Kae ʻOua Ke Tau Toe Feʻiloaki
Ko Hono Manatuʻi Ia ʻi he Sāpaté
Naʻe lele lelei pē ʻemau lēsoni he Lautohi Faka-Sāpaté ki he tauhi ʻo e ʻaho Sāpaté ke māʻoniʻoní—kae tālunga e lava hake ʻa ha taha ki he televīsoné.
ʻI he takitaha fakaongo ko ia ʻe he kakaí ʻenau ngaahi fakakaukau fekauʻaki mo e taau pe taʻe taau ʻo e mata televīsone he Sāpaté, naʻe kamata ke vili taʻeʻunua ha niʻihi e kau mēmipa ʻo e kalasí. Naʻe ʻikai fuoloa, kuo loto mamahi e toenga ʻo e kau mēmipa ʻo e kalasí. Naʻe fetongi e Laumālie naʻe ʻi heʻemau ʻuluaki fealēleaʻakí, ʻaki ha meʻa naʻe ongoʻi ʻe he taha kotoa.
Naʻe kole ʻa Kēneti Peini, ko ha mēmipa ʻo e kau palesitenisī fakasiteikí, ʻi heʻene sio ki he fakalalahi ʻo e fakafekikí, ke lea. Naʻe tuʻu ʻo kamata ke fakamatala mai fekauʻaki mo hono foha ko Palaiení, ʻa ia ne ngāue ʻi he Misiona Siapani Tōkiō Tokelaú. Ko e taimi naʻe talitali ai ʻe Palesiteni Peini mo hono fāmilí ʻa Palaieni he malaʻe vakapuná ʻi heʻene foki mai mei heʻene ngāue fakafaifekaú ʻi Māʻasi 2003, naʻe lāunga ʻi he mamahi hono kaungaó. Naʻe ʻilo ʻi ha ngaahi uike siʻi pē ʻoku maʻu ʻa Palaieni ʻe he kanisaá (non-Hodgkin’s lymphoma).
Ne ʻosi ha māhina ʻe taha mei ai kuo kamata ʻi ha ngaahi faitoʻo kimo (chemotherapy) pea toki pea toki hulu (radiation). Naʻe pehē ʻe Palesiteni Peini naʻe palani ʻa e kau toketaá ke fai ha tafa toʻo mai ha uhoʻi hui (bone-marrow transplant) ʻi he ʻaho 22 ʻo Sepitemá, ka ʻi he ʻosi pē ʻa e ʻuluakí he māhina ko iá, “Kuo kamata ke faingataʻaʻia ʻa Palaieni.”
Naʻe fakatokoto falemahaki ia ʻi he uike hono ua ʻo Sepitemá. ʻI he taimi ko ʻení, kuo pehē ʻe he kau toketaá kuo fuʻu tōmui ʻa e tafá, koeʻuhí ko e natula totolo ʻa e kanisaá. Ne fakafoki mai leva ʻe he fāmilí ʻa Palaieni ki ʻapi mei he falemahakí he ʻaho 21 ʻo Sepitemá. Naʻe siʻi mālōlō pē ʻi he pongipongi hono hokó.
Naʻe pehē ʻe Palesiteni Peini, “Ko e ʻaho 22 ʻo Sepitemá ko ha ʻaho makehe ia ki hoku fāmilí mo au. Ko e ʻaho ko iá ne mau kiʻi tuʻu ʻo fakakaukau kia Palaieni, ki heʻene ngaahi tokoni ki homau fāmilí, pea mo ʻene foaki e taʻu fakaʻosi ʻe ua ʻo ʻene moʻuí ki he ʻEikí mo e kakai Siapaní, ʻa ia naʻe ʻofa aí. ʻOku mau ʻofa ki ai, pea ʻoku mau fakakaukau ki heʻene moʻuí he ʻaho ko iá pea mo fakaʻapaʻapaʻi e manatu ki aí.”
Pehē ʻe Palesiteni Peini, Ko e Sāpaté ko ha ʻaho ia ke tau kiʻi tuʻu kātoa ai ʻo manatu.
“ʻOku tau tuku ha taimi ke ō ai ki he ngaahi houalotú, maʻu ʻa e sākalamēnití, mamahi ʻi heʻetau ngaahi angahalá, mo fakalaulauloto ki he mamahi ʻa e Fakamoʻuí koeʻuhí ko kitautolú. ʻOku tau tokoni, ʻoku tau ʻofa, pea ʻoku tau feinga ke ʻoua ʻe toʻoa kitautolu ʻe he ngaahi ʻekitivitī te ne ala taʻofi ke ʻoua te tau lotu kiate Iá.”
Naʻe pehē ʻe Palesiteni Peini kapau ʻoku fenāpasi ʻa e ngaahi ʻekitivitī ʻo e Sāpatée mo e laumālié, te tau ongoʻi tonu pē ʻi heʻetau kau aí. Ka, kapau ʻoku nau afeʻi kitautolu mei hono manatuʻi ʻo e Fakamoʻuí mo e tokoni he Sāpaté ʻo hangē ko ia naʻá Ne mei faí, pea mahalo ʻoku totonu ke tau toe fakakaukauʻi ʻetau filí.
Naʻe toki tangutu leva ʻo ʻikai ke ne toe leaʻaki ha meʻa. Naʻe ʻikai toe fie maʻu ia. Kuo toe foki mai ʻa e laumālié ki he loki kalasí, pea naʻa mau fanongo kātoa.
Toʻo mei he Kalaisi ʻi Ketisemaní, tā ʻe Heinrich Hofmann, ʻi he angalelei ʻa e C. Harrison Conroy Co.