Fakaʻofoʻofa he Potu Kotoa
Fakakaukau ʻokú ke ʻaʻahi ki ʻAfilika. ʻI hoʻo sio ko ia ki he fanga monumanu kaivaó ʻi hoʻo meʻafakaʻatá, ʻokú ke fakatokangaʻi atu ha meʻa ʻoku hangatonu mai kiate koe. Ko ha lulu hangē ha ʻīkalé! ʻI heʻene ofi maí, ʻokú ke hiki hake ho nimá ke maluʻi koe. Ka naʻe ʻikai ke ne ʻohofi koe, kae tuʻu fakalelei pē ia ʻi ho nimá, ʻo fai ha fanga kiʻi tangi mo sio taimi nounou atu kiate koe pea toe puna pē ia. Naʻe hoko moʻoni ʻeni kia Palesiteni Poiti K. Peeka, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻOku saiʻia ʻi he fanga monumanú pea tautautefito ki he manupuná.
Ko e taha e founga ʻoku fakahaaʻi ʻaki ʻe Palesiteni Peeka ʻene saiʻia ʻi natulá ko e tā fakatātaá. Talu mei heʻene kei siʻí, mo ʻene manako ke tā fakatātā, tā valivali, pea mo tā-tongitongi. Naʻe pehē ʻe Palesiteni Peeka, “ʻOku fakamoʻoniʻi ʻe he ngaahi meʻa kotoa ʻoku ou mamata aí ki hoku laumālié ʻoku ʻi ai ha ʻOtua, naʻá Ne fakatupu e meʻa kotoa pē.”
Naʻe tā ʻe Palesiteni Peeka ʻa e fanga monumanu ko ʻení ʻi hono taʻu 11. Naʻe faʻa ʻomi ki ʻapi heʻene tamaí ʻa e toenga pepa naʻe ʻikai fakaʻaongaʻi ʻe he nusipepa fakakoló, pea naʻe faʻa tokoto foʻohifo ʻa Palesiteni Peeka ʻo tā fakatātā. Naʻá ne pehē, “Kapau ko e tā fakatātaá ko ha mahaki, ʻoku hangē naʻá ku puke lahi ʻaupitó.”
Naʻe taʻu 10 nai ʻa Palesiteni Peeka ʻi he taimi naʻá ne ngaohi ai ʻeni mei ha fuaʻi paini naʻe maʻu ʻi ha kemi ʻa e fāmilí.
Lolotonga ʻene hoko ko ha pailate ʻi he ngāue fakakautaú, ne meili mai ʻe Palesiteni Peeka ha ngaahi tohi ki ʻapi ʻi ha ngaahi sila naʻá ne teuteuʻi fakaʻofoʻofa he lolotonga hono taimi ʻataá.
Kuo ʻosi tā-tongitongi ʻe Palesiteni Peeka ha fanga manupuna ʻe hongofulu tupu ʻi he ngaahi taʻu kuo maliu atú. Naʻá ne pehē ʻoku tokoniʻi ia ʻe he tā-tongitongí ke ne ongoʻi nonga mo fakakaukau ki he meʻa ʻoku totonu ke ne leaʻaki ʻi he ngaahi malanga ka hokó.
Naʻe tongi mo vali ʻe Palesiteni Peeka ʻa e fanga manupuna ʻakau ʻi laló ʻi he taimi naʻe kei siʻi aí, ʻo fakaʻaongaʻi e papa mei ha ngaahi puha papa motuʻa mo e vali naʻe foaki ange ʻe hanau kaungāʻapi.
Ngaahi taá ko e angalelei ia ʻa e Palesitei Poiti K. Peeka