Ibukin Kakorakoraia Kairake
Te Reirei
Karikirakean te rabakau e anganiira uaara aika a korakora ni kakoroan bukin ana kantaninga te Uea.
Ma te ingainga n nano ao te tabeaianga ibukin mweeraoin tamneia, Iakobwa e reireiniia ana aomata Nibwaai “bwaai ngkai, ma aika a na roko” (2 Nibwaai 6:4). Aikai bon ana aomata, ao e tangiriia. E reireiniia bwa antai ngaiia ao ana berita te Uea ni kaineti ibukiia. Ngkai e reireiniia taekan te Tia Kamaiu, e takarua n tang: “Ai korakorara tabun Atuara! Bwa e atai bwaai ni kabane, ao bon akea te bwai ae e aki ataa taekana.” (2 Nibwaai 9:20; katuruturuan taekana).
Anne kakawakina ngkana ko iangoa kakawakin te reirei. Tienture ake mai mwaaina, n iteran te aonaaba are teuana, Te Karo ae Atam e “ukoukorii kakabwaia ibukiia kaaro” ao ni baireia “naba n riki bwa ngaia temanna are e karekea te rabakau ae korakora, ao n riki bwa te tia ririmwi ae korakora ibukin te raoiroi ao ni karekea te rabakau ae korakora riki” (Abraham 1:2).
Ngkami natin te Atua mwaane ao aine1 ao “ngkami natia burabeti; ao ngkami kaain … te berita are e tabu are e karaoia te Tama ma [Aberaam]” (3 Nibwaai 20:25). N aron Aberaam, iai iroumi te konabwai ni “karekea te rabakau ae korakora riki” ngkai ko reireinaki ni bwaai aika a “tau ibukin ootami” (D&C 88:78).
E a tia te Uea ni kaotia bwa te rabaku ae rangin kainnanoaki e ikotaki “ma bwaai ake i karawa ao ake iaon te aba, ao iaan te aba, bwaai ngkoa, bwaai ngkai, bwaai ake a riai ni waekoa ni korobukiia; bwaai ake n te mweenga, bwaai ake iabatera; taian buaka ao aika a kamangaongao n aaba nako, ao motikitaeka iaon te aba, ao te rabakau naba ibukiia aaba ao abanuea” (D&C 88:79).
Kamataata n te tamnei iroun Robert Casey
Bukin tera? Bukin tera e rangin kakawaki karekean te reirei? Te Uea i bon irouna E katauraoa te atatai ae kamimii: “Bwa kam na tauraoi ni bwaai ni kabane ngkana I a manga kanakoi ngkami ni kakorakorai nakoami are I a tia ni wetei ngkami iai, ao te mition are I mwiokoi ngkami iai” (D&C 88:80).
N rikiraken te aonaaba ae kamangaongao aei, te reirei bon teuana mai buakon bwaai aika a kainnanoaki n te maiu aei. Ao ngkai e koaua bwa te reirei ae bati e na kairiri nakon reken te kabwaia n te maiu n rabwata, kakawakin karikirakean te rabakau bon te kakabwaia are ti anganaki bwa ti na kona iai ni kakoroa bukin ana kantaninga te Uea. N aron ae kamatataki inanon Kakorakoraia Kairake: “Te reirei bon mwakoron ana babaire ae kakawaki te Tama are i Karawa ni buokiko n riki n ai Arona. E tangiria ni kawanawana am iango ao ni karikirakea am konabwai ao tarena, korakoram ni beku mwaaka ni katabeam, ao am konabwai ni butimwaea te maiu.”2
N aron are e taekinna naba te burabeti ae Iotebwa Timiti: “Inanon te rabakau iai te mwaaka. Iai riki mwaakan te Atua nakoia tabeman riki aomata ni kabane, ibukina bwa E korakora riki rabakauna.”3
Ni bukina aika a tamaroa, te reirei ae kinaaki e kainnanoiko, riaon ririki aika a mwaiti, n reiakin riki konabwai ao rabakau tabeua, tabeua mai iai ake ko iruwa iai ke ake a aki rangin kakukurei kamatebwaiakaia iroum. Ma e boni ngae n anne, ko riai ni botumwaaka inanon am kamatebwai bwa aio e karikirakea rabakaum ao ni karababa am konabwai n am iango ao ai aron naba reakinan itera ake tabeua. Ni koauana, are ko rinanona n rinanin nako moan mwaneka iaon konabwai ao rabakau tabeua e anganiko te kakabwaia ni kinai konabwai akanne ao rabakau ake a mamate nanom iai. Ma mamaten nanom aei, ngkai ko na kanakoraoa riki am reirei, e na reke am tai ni karekei baikana ko rangin kukurei iai.
Beretitenti Henry B. Eyring, te Moan Kauntira n te Moan Beretitentii, e tibwaua te reirei ae kakawaki are e karekea mairoun tamana n te tai are tamana e reireinna bwa e na kanakoraoa riki ana reirei “ko rangi n tangiria n te aro bwa ko aki kan iangoa riki te bwai teuana, anne te bwai are ko iangoia.”4 Ngai ma Titita Cardon ti reireiniia natira bwa a na karekea aia reirei ao aia mwakuri are a bon nano iai are a na tangiria ni kan “mwananga n nako ni mwakuri ma te kimwareirei.”
E kauringiia ana aomata Iakobwa ni kaitarai “mamaaraia, ao burababaia aomata!” E kamataata, “Ngkana iai rabakauia ae uarereke ao a taku bwa a rangi ni wanawana, ao a aki kan ongo n a na taeka n reirei te Atua.” E reita te koaua ae karineaki aei imwiina: “Ma e raoiroi te ataibwai ngkana a ongo n ana reirei te Atua” (2 Nibwaaii 9:28–29).
Reireinaki ao kakauongo nakon te Uea. E na kakabwaiako ao ni kamaiuraoiko inanon kakoroan bukin Ana kantaninga.