Te Nimaua ni Miniti n Reirei

Iroun Christopher James Smith

I miti kabanean tokin te tekateka man tii nimaua te miniti. Ni koauana te tai anne e na aki tuukai man kaean au angabeeba n te iuniwetiri.

N au kabanea n ririki n te iuniwetiri, N na kaea te bukamaru ibukin te angabeeba ike ni kabane taan angabeeba aika a boou, ni kuniikainiia n te bwara ao te kaaun, a karekei aia tikurii mairoun te aomata ae e roko ae bubura nakoana. I kakantaningaa te tai aei, bukamaruan te aua n ririki ae matoatoa ibukin te kamatebwai. Ni moaningabongin te bukamaru, I karekea au reta man te iuniwetiri ma e aki reke taina ni kaukaki.

E moanaki te bukamaru n 1:30 imwiin tawanou, ao I a tia ni bairea au tai n rawetamnei imwaain ae e waaki. Te karautaeka, iai te katei raain ibukin taian tamnei, ao I taraa te tai ae e a uakaan ma boon te tai ni kaukuuki. Ma I a tataninga n te tai ae maan are I baireia bwa n nang rawetamnei. N tokin banen te 10 ni miniti imwaain waakin te angabeeba, I biri nakon te kawai n rinnako.

Ngke I a roko ikekei, ma e boni ngae n anne, a bonotaki taian mataroa ao n teinaki irouia taan tararua n te tabo. I bubuti bwa N na rinnako, ma a aki kariaia, ao a tuangai bwa I riai n roko te 15 te miniti n tekateka. Anne bon te moan ae I a tibwa ongo ibukin te tua aei, ngaia are I a ngurengure. Ma taan tararua a bon aki mwaing. I a tia ni mwakuri korakora inanon aua te ririki ni karekean te tikurii aei, ao I aikoa kona ni karekea n tain te bukamaru. I a riai n tekateka n te kaererii ma taan n roko ni mataku.

Ngke I a okira mweengau ao ni kauka te reta are I karekea n te moaningabong anne, I wareka te kaetieti ae oota raoi bwa e riai te tekateka n te katautau ae 15 te miniti ni moantaai ke e na aki butimwaeaki rokom. I namakinna bwa kanga ai aron temanna mai buakoia kibono ake a burababa n ana taetae ni kaikonaki te Tia Kamaiu:

“Ao ngke [kibono ake a burababa] a nako ni kaboa te b’a, ao e roko te tia iein; ao a rini ma ngaia n te baka nake a tauraoi aia b’ai: ao e a bonotaki naba te mataroa.

“Ao rimwi a roko kibono ake raoia, ao a kangai, te Uea, te Uea, ko na kaukia nako ira.

“Ao e kaekaia ni kangai, E koaua ae I a tuangkami ba I aki kinaingkami” (Mataio 25:10–12).

E ngae ngke I tuukaki man kakawakin te bukamaru ae kakawaki e taraa n ae iai mwiia ae korakora are e taraaki bwa te kairua ae uarereke, I ataia raoi anne bwa ai aron naba taian rinerine ma mwiia. Ngkana I tabeka tabon te kai are tei iterana mai iaontano, I tabeka naba tabona are te iterana. Ao ai aron naba te rinerine, I aki tii rinea te mwakuri ma mwiina naba ae irekereke—ma e ngae n anne aki noorakin mwiia aika a riki.

Bon Tatan are e tangiriira bwa ti na kabanei ara tai iaon taian rinerine n aki iangoi mwiia. E aki toki ni karaoia angin te tai ni kamwaneira ni kabanei ara tai ni barui bwain te maiu n rabwata, “n aron nanon te iriko” (2 Nibwaai 2:29), ao kakukureian te nano ae tawe.

Tamara are i Karawa, n te itera are teuana, e tangiriira bwa ti na kabanei ara tai iaon te kukurei ao kakabwaia aika akea tokiia. E kantaningaira bwa ti na iangoi mwiina aika a na riki ngkana ti karaoa ara babaire ao ibukin mwiia aika a riki are bon mwakoron ara kakamwakuri: “Ao a inaomata n rinea te inaomata ao te maiu ae akea tokina, rinanon te Tia Tei ae korakora, ke n rinea te tautoronaki ma te mate” (2 Nibwaai 2:27).

E ngae ngke I aki kakaitau ngkai I miti karekean au tikurii ae kinaaki, I kakaitau ibukin te bwai ae I rinanona aei are e reireinai inanon te kantaninga ae akea tokina—are I aki tangiria ni karaoa te rinerine are e na tukai man butimwaeakiu nako nanon mweengan te Tia Iein. Nakon ae ko na kainaki itinaniku ma “Ba I aki kinaingkami,” I kekeiakimwaaka ni karaoi rinerine ake a na butimwaeai n ongo ae E na kangai, “Ko na rin i nanoni kimareirein am uea” (Mataio 25:21).