Kairake n Ataeinaine ao te Babaire ibukin te Mitinare
A kanga kairake n ikawai aika ataeinaine ni kamwakura te reirei n te taetae ni burabeti ni kaineti ma te mwakuri n ibuobuoki ae bwanin taina.
N te maungatabu ni kabuta n Okitobwa 2012, e katanoata Beretitenti Thomas S. Monson bwa kairake n ataeinaine aika a tau man konabwai, a riai ni kaota nanoia n tangiria bwa a kani beku a katauaki bwa a kona ni karaoa aia mwakuri n ibuobuoki ni mitinare ni moa man te ririki ae 19, n oneamwiin te ririki ae 21.” E taku bwa ngkai kairake n ataeinaine “a aki mena i aan te aki kairoroaki ni beku n aron ae karaoaki nakoia kairake n ataeinimwaane,” a “karaoa te anganano ae moan te rangin kakawaki n aroia mitinare, ao ti butimwaai aia mwakuri n ibuobuoki.”1
E na kanga te titita ni baireia ngkana e nang beku? E tibwauaki i nanon rongorongo ake i mwina bwa a kanga tenan titita ni kairaki iroun te Tamnei ni baireia bwa te kawai raa ae eti ibukia.
Oin Bukina ae Bua
Ngkana iai ae titirakinai ngkai te kairake n ataei ngai ngkana I kan karaoa au mwakuri ni mitinare, N na kangai I aki. Nanou e torobaki nakon te kantaninga ngke I a ikawai, bukina tabeua ngke I anooria tariu ma mwaaneu aika a ikawai ni karaoa aia mwakuri ni mitinae. Ma I tuai raoi n iangoia n aron te bwai ae N na kona ni karaoia.
Ngke I a tokara au ka 21 n ririki, I moanna ni mimii n te namakin are kangai bwa I riai n nako ni mitinare, ma I aki roko n te tataroakinna. E a waaki te tai ma kanoaia, I a moanna n namakinna bwa iai te bwai teuana ae bua irou. I tuanga tinau aron au namakin, ao e tuangai bwa N na iangoa karaoan au mwakuri ni mitinare. E taku bwa ngke rorou ngaia, e namakina te namakin ae ti te arona ma are I rinanona. Karaoan te mwakuri ni mitinare bon te kaeka nakoina, ngaia are tao bon aio kaekana.
I maaku n tataro ibukin te mwakuri ni mitinare. Teuana bukina ae I aki kan iangoa te nako ni mitinare i bukina bwa n au iango I tuai raoi tau ni karaoia. I riai ni kitana aron mwengaraoiu ao tao n reiakina te taetae aika boou. Ti aki ti ngaia anne, I taku bwa e tuai raoi tau au atatai n reireia te euangkerio. Ma ngkai I tataro ao bon iai bukina, I namakinna bwa e a keenako maaku. Te kaeka are I karekea e bon rangin korakora: e tangirai te Uea, ao E tangirai bwa n na karaoa au mwakuri ni mitinare.
I mimii man te onimaki ae I namakinna i mwin are I karekea te kaeka. I aki manga namakina te nakonnano ke te aki tau ni mitinare. Ni iangoakina raoi ao I kukurei n tibwaua te euangkerio, ao I moanna ni karaoi au beeba ibukin n te mwakuri ni mitinare. I weteaki bwa N na nako ni mitinare te tabo ae Utah Salt Lake City Tembora Tikuea bwa n na Mitinare iai.
Rebecca Keller Monson
Te Maiu Ni Mitinare
Ngke te 17 au ririki, aomata a titirakinai bwa I kaan nako ni mitinare. I tuai ni iangoia moa, E tuai n reke iangoana raoi.
Ma ngke e a roko au ka 21 n ririki, I moanna n iangoia. I wareka au kakabwaia mairoun te tamanuea, n taetae ma au karo, ao n tataro.
E aki roko ni kaoti taian ingainga n nano, I aki namakina ae I kainnanoaki bwa N na mitinare. I iangoa ana reirei Beretitenti Gordon B. Hinckley (1910–2008), are e taku bwa a butimwaeaki mitinare aine, a bon “aki mena i aan te katabeaki n nako ni mitinare.”2 I kauringaki naba n ana taeka te Uea i nanon te Doctrine ao Covenants: “Ngkana iai nanomi ni kani beku ibukin te Atua, kam weteaki nakon te mwakuri” (4:3)
Te boki ae tabu anne e buokai ni baireia bwa n na aki karaoa au mwakuri ni mitinare. Ngke I tuanga te Uea i nanon au tataro ibukin au babaire, I namakina te rau ao te kamatoaki bwa iai kawai are I kona iai ni mitinare n ae aki bwanin taina. I kunea ngkanne bwa I kona n tibwaua au koaua ni kawai aika a mwaiti—rinanon maroroakinan ana nanoanga te Uea, i nanon te reirei ni kakawari, ke i nanon karaoan rongorongon te utu ke te mwakuri n te tembora. I anga nanou nakon te mwakuri ni mitinare man au nanomatoa ni maiuakina te euangkerio ao ira ana kairi te Tamnei.
Amy Simon
Ninikoria
Ni moan te ririki 2010, I korakai ibukin tabeua kakaewenako ao ni waakina nakonakou bwa e na itiaki au iango. I nanon nakonakou, I namakina te Tamnei ni wirikiriki bwa I riai n aki raraoma ibukin taai aika ana roko. Ngke I tabe n iangoa kanoan taai aika a na roko. I nanon rinanoan au kouru ao I angoia bwa N na kabanea au reirei, I kairaki iroun te Tamnei bwa N na iangoa karaoan au mwakuri ni mitinare. I tuai man iangoa taekan te mwakuri ni mitinare mai mwaina, ma ngkai e a moanna n anaaki nanou n te iango aio, ngaia are e a rangin korakora riki kukurein nanou ni kani beku. Ma e ngae n anne, I a baireia bwa N na kainnanoa riki te tai n iangoa raoi taekan te babaire aio ae bubura.
I nanon tabeua namwakina ake i mwina angin te tai I namakin taian wirikiriki ni karaoan te mwakuri ni mitinare. Ngkai I teimatoa n namakina te nano ae ti te arona ao te kukurei ngkana a roko te wirikiriki, i raraoma ao te maaku e moana n roko naba. I ataia bwa aine a kaungaki ni beku ngkana iai nanoia ma a aki kairoroaki bwa ana karaoia. N te tai aei, I karekei kakabwaia n te nakoanibonga man tuangai bwa te Uea e na kukurei bwa tera are I rineia.
N tain te motirawa n te tiamwa ao iai kain au ruu are e a tia ni mitinare. E taku bwa e namakina te maaku main nakona ni mitinare mwin anne e a baireia bwa e na nako ni mitinare. E buokai bwa n a ota raoi bwa te Tamnei e aki taetae rinanon te raraoma ao te aki mamaku (taraa 2 Timoteo 1:7). Ngkai ti taetae, I ringaki iroun te Tamnei. I oki nakon au ruu ao ni wareka au reta mairoun raoraou are e karaoa ana mwakuri ni mitinare. I kaungaki bwa n na wareka Iotua 1:9, ao I namakinna bwa I kairaki iroun te Tamnei bwa N na taraia.
Taian taeka a ewara tamneiu: “Ko na korakora ma n ninikoria; tai maaku, ao e na tai bwara nanom: bwa E memena Iehova ae Atuam i roum ike ko na nako iai.” I namakina bwa titebo ngke e taetae te Uea ni kaineti nakoiu. I ataia bwa I kona ni karaoa au mwakuri ni mitinare. I aki riai ni maaku—N na aki kona ni karaoia n tii ngai; te Uea e na memena i rarikiu.
Teuana te namwakaina nako I karekea weteau n nakon te tabo ae Philippines Iloilo Mitiona, ike Iotua 1:9 bon te botoniango n te mition.
