkana te roronrikirake e oota raoi n te reirei ao e katea te baeten ni kamatebwaian te euangkerio ao ni maiuakina te raoiroi, ngkai ti kaungaia ni karaoia inanon Nakomai, Irirai.
Krista Warnick, te beretitenti irouia Kairake n Ataeinnaine i Arapahoe Colorado Titeiki, e taku “Te Roronrikirake ni boong aikai a kaitara ma te kakaewenako ae korakora ake I tuai n ongongo ni karokoa I a bon ikawai. I karikirakea au koaua riki ngkana I mwaing n otinako i bon irou ao Ia mwakuri i aon karaoan bwaai ake I reiakin n au kiraati ibukia Kairake n Ataeinnaine. Anganakiia kairake te kakaewenako ao te tai ni kamwakuri aia onimaki e kona ni buokiia ni karikirakea aan aia koaua n roroia ngkai a uarereke.”
Te kakaewenako n te rairaki bon tiaki tii are ti reiakinna n te euangkerio ma are ti bitia ibukin are ti reiakinna. Ti riai ni buokiia ara roronrikirake n oota n aia “bitaki n nano ae korakora” (Aramwa 5:14) man te nano e kona n aki riki n te tai ae waekoa, ma e na tabe n roko ngkai a karikirakea n reitanako te anua ni kamatebwai, tataro n tainako, ao ni kawakin tuua. Ngkai a karaoi bwaai aikai, a na ataia bwa nanoia, aia iango, ao aia mwakuri a na bitaki ni kaota ana kantaninga Tamara are i Karawa.
Titiraki aika a na Iangoaki: Tera tibwangan am mwakuri n reiakina ao ni maiuakina te euangkerio ae e karaoia n oin bitakim? E kanga ni kakorakoraaki irouia kaaro ao taan reirei n te Ekaretia ao taan kairiiri?
Boutokaiia Ara Roronrikirake
Nakomai, Iriirai e tei bwa mwakoron te mwakuri ni boutokaia te roronrikirake. N reitaki nakon tibwangan temanna ma temanna ni katoaia kairake n riki bwa taan rairaki ni koaua, “kaaro bon oin tibwangaia ibukin buokaia aia ataei n ata Tamaia are i Karawa ao Natina, Iesu Kristo.”4 Ngaira ake ti mwakuri ma te roronrikirake ti kona ni boutokaia kaaro ao n irira ana banna ni katoto te Tia Kamaiu ngkana ti katauraoi n te maiu n tamnei, ni boboto i aon kainnanoia te roronrikirake, ni kaoia ni kunea koauan te euangkerio, ao n anganiia tibwangaia ni mwakuri inanon te onimaki ao ni karekea te bitaki. Ngkai ti kataia n iriira Iesu Kristo, ti kona n riki bwa taan reireinaki ao taan reirei, ao ti buokiia taan kairiiri n taai aika a na roko n ara komiunite ao ara Ekaretia n riki bwa te tia reiakinaki ao te tia reirei ae korakora.
Katauraoi n te maiu n tamnei—kamatebwai, tataro, aki mamatam—uaia ni buoka te tia reirei ao te tia reireinaki n namakina ana wirikiriki te Tamnei.
Kristo i Emmauti, iroun Walter Rane © IRI
Te roronrikirake a kakorakoraia i bon irouia ngkana a tibwa te bwai are a rinanona ni maiuakinan te euangkerio.
KABWARABWARAN TE TAMNEI IROUN craig dimond
Kaaro bon oin tibwangaia buokakiia natiia ni kunea koauan te euangkerio, ao ni katoaia kairake n ataeiaine ao kairake n ataeinimwaane iai tibwangaia n tatabemania bwa a na kona riki ni karekea te rairaki ae bwanin. Taan kairiiri irouia te roronrikirake ao taan reirei a boutokai mwakuri aikai.
KABWARABWARAN TE TAMNEI IROUN Richard Romney