Taraan Bwaai Aika Tamaroa iroun Kylie
Ti aki kona ni kaitara i bon imarenara. Ti kona n riki bwa raao?
Kamataata iroun Taia Morley
N te kaaua ni koraki, I tataua te rine n te kiraati. Bwaai ni kabane ibukin taekan te kiraati anne e bon kororaoi—ma tii Kylie (te ara e a tia ni bitaki). E kuri ni buakaka nakoia aomata ni kabane n ikotaki ma ngai. I nooria ni keebutuia tabeman n te kawai n nakonako, ao e keebutuai naba n taai tabetai. N na bae n okira mweengau ao n tang ibukina I aki oota raoi bwa ibukin tera ngkai e kukuaai.
Akea ae e riki bwa raoraona. Tii ngangaia n ana taibora n tain te katawanou ibukina bwa akea ae tekateka irarikina. I tuanga tinau taekan Kylie, ao e anganai tabeua taeka ni kawanawana are e bita maiu: “Tao e kainnanoa raoraona.”
E kakubanako te iango aei nakoiu. N na kanga n raoiroi nakon te aomata ae aki kauoua iangoana ni weteai n aara aika a kakamaraki? I rawa, ma e ngae n anne, I baireia bwa n na tamaroa nakon Kylie ao ni kataia n oota irouna. Ngkai I a rangin kinaa riki, I kunea bwa e rangin tikiraoi. I waekoa n reiakinna bwa maiuna e aki rangin raoiroi n aron are I kona n iangoia. Iai ana kanganga ni mweengana are e maeka iai, ao e na bae n totokoi maroroo ma te taeka ae te “utu.”
N te bong teuana n tain te katawanou, I tekateka ma raoraou. Ngkai Kyle e buakaka nakoia tabeman, iai tabeman aika a aki raoiroi nakoina. A moanna ni waaningareia Kyle, n taetae n takarua bwa e aonga n ongo. A taekin taeka aika, “Nakomai tekateka irarikira—KO AKI!” Tera te boi anne? O, bon Kylie!” ao “Kararoako mairoura!” I tekateka ikekei ni kakauongo.
Imwiina I a ongo te bwanaa ae uarereke i atuu: “Karaoa te bwai teuana.” I teirake ao n namakin maata aika tebwi ma uoua n taraai. I taku “Katokia!” “Ibukin tera bwa kam na taekin bwaai aikanne nakon temanna? Tii karaoa ae tikiraoi nakon neienne!” A bane ni mabu ni kabane. Ngke I tekateka, I taraa Kyle. E tanrikaaki ao n taraai ma te kakaitau ae itiaki.
N te ka onoua ni koraki ao e a kaan roko au ka te 12 ni koronririki, I tangiria ni karaoa au bootaki ma tabeman raoraou. Ngke e titiraki tinau ngkana iai ae I kan kaoia, I ongo te bwanaa are mai imwaina i atu: “Kaoa Kylie.”
“I kan kaoa Kylie,” I tuanga tinau.
“Ko koaua raoi?”
I katoutoua atu. Imwiin au bootaki ni koronririki, Ngai ma raoraou, n ikotaki ma Kyle, ti riki bwa raao aika a raoiroi n te aro are ti ikoikotaki ni katoa Kanimabong inanon ara kabane n reirei ae teniua namwakaina. Angin te tai e roroko Kyle. Ti a riki bwa raao aika a itangitangiri.
Ngkai I a mena n te ka waaniua ni koraki ao ni mwaing nakon te titeiki teuana, ma I rereitaki ma Kylie n angin te tai, are e teimatoa n riki bwa Ngaia temanna mai buakoia raoraou. N taai tabetai raoraou ake tabeman a titiraki bwa ti kanga n rangin rena.
“N te ka aua ni koraki e kukuaia aika a uarereke, ao ti uaia n ikakairiribai i bon imarenara,” I taku.
“E raoiroi, ngkanne kam kanga n riki bwa raao aika a itangitangiri?”
“I taraa raoiroina. Ni kabane aomata iai raoiroia, ao I buokia ni kunea raoiroina.”