Tāmateʻi pea Fakahā
“Faitōnunga pea ʻoua ʻe tukulolo ki ha ʻahiʻahi” (T&F 9:13).
Naʻe tangutu hifo ʻa Kona ʻi he komipiuta fakafāmilí ʻo taipe ʻi he tuʻasila he uepisaití naʻe ʻoange ʻe hono kaungāmeʻá. He naʻe talaange ʻe hono kaungāmeʻá, “ʻOku totonu ke ke sio heni!”
Ka ʻi he ʻasi hake pē ʻa e uepisaití, naʻe ongoʻi taʻefiemālie ʻa Kona. Naʻá ne feinga fakavavevave ke tāpuniʻi e pēsí, ka ko e lahi ange ʻene lomí, ko e lahi ange ai pē ia e ngaahi fakatātā kovi naʻe ʻasi haké. Naʻe hanga ʻe Kona ʻo lomiʻi ʻe meʻa ke tāmateʻi ai e komipiutá peá ne lele ki hono lokimohé.
Naʻe ongoʻi tautea ʻa Kona heʻene sio he ngaahi fakatātā ko iá. Talu mei hono papitaisó ʻi he ngaahi māhina siʻi kuo hilí mo e kamata ke ne ongoʻi ʻa e nonga makehe ʻo e Laumālie Māʻoniʻoní. Ka ʻi he hili ʻene sio ʻi he ngaahi fakatātā ko ʻení, naʻe ʻikai ke ne maʻu ha nonga. Naʻá ne ongoʻi halaia mo ilifia naʻa ʻiloʻi ʻe ha taha ʻa e meʻa naʻá ne sio aí.
Naʻe fakalongolongo pē ʻa Kona he taimi kai efiafí. Naʻá ne feinga ke fanongo ki he talanoa ʻa hono fāmilí, ka naʻe haʻu pē ki hono ʻatamaí ʻa e ngaahi fakatātā ko ia naʻá ne sio aí. Naʻe ʻikai mavahe meiate ia ʻa ʻene ongoʻi faikehe ʻi hono keté.
ʻI he lotu ʻa Kona he pō ko iá, naʻá ne fakahā ki he Tamai Hēvaní ʻa e ngaahi fakatātā naʻá ne sio aí. Naʻá ne kole fakamolemole pea he ʻikai ke ne toe fai ia. Hili ʻene lotú naʻá ne kiʻi ongoʻi nonga ange, ka naʻá ne toe ongoʻi pē ʻoku totonu ke ʻalu ʻo talanoa mo ʻene faʻeé. Naʻe ʻikai fie maʻu ʻe Kona ia ke ne talaange ki ai e meʻa naʻe hokó. Fēfē kapau te ne ʻita pe loto mamahi ai?
Naʻe faifai pē pea fakapapauʻi ʻe Kona ʻe talanoa mo ia. Naʻá ne ʻalu ki he loki ʻene faʻeé ʻo tangutu hifo ʻi hono mohengá ʻa ia naʻá ne lautohi ai.
“Fineʻeiki, ʻe lava ke ta talanoá?” ko ʻene fehuʻí ange ia.
Naʻe pehē ange ʻe heʻene faʻeé, “ʻIo. Ko e hā e meʻa ʻoku hokó?”
Naʻá ne talaange e meʻa hono kotoa. Naʻá ne fakahā ange e meʻa naʻe talaange ʻe hono kaungāmeʻá, mo e meʻa naʻá ne sio ai ʻi he saití. Naʻe siofi pē ia ʻe heʻene faʻeé, ka naʻe ʻikai hangē ia ʻoku ʻitá.
Naʻe talaange ʻe Kona, “Naʻe ʻikai ke u ʻiloʻi e meʻa ke faí. Ko ia naʻá ku tamateʻi pē ʻa e komipiutá peá u lele mei ai. Kātaki fakamolemole, fineʻeiki. Naʻe totonu pē ke ʻoua te u taipeʻi ʻa e tuʻasila ko iá, ka naʻe ʻikai ke u ʻiloʻi ʻe au naʻe kovi.”
Naʻe fāʻofua ʻa e fineʻeikí ʻia Kona. Naʻá ne pehē ange, “ʻE Kona, ʻoku ou fakameʻapangoʻia hoʻo sio ʻi he ngaahi fakatātā ko iá. ʻOku feinga e kakai ia ʻe niʻihi ke kākaaʻi e fānaú ke nau sio ʻi he ngaahi meʻa ʻoku koví. Ka naʻá ke fai ʻa e meʻa totonú. ʻI hoʻo sio pē ʻi ha ngaahi fakatātā kovi ʻi he komipiutá, ʻoku fie maʻu ke ke ‘tāmatei pea fakahā.’ ʻA ia ko hono ʻuhingá ke ke lomiʻi e meʻa ke tāmateʻi ai e komipiutá peá ke haʻu ʻo fakahā kiate au he taimi pē ko iá. Ko e meʻa totonú pē ʻena naʻá ke faí.”
Naʻe ongoʻi fiemālie ʻa Kona!
Naʻe talaange ʻe he fineʻeikí, “ʻE Kona, ʻoku ou loto ke ke ʻiloʻi ʻoku ʻikai ko e foʻui ia ʻoʻou. Ko ha fehālaaki ia, pea ʻoku ʻikai totonu ke ke ongoʻi halaia ʻi he meʻa naʻe hokó.”
“Fineʻeiki, kapau naʻá ku fai e meʻa totonú, ko e hā ne u ongoʻi taʻefiemālie pehē aí?”
Naʻe fakamatalaʻi ange ʻe heʻene faʻeé, “ʻI he taimi ʻoku hoko ai ha meʻa fakatuʻutāmaki, ʻoku fakahā mai ʻe he Laumālie Māʻoniʻoní ke tau ʻiloʻi. Ko e ongo ko ia naʻá ke maʻú, ko hono talaatu ia ʻe he Laumālie Māʻoniʻoní ke ke mavahe mei ai. Te u ʻai ki heʻetau komipiuta ha meʻa sivi ke ne taʻofi ʻa e hū ki he ngaahi saiti ