Tera ae e Reiakiina Agung man te Baeteminton
Te I-Indonesia ae tebwitabun ana ririki e reiakinna bwa man karekean te kaantaninga e tuukia man te bwarannano.
Bon te bong ae korakora kabuebuena i Jogjakarta, Indonesia, ao ewawaa nako maonon Agung mai aon ana aari ngke e tataningaa aiana bwa e na orea ana booro. Te kaboo n te baeteminton. Ee tena te bwi, ao te 15 n ririki e kaungaaki bwa e na tokanikai.
Imwiin te kaokibooro ae matoatoa, aiana e a kakibaa te booro ni kararoaa n te aro ae e na aki rootia Agung. N aki kariaia bwa a na akea ana bwi n te kabo ae tena, Agung e kibara te booro ma e aki roko iai—ao n taenananga man tikerana iaon te timanti n takakaro.
E bon beebete taraakina bwa e tatangira te kaboo n te baeteminton. Ma Agung e aki miiakinna bwa e na riki bwa te tia takakaro n te baeteminton ae rangi ni bwaati. E na aki rineia imarenan orean nako ao kaokan te booro ae te tiatorokaoki n te Orimbiki ao ni karaoa ana mwakuri ni mitinare. E kakoauaa, bwa e bon aki rangi n tamaroa n te takaakaro.
Ai ngaia are bukin tera te tebwitabun n ririki aio ma moangarena e kataa ana kabanea ni korakora? Te Kaantaninga
“I kakoaua bwa I kona riki ae tamaroa,” e taku.
Bukin te Kaantaninga
Te kaantaninga bon bukina ae ti karaoi bwaai aika bati. Ti kamarurung bwa ti kaantaningaia bwa ti na rikirake ni korakora ao ni marurung riki. Ti kataneiai n te bwai ni katangtang ibukina bwa ti kaantaningaia bwa ti kona ni katangnga raoi. Agung e kataneiai n te baeteminton ibukina bwa e kaantaningaia bwa e na rikirake n tamaroa ana takakaro.
“Ngkana akea te kaantaninga n rikirake n tamaroa riki ao n aki tokanikai, e na rangi ni beebete kabwaraan nanom,” e taku Agung.
Te kaantaninga bon te bwai ae riai n te babaaire ni kamaiu. Te kaantaninga are ti kona ni kabwaraaki ara bure e na kairiira nakon te rairannano ao ni kataia riki imwiin are ti aki kona ni kawakina te tua.
Ekinakoan te Kaantaninga iroun Tatan
Uoua man ana bwai ni buaka Tatan aika kabanea n tamaroa ni kaaitaraira bon te nanououa ao te barannano. E aki kona n urua ana babaire te Tama are i Karawa man katokan te Mwakuri ni Kamaiu. Ma e kona ni kataia ni kamangaoa ana mwakuri ni kaitiaki te Mwakuri ni Kamaiu inanon maiura ngkana e kona n iraea ara kaantaninga are e kona ni kabwaraaki ara bure.
“Tatan e tangiriira bwa ti na kabuaa te kaantaninga,” e taku Agung, “ibukina bwa ngkana ti kabwarai nanora, e na katikuira ni kararoaira mai iroun te Tama are i Karawa.”
E ngae n anne, ngke Tatan e tokanikai ni kabwarai nanora, iai kawai ni kunean riki te kaantaninga.
Kunea te Kaantaninga
Ngkana ti kainnanoa te kaantaninga ibukin taai aika a na roko, ti kona n tarai taai aika a nako. Agung e kamanena te katooto man te reirei are e a tia n reireinna te reirei aio. “I a tia n nooria bwa ngkana I kamatebwai mwaaka, I kona n tokanikai n au ukeuke,” e taku. “Ibukin te taneiai anne, Iai au kaantaninga bwa ngkana I kakorakoraai ni kateneiai, I kona ni karaoa ae tamaroa n te baeteminton,” e taku. “Te taneiai are I rinanona e anganai te kaantaninga.”
Ngkana ti kainnanoa te kaantaninga iroun Iesu Kristo, ti kona ni kunea inanon uoua n ara taneiai n taai aika nako ma te mwaaka man te Mwakuri ni Kamaiu (taraa I-Rom 5:4) ao aia taneiai tabeman, n ikotaki ma te taneiai are ko kona n ongo n tain te bootaki n toa, te reirei n te Reirei n Taabati, te Riaona, ke booki aika tabu (taraa Iakobwa 4:4–6).
Ngkai ti kamatebwai taeka aika iai kaantaninga iai mai irouia burabeti, tataro ibukin te bwai n tituaraoi n tamnei n te kaantaninga, ao n reiakinna ni kinaa mwaakan te Tia Kamaiu inanon maiura, ara onimaki irouna e na rikirake, n ai aron ara kaantaninga are E na buokiira n taai aika a na roko.1
Tai Bwara n Nano
Agung e ataia bwa e na bon aki kona n riki bwa te tia takakaro ae mwaatai, ma e ataia bwa n teimatoana ni kakatai, iai te kaantaninga bwa e na kona n rikirake.
E a tia n reiakinna bwa mwaakan te kaantaninga ae korakora bon aio: “Ngkana ko teimatoa n aki bwara nanom, bon iai te kaantaninga,” e taku.
Inanon te maiu, ana Mwakuri ni Kamaiu Iesu Kristo bon te kabanea ni buoka are e reke iai te kaantaninga. Ibukin te Mwakuri ni Kamaiu ti kona n raira nanora ngkana ti karaoa te kaairua. Anne nanona naba bwa ibukin te Mwakuri ni Kamaiu, ti a tia n aki bwaka n ukerakira ni maiura ngkana ti karaoa te kaairua tii ngkana ti bwara n nano ni kataakin te rairannano ao te ongotaeka.
Anne bukina are Agung e reitinako ni kaoa tamana nakon te taromauri ni katoa Taabati. Anne bukina e kataia n teirake ibukin te tamaroa, e ngae ngkana raraona a aki. Anne bukina are e karaoa mwanangana are teuana te aoa n ana bwatika nakon te auti ni bootaki n taai nako ibukin te tieminari, Miutuo, bootaki n te Taabati, aia kiraati ni katauraoi mitinare, ao ni buokia ni kaitiaka te kateitei.
“E aki beebete kataakin ae kona n riki n ai aron Iesu,” e taku Agung. “N tabetai ao e a reke te bwarannano, ma e aki bwara nanou. Ibukin ana aanga karea ibukiu, Iai te kaantaninga irou bwa I kona n tamaroa riki.”
Ibukin te Mwakuri ni Kamaiu bon iai te kaantaninga. Ao ibukin te kaantaninga, te Mwakuri ni Kamaiu e kona ni bita maiura.
Tamnei iroun Adam C. Olson