Kristen Nicole Danner
Te Mition ae Kaokoro
I a tia ni baireia bwa N na karaoa au mwakuri ni mitinare ae bwanin taina ni kabanea maiu. Ma ngke I a nako n te reirei ae rietata n te Brigham Young Iuniwetiri (Utah, USA), I a moanna n nako n nano. N na kanga n ataia ae N a bon riai ni karaoa au mwakuri ni mitinare? I kabanea teuana au ririki i mwain koron au ka 21 n ririki ni bubutia te Tama are i Karawa bwa e na tuangai ngkana I riai ni mitinare. Ngkanne temanna mai buakoia au burobetia e reirei taekan te aro e taekina te bwai teuana are ngaia are e bita maiu: “Te Uea e aki kona ni kabuta te kaa are tei n te bwaake.” I a baireia bwa n a riai ni mwakuri
I kanakoi au beeba, e roko baireau bwa nang nako ni mitinare, i kaboi kunnikaiu ni mitinare, ao ni buti n te kaa mani mwengau mai Utah nako North Carolina—i nanon katauraoan bwaai ni kabane ibukin au mitinare ma te tataromwaka, kamatebwai, ao te aki mamatam.
I mwina ao I a karairaki nakon mwengau i North Carolina, iai te kairake n ataeinimwaane are I kaitibo ma ngaia ngkoa n te reirei te tenimwane aio e kiba n te wanikiba bwa e na noorai, ao ngke e a roko ao ti maroroakina aron taekan ara reitaki.
Au korakora n tataro ma au bubuti riki, bwa N a teimatoa n namakinna bwa te Uea e onimakinai ni karaoa oin au babaire. I namakina tinebun te katabeaki ma te kakoaua aei a karewerewe arona ngkana I rinea te onimaki, iroun te Uea bwa e na boutoka au babaire.
Tebwina te bong i mwain mwanangau, raou e tuangai ana rongorongo I taona nakou ni mitinare ao ni karekea te tai irou ni iangoia. I baireia bwa N nang kabaeai, te Tamnei e kamatoa nakoiu ao raou bwa aei taina ae riai.
E ngae ngke I aki karaoa au mwakuri ni mitinare ae bwanin taina, te katauraoi ibukina e bita maiu. N rangin kaan ma te Uea e buokai n riki bwa te aomata are E kainnanoai bwa au mitinare n na riki bwa te buu aine ao te tina.
Cassie Randall
Bwaika a Rinanoaki ni Bongin Maium
I kakabwaiaki ma au koaua ae korakora ao au tangira ibukin te euangkerio i nanon rorou n ataei, ma I aki uringa te tai are e na kaota iai koauan anuau ngke I ataia bwa karaoan te mwakuri ni mitinare e bon eti. I ataia n tainako bwa N na nako. I moantai ni katea au kouru bwa n na maeka n te kawai are n na riai ni karaoa au mwakuri ni mitinare.
Ngke I moana katauraoan au beeba ni mitinare, I aki mamatam, tataro ao n nanakon te tembora. Ngkai I mwakuri ma au bitiobi, I teimatoa n namakina te rau are I a tia n namakinna rinanon maiu ibukin karaoan te mwakuri ni mitinare.
Te waaki aei e boni matoatoa n taai tabetai: te maiu e taraa n rangin bobuaka, ao te reirei ma te mwakuri a taraa riki ni kairoro. I mena n te reirei ae rietata n raroanako mairouia au utu, ao e taraa n ae raoraou a bane n tia ni mare. E kakamaku atakina bwa aomata ake I rangin tabe ma ngaiia a teimatoa ni bitaki n te tai are I kitania iai.
Ibukina bwa akea te tai ae Irinanon te maiu n tamnei are e na kamatoa au babaire n nako ni mitinare, e bebete te nanououa ngkana a matoatoa bwaai. Ma te Uea e kakabwaiai i mwin are i a tia ni karekea weteakiu nakon te Chile Santiago Mainiku Mition ni karikirakea au tangira ibukia aomata i nanon au mitinare, engae i mwain are I nako. E mwaiti ngkai te bwai ae I rinanona i nanon maiu are i kakoaua bwa te mwakuri ni mitinare bon te rinerine ibukiu.
Madeleine Bailey
Te maing: kamatata n te tamnei iroun Robert Casey; angatai: tamnein te neimtaeki iroun Emily Leishman Beus © IRI
Ieta: kamatata n te tamnei iroun Derek Israelsen; te atai: tamnei ni kamatata iroun Jerry L. Garns