Fakafiefiá mo e Mītiá

ʻOku fonu hotau sōsaietí ʻi he ngaahi fili fakamītiá. Kuo pau ke tau tokanga pe ko e hā ʻa e ngaahi ʻīmisi pe ngaahi fakakaukau ʻoku tau fakaʻatā ke hū ki hotau ʻatamaí koeʻuhí he “ʻe uesia [kitautolu] ʻe ha meʻa pē ʻoku [tau] lau, fanongo ki ai, pe sio ai” (Ki Hono Fakamālohia ʻo e Toʻu Tupú [tohi tufa, 2011], 11). Naʻe tohi ʻa ʻEitulieni ʻŌkoa (Adrián Ochoa), ko e tokoni ua ʻi he kau palesitenisī lahi ʻo e Finemuí, fekauʻaki mo e fakafiefiá mo e mītiá he peesi 48 ʻo e makasini ko ʻení.

“Manatuʻi, ko hono moʻoní, ʻokú ke ʻi he moʻui ko ʻení ke fakatupulaki hoʻo tuí, ke siviʻi, pea ke ke ako mo fiefia. ʻI hoʻo hoko ko e mēmipa ʻo e Siasi moʻoni ʻo Kalaisí, ʻokú ke maʻu ai ha mālohi lahi ke tokoni atu. ʻOkú ke maʻu ʻa e mālohi ʻo e Laumālie Māʻoniʻoní ke fakatokanga atu ʻi he taimi ʻoku tuʻu nuku atu ai ha meʻa ʻoku ʻikai totonu. ʻOkú ke toe maʻu foki mo e mālohi ʻo e tauʻatāina ke filí, ke ke lava ai ʻo fili ʻa e meʻa te ke fakahoko pe taʻe fakahokó.”

Ngaahi Fokotuʻu ki hono Akoʻi ʻo e Toʻu Tupú

Aleaʻi mo hoʻomou toʻu taʻu hongofulu tupú ʻa e ngaahi heleʻuhila ʻoku mou sio fakafāmili aí. Fakafanongo ki he fasi ʻoku nau maʻú. Fakakaukau fakataha ki he anga hono fakafehoanaki kitautolu ʻe he mītiá ki he ngaahi tuʻunga moʻui totonu ʻi he Ki Hono Fakamālohia ʻo e Toʻu Tupú.
ʻAlu ki he youth.lds.org ʻo lomiʻi ʻi he “For the Strength of Youth” ʻi he Fakahinohino ki he Toʻu Tupú. Te ke maʻu ai ha ngaahi vitiō, ngaahi fakamoʻoni folofola, ngaahi polokalama letiō ʻo e Sēnolo Māmongá, ngaahi fehuʻi mo e ngaahi tali, pea mo ha ngaahi fakamatala (hangē ko ʻení, vakai, “Getting Real”), pea kau ai mo e ngaahi malanga ʻa e Kau Taki Māʻolungá.
Fakakaukau ke fakahoko ha efiafi fakafāmili ʻi ʻapi ʻi hono mahuʻinga ʻo e fili e mītia leleí (ko ha maʻuʻanga fakamatala lelei ʻa David A. Bednar, “Ko e Ngaahi Meʻá ʻo Hangē ko Honau Anga Moʻoní,” Liahona, Sune 2010, 22–24.

Ngaahi Fokotuʻu ki hono Akoʻi ʻo e Fānaú

ʻI he talanoa ko ia ʻo e “ʻOku Pule Hono Fakakalasí,” ʻi he peesi 70, naʻe ʻilo ʻe ʻĒtani pe ko e hā ʻa e mītia ʻoku lelei ke ne fakaʻaongaʻí koeʻuhí he naʻe ʻosi talanoa ki ai hono fāmilí. Te mou lava ʻo lau e fakamatalá ni mo hoʻomou fānaú pea mou pōtalanoa ʻo fakaʻaongaʻi ʻa e ngaahi fehuʻi ko ʻení:

Ko hai ʻe lava ʻo tokoni mai ke tau fai e ngaahi fili lelei he mītiá mo e fakafiefiá?
Ko e hā ʻa e mītia ʻoku lelei ke tau mamata, lau, pe fanongo aí?
Ko e fē taimi ʻoku SAI ai ke fakaʻaongaʻi ʻa e mītiá?
Ko e fē feituʻu ʻoku totonu ke tau fakaʻaongaʻi ai ʻa e mītiá?
Ko e hā e ʻuhinga ʻoku mahuʻinga ai ke tau tokanga fekauʻaki mo e fakafiefiá?

Fakakaukau ke faʻu haʻamou fakahinohino fakamītia maʻá e fāmilí ʻaki hano pelu ua ha ngaahi laʻi pepa ʻoku teʻeki tohitohiʻi pea fakapipiki kinautolu ʻi he pelukiʻangá ke maʻu ha kiʻi tohi. Te mou lava ʻo hiki ʻi he pēsí takitaha ha faʻahinga mītiá ʻoku fakaʻaongaʻi ʻi homou ʻapí, fakataha mo e ngaahi tuʻunga moʻui totonu ki he fāmilí pea mo e faleʻi fakapalōfita fekauʻaki mo e mītiá ko iá.

Te mou toe lava foki ke lau ʻa e “Tāmateʻi pea Fakahā” naʻe faʻu ʻe Danielle Kennington (Liahona, ʻo Sune 2011, 64) ke tokoni ʻi haʻamou kamata ha pōtalanoa fekauʻaki mo hono fakaʻaongaʻi totonu ʻo e mītiá.

Tā fakatātaaʻi ʻe Taia Morley