Teei ni koaua iaon Reirei ao Kainibaire aika RietaataRiki
Te botoniango man te Miutuo n 2013 e anaaki man Doctrine ao Covenants 87:8: “Ai ngaia are, teei ngkami n taabo aika tabu, ao n aki kamwaingaki, ni karokoa rokon ana bong te Uea.” Te titiraki are I kaantaningaia bwa ni kabane kairake ni mwaane a na iango raoi rinanon te ririki ae na roko bon, I tei inanon taabo aika tabu?
Ngkai I a tia ni kaitibo ma kairake n ataeinimwaane aika aki mamaaku ni katobibia te aonaaba, I a tia ni kakoaua i bon irou a kangaa ngaa n aromi n tia ni karaoa aio ni kawai aika bati. Kam tei n taabo aika rangi n tabu ni katoa te tai are ko rin n te tembora ni karaoi bwabetito ibukiia maate. I kaungai ngkami ni kabonganai taii ake a tauraoi n rin n te tembora ao n tau n taainako ni karaoia. Ni katoa te bong are ko kakoroa nanon tabem ibukin te Atua, ko tei n taabo aika tabu ao ko a mena n te tabo are ko na tabekiia tabeman iai. Ko tei n taabo aika tabu ngkai ko katauraoi, kakabwaia, ao ni kabuta te toa ni katoa Taabati. Ko tei n taabo aika tabu ngkana ko tibwaua te euangkerio ao ngkana ko mwakuri bwa te minita ngkoe ae tataninga—temanna are e aki toki ni konaa n taainako, n tatauraoi, ao n tau ni mwakuri ao ni kakorakoraia tabeman.
Ngkai te tia taua te nakoanibonga ae te Aaron, ko a tia n anganaki te mwioko bwa kona kauringiia, kabwarabwara, kairoroia, n reireiniia, ao ni kaoia ni kabane bwa a na nakon Kristo (taraa D&C 20:59). Beretitenti Harold B. Lee (1899–1973) e taku: “Ko aki kona n tabekaarake temanna te aomata ni karokoa ae ko tei ni koaua iaon reirei ao kainibaire aika rietata riki nakoina. … Ko aki kona ni kaura te ai inanon tamnein temanna ni karokoa ae e bon bue moa inanom.”1 Kairake n ataeinimwaane, nanon aio bwa kam riai n teimatoa ni mwakuri ni kakorakora ami kakoaua ao n tauraoi n tibwauaia n taainako.
Iai tabem ae tabu bwa ko na riki bwa te bwai ni mwakuri ngkoe inanon bain te Uea. Ngkai ko tataro ao ni kamatebwai booki aika tabu, kataia ni kawakini tuua, ao ni kakauongo nakon ana wirikiriki te Tamnei, ko na kuneko iaon taano aika reitaata. N tokina, taabo ake ko mena iai a kona n riki bwa taabo aika tabu. Ngkanne, a kaoti bwaai, e na iai korakoram, ninikoriam, ao te kona ni buokiia n tabekiia tabeman. E na iai iroum te mwaaka ao te kamanoaki are te Uea e berita iai nakoia ake a tei n taabo aika tabu.
I tangira ana taeka Beretitenti Thomas S. Monson are e taku ibukin berita aikai ngke e tuangiira bwa ngkai ti kaaniate Uea, “ti na namakina Tamneina inanon maiura, ni karekea iroura te tangira ao te ninikoria n tei ni korakora ao ni matoatoa inanon te tamaroa—n ‘tei … n taabo aika tabu ao n aki kamwaingaki’ (D&C 87:8).
“Ngkai a bitaki bwaai ake a katomimiira ao te kainibaire n arora aika tamaroa ibukin te botanaomata a reitinako n uruaki i matara aikai, ti kona n uringa ana berita te Uea aika kakaawaki nakoia ake a onimakinna: ‘Ko na tai maaku; bwa I mena iroum: tai kuba, bwa bon Atuam ngai: N na kakorakorako; eng, ao N na buokiko naba’ Itaia 41:10.2