I Kona ni Karekea te Kakabwaia?
Art Crater, New York, USA
N ririki aika bati n nako I iira te tari temanna are I kakawaria ni mweengana n reireinna, Tari Schaaf, nakon te onaoraki n angan buuna te kakabwaia man te nakoanibonga imwaain koreana. Titita Schaaf a ibuobuoka aia ruu n te onaoraki ma te aine ae arana Annie Leddar, te aoraki ae a maan ma aorakina ae te kantia are akea tokina ao e a bon aki kaantaningaaki bwa e na maan maiuna.
I a kanakoa baiu ni katika te keeten are e a kaokoroi kainiwenen te onaoraki aika uoua imwaain ae I anga te kakabwaia, ma I a manga toki. I aki tangiria ni katinanikua Annie, I kabwarabwaraa terana are ti nang karaoia ao n tuangnga bwa e tangiria ni kakoaua te kakabwaia. E taku bwa e tangiria ni kan mataku. Buuna te mwaane, are e a tia ni mate, e a tia n riki bwa te minita n te aro teuana, ao e bon nano n te bwai are ti kakoaua. Tari Schaaf ao Ngai ti a waakina te kakabwaia ngke e kakauongo Annie.
Tabeua te bong imwiina, imwaain Titita Sister Schaaf e nakon mweengana man te onaoraki, Annie e titiraki ngkana e kona ni karekea te kakabwaia man te nakoanionga naba. Tari Schaaf ao ngai ti rangi ni kukurei n okira te onaoraki n anganna te kakabwaia. Annie e bon aki katokaki kaentiana, ma marurungina e korakora tamaroana.
E bon tangiria bwa e na reireinaki riki taekan te euangkerio, ai ngaia are I a tuangiia mitinare bwa a na kawaria n te onaoraki n reireinna. E kakauongo nakon ana rongorongo te euangkerio ma te nano ni koaua ao n rineia bwa e na bwabetitoaki. Ni katoa te wiiki imwiin bwabetitooana ti nakon te onaoraki n anaa Annie n nakon te taromauri n ana kaintekateka are wiira.
Ibukina bwa Annie e bon aoraki, e bon kangaanga bwa e na kitana ana kainiwene ao n nakonako, ma e aki maan ao e kunea oin kawaina n toro iroun te Uea. Ti anganna te taibi, ao e kabanea aoa aika bati ni katoabong n te onaoraki ni karaoi mwakuri iaon rongorongon te utu. Annie e maiu teniua te ririki maanna nakon are e kaantaningaaki ao ni katauraoi bubua araia utu ibukin te tembora imwaain matena.
Imwiin maten Annie, Titita Schaaf e karaoi mwakuri n te tembora n onomwii ibukin ana bakatibu Annie ake aine.
N aron ae I ataia, Annie bon ti ngaia kaain te Ekaretia mai buakoia ana utu. Ana utu aika maiu a bon kukurei ibukin rekerekena ma te Ekaretia, ma I bon koaua bwa a mwaiti kaain ana utu ake a tia ni mate ae a kakaitau ibukin te mwakuri are e karaoaki iroun temanna ibukiia.
Ti aki ataia ngkana aomata aika ti kaitibo mangaia a tauraoi ni butimwaea te euangkerio. I bon kakaitau bwa I kona n namakina moanakin te koaua—n unikaki inanon Annie imwiin are e kakoauaa te kakabwaia man te nakoanibonga—ni maiuraoi ao ni kakabwaiaia bubua natin te Tama are i Karawa.