Reirei aika Auaana n te Mweenga

Iroun Darren E. Schmidt

Aua te kawai aika ti reireiniia ara ataei kakawakin reirei n te maiu.

Karekean te tai n reirei ma natira aika waniman e a tia n riki bwa te kakaewenako ao te kakukurei. Ma atakina bwa “te mweenga boni ngaia te moan ao te kabanea n nakoraoi n tabo ibukiia ataei n reiakina reirein te maiu,”¹ I a tia ngai ma kaain abau ni kataia ni karaoi bwaai ni kabane aika ti kona ni buokiia ara ataei n reiakin taian reirei aikanne. Aikai tabeua reirei aika a tia n rangin ni ibuobuoki nakoira.

Karaoi Bwaai Aika Kabanea n Tamaroa

Ngkai a rangin ni katabeaki ara ataei n taian waaki ni kakukurei, babairean aron te mwakuri e moanna n rangin n rangi n riai. Unimwaane Dallin H. Oaks man te Kooram n Abotoro n te Tengaun ma Uoman e a tia ni kauringiira bwa “tiaki ti bukina bwa e tamaroa te bwai teuana tiaki ngaia bukina raoi ae tau ibukin karaoakina. … Tabeua bwaai a raraoi riki nakon te tamaroa, ao aikai bwaai aika riai n tuangiira bwaai aika kakawaki riki inanon maiura.” E taekinna riki: “A riai kaaro ni karaoa te mwakuri ni karekea te tai ibukin te tataro n utu, kamatebwai iaon booki aika tabu n te utu, bootaki n utu n te tairiki, ao bootaki riki tabeua aika kakawaki ao n tatabemaniia imwiin temanna ma temanna are e bauta te utu ni kabane ao ni kanakoraoi aroia ataei iaon bwaai ibukin bwaai aika kakawaki n te maiu ae e na roko. A riai kaaro n reirei bwaai aika kakawaki n te euangkerio rinanon te bwai ae a karaoia ma aia ataei”²

E a tia ni kakoauaki aei bwa te reirei ae tamaroa ibukin ara utu. Ngkai ti a tia ngai ma kain abau ni karaoa te waaki ni kakukurei itinanikun te mweenga bwa kanga te tai n iango ao n tataro, tabeua bwaai ake ti a tia n iangoi a otinako bwa bwaai aika akea bonganaia. I rangin ni mimii ngke I titirakiniia ara ataei ngkana a tangiria n riki bwa kaain te tiim ni bwatiketibooro ma ngai bwa aia tia reirei. Aia kaeka e kangai, “Tiaki iangoana anne,” n reitaki ma, “Dad, iai ara bwatiketi i moan ara auti, ao ti tangiria bwa ko na takakaro ma ngaira ma kaain rarikira. Ti karekea te booro n angiin te tai!”

Kamatebwai ao Mwakuri Iaon Booki Aika Tabu

Iai te kaokoro ae korakora imarenan warekan booki aika tabu ao kamatebwiakiia. Te burabeti n taai akekei Iotua e reirei bwa te tokanikai ni kamatebwaiakan booki aika tabu a reke ngkana ti “iangoi ni ngaina ao ni bong” ba “ko aonga ni kawakina te kakairi ni bwaai ni kabane aika a koreaki inanona” (Iotua 1:8; e kairaki karawawataan te iango). N tain ara kamatebwai n utu iaon booki aika tabu, ti a tia n rangin n tokanikai ngke ti anganiia ara ataei aia tai n iangoi titiraki ao ni kanakoa nakoia te kakao bwa “a na karaoi nanon bwaai ake a koreaki inanona.”

N te tairiki teuana ti amwarake itinaniku ao ti wareka taekan bwakaia Nibwaite n ana Boki Moomon. I bon rangin n rotaki ngke I titirakinia ataei bwa bukin tera n aia iango a tia n rairaki tenaan Nibwaite nakon te buakaka. Celeste ae onoua ana ririki e taku bwa bukina a tia ni katoka aia tataro ni katoabong tenaan Nibwaite ao Reimwanaite. Ti bane ni kakoaua bwa bwakaia tenaan Nibwaite e moanaki man mwaningaia n tataro ao bwaai riki tabeua aika uarereke. N te tai anne, e roko te iango irou bwa N na kaoia ataei bwa a na tataro ma te iango ao te namakin ae korakora riki.

N te bong are imwiina I titirakiniia bwa e kanga aron aia tataro. Aio are e anganiia aia tai n tibwaua te bwai are a tia n nooria ao n anganai riki au tai n tibwaua au koaua iaon te tataro. Tiaki ni kabane kamatebwai n te utu iaon booki aika tabu ae a tia n nakoraoi n aron aei, ma ngke ti a tia ni maroro ao ni kaoia bwa a na karaoia bwa mwakoron ara reirei, a tia booki aika tabu n rangin ni uaana riki.

Buokiia Ataei Bwa A na Katabeaki

Ti a tia ni kunea te korakora man anganakiia ara ataei te mwakuri ao ni katikua irouia bwa ana kanga ni karaoia bon irouia. Ngke ti kariaia ara ataei bwa a na irekereke ao n ibuobuoki ni karaoi tabeua iango n te utu, a na kona n riki bwa taan ibuobuoki aika a nakoraoi. A karikirakea naba te iango ni bwaibwai ao ni bukinaki ao ikai are a reirei bwa a na “karaoi bwaai aika mwaiti n oin nanoia, ao ni uota te kokoaua n tainako” (D&C 58:27). Aikai bwaai tabeua ake e a tia ni buokiia ara ataei bwa a na katabeaki riki iai:

Ibukin bootakin te utu n te tairiki, buokiia ni katauraoa te reirei, te kibu, ke te tarena man oin aia rinerine.
Kariaia bwa a na rinea te anene ibukiia bwa a na bane n aneneia n tain te kamatebwai ni booki aika tabu n te utu ao kaoa te ataei bwa e na karaoa te tataro.
Kariaia bwa a na ibuobuoki ni babaire ao ni bukinaki ni bwaai tabeua ibukin te mwananga n te utu.
Karaoa te reirei n te utu ma ngaia ibukin taekan te mwane ao buokiia ni kareke iango ibukin te bobwai.
Reireiniia bwa a na kanga ni karaoa te mwakuri ao anga te bukinaki nakoia bwa a na tabeakina te mwakuri anne inanon te wiiki anne.
Karaoa te mwakuri n ibuobuoki ni katoa namwakaina ao anganiia bwa a na iangoa te utu are a na buokia.
Karekea aia tai n tatabemaniia bwa a na rinea te aomata are a na kawaria n te Tabati anne.
Kariaia bwa a na rinea te bootaki ni kakukurei n te utu ibukin te tairiki inanon te namwakaina.

Kairiia

Iai taai ake I a tia n namakinna ngai ma kaain abau ae kanga taan kawakin tiibu ni bobotiia ara ataei ibukin te tataro ke kamatebwaian booki aika tabu. Ma n taai tabetai ti a tia n namakina te namakin ae tamaroa are e reke ngke ti a tia raoi n riki bwa taan kawakin tiibu ao n tabeakiniia ara tiibu ake a uarereke. Ngkana tiaki karaurau, ti kona ni kabuai taai ni kawakin tiibu aikai.

Iai n te tai teuana ae roko ngke I tabe ni kamatuia ara ataei n aia kainiwene. Temanna mai ibuakoia natiu mwaane e titiraki, “Tamau, tera ae kaririiko?”

I kubanako n te titiraki anne.

E a manga taku, “Ti a tia n taekina te bwai ae kaririiko, ao ti mimi bwa tera bwaai aika a kaririiko.”

I ataia bwa aio te tai ae tikiraoi n reireiniia, ma I rangin ni kua imwiin te mwakuri n te tai ae abwabwaki n te bong anne. I aki tangiria ni kani maroro n te tai ae a bwabwaki ma ataeinimwaane aika uoman aikai n te tai ae a bwakanako aei, riki n tairikin taai n reirei.

Ma e ngae n anne, e roko n au iango karakinan te Tia Kamaiu n te mwanibwa. E ngae ngke imwiin te nakonako 30 te maire (48 km) ke e raka, E kabanea ana tai n reireia te aine ae te Itamaria (taraa Ioane 4). I iangoia bwa e kona n riki aei kanga te tai are e mena iai te Tia Kamaiu n te mwanibwa, ngaia are I tekateka ao n titirakiniia ngkana a taku bwa te bure te kaririiaki. Iai te aki karongoa n te tai ae maan, ao imwiina ti moanna n taetae ao ni kakauongo bon imarenara. I reireiniia aron kaitiboon te Tia Kamaiu ma Tatan (taraa Mataio 4) ao ni kaota au koaua ibukin kakabwaia ake ana reke man te tokanikai iaon te kaririaki.

Bon te tai teuana ae onoti ngkai ngai te karo. Ti matu imwiin te tai are ti tataneiai iai, ma te kukurei are I rinanona naba bon te angakarea n te matu ae uaana.

“Teuana tabera ae rangin ni kakawaki bwa ti na kaeka nakon te ataei ngkana e titiraki, n uringa ae aki n tainako n titiraki, bwa aki n tainako ni kan reireinaki, bwa a bon aki kakauongo n tainako,” e reirei Unimwaane Richard L. Evans (1906‒71) man te Kooram n Abotoro n te Tengaun ma Uoman. “Ao n tainako ti na kairiia nakon oin aroia n aia tai, ao tiaki n tainako nakon arora, ao n ara tai. … Ngkana a kunea bwa a kakoauaira ma aia titiraki aika aki kakawaki, a kona imwiina n onimakiniira ma aia titiraki aika a kangaanga riki.”³

E Rineaki ao E Buokaki iroun te Uea

Te katabeaki ibukin tararuakiia natin te Atua bon te bwai ae rawawata. Ngkana I namakinna bwa I aki tau n nakoau ni karo, I kauringai n te bwai are e taekinna Unimwaane Neal A. Maxwell (1926‒2004) man te Kooram n Abotoro n te Tengaun ma Uoman: “Te Atua naba arei are e katuka te itoi n te tabo ae riai 1000 te ririki imwain ae kaoti iaon Betereem ni katekeraoa bungiakin Iesu e a tia n anga te oota nakoira n tatabemaniira n te aonaaba n te aro bwa ti na kona, ngkana ti na, karekea te oota ni maiura n tatabemaniira nako, n te aro bwa e na aki ti kona ara oota ni kairiia tabeman ma e na mwakuri ibukiia naba.”⁴

E uotai rake te rongorongo aei ngkana I bwarannano. E angan kain abau ao ngai te korakora n ara konabwai ni karo, n ataia bwa a tia ara ataei ni katukaki inanon ara “kangaanga” ma ibukina ao bwa Tamara are i Karawa e onimakiniira.

Ke E kakabwaiaia ami utu n ami tai ni uaia n reiakina te euangkerio, buokiia ami ataei bwa a na katabetabeaki, ao kabonganai raoi taai n reirei aika kakawaki aikanne.

Te Tiibu ae Bua, iroun Del Parson