Naʻe Femoʻuekina Tatau pē Mo ʻEku Faiako Seminelí

Fai ʻe Maria Andaca, Metulō Manila, ʻOtumotu Filipainí

ʻOku ʻi he ʻOtu Filipainí ha ngaahi ako māʻolunga saienisi ʻoku mālohi ʻenau tokanga ki he tafaʻaki fakaʻatamaí (academics). Ko e fānau ako ʻi he ngaahi ʻapiako ko ʻení ʻoku ʻave ha ngaahi lēsoni lahi ange, fakamoleki ha taimi lahi ange ʻi he kalasí, pea lahi mo e ngaahi ngāue fakaako ke fai mei ʻapí. Ko e faʻahinga ʻātakai ʻeni naʻá ku ʻi ai ʻi heʻeku kei finemuí.

Naʻá ku mavahe mei ha ngaahi ʻekitivitī lahi ʻi heʻeku hū ki he akoʻanga māʻolungá koeʻuhí he naʻá ku ʻilo te u fakamoleki ha taimi lahi fau ke ako. Naʻe ʻikai ke u mei faʻa ʻalu ki he ngaahi ʻekitivitī ʻa e Siasí pea naʻá ku faʻa liʻaki lotu he Sāpaté ʻi he taimi ʻe niʻihi koeʻuhí ko e ngaahi meʻa fakaakó. Naʻá ku toe faingataʻaʻia foki he feinga ke ʻalu ki he seminelí.

Naʻe fakamatala mai heʻemau faiako seminelí ʻi ha ʻaho Tokonaki ʻe taha ʻa e lahi ʻo ʻene femoʻuekina he ngaahi ʻaho ʻo ʻene ʻi he ako māʻolungá. Ka neongo ʻene taimi tēpile femoʻuekiná, naʻá ne lava pē ʻo fakakakato ʻene ngaahi ngāue he seminelí naʻe fai mei ʻapí mo ako ʻa e ngaahi potufolofola ke manatuʻí ʻi he laipelí. Naʻá ku pehē leva ke u fakahoko ʻene tukupaá ʻo fai ʻa e meʻa tatau. Naʻá ku toʻo holo ʻeku kaati folofolá ʻi he taimi kotoa pē ʻo vakai ki ai he lolotonga hoku taimi ʻataá. Naʻá ku lotua ha tokoni ke fakafekauʻaki lelei ʻeku ako he seminelí pea mo e ngaahi fie maʻu ʻo e akó. Naʻá ku ako maʻuloto ʻa e ngaahi potu folofolá he lolotonga ʻeku fononga ki he akó. Naʻá ku toʻo ki tuʻa ʻa e ngaahi kātí ʻi he lolotonga ʻeku talanoa mo hoku ngaahi kaungāmeʻá. ʻI he lolotonga ʻo e taimi mālōloó mo e maʻu meʻatokoni hoʻataá, naʻe fiefia hoku ngaahi kaumeʻá ʻi hono siviʻi au ʻi he ngaahi kaati folofola maʻulotó. Fāifai pea kamata hanau niʻihi ke ʻomai ʻenau ngaahi folofolá mo talanoa fekauʻaki mo e ngaahi ʻekitivitī heʻenau ngaahi lotú. Naʻá ku ongoʻi ʻa e liliu ʻi hoku ʻātakaí, pea naʻe ongoʻi maʻamaʻa mo lelei ange ʻa e akó.

Naʻe muimui hoku fanga kiʻi tokoua iiki ʻe tokotolú ʻiate au, pea ko e taimi ní, kuo utu ʻe hoku fāmilí ʻa e ngaahi tāpuaki ʻo e folofolá ʻi homau ʻapí. Ko hono ako ko ia ʻo e ngaahi veesi ako maʻulotó ko ha meʻa mātuʻaki faingofua, kae mahulu hake ʻi he mahuʻinga hono ako maʻuloto ʻo e ngaahi leá, ne u ʻilo ʻa e liliu ne ala lava ke fai ʻe he ngaahi folofolá ʻiate aú pea mo e kakai ne mau feohí. ʻOku ou ʻilo ko e hā pē ha pole pe faingataʻa te tau fehangahangai mo ia, te tau maʻu maʻu pē ha ivi mo ha fakahinohino ʻi he ngaahi folofola hotau Fakamoʻui ʻofá.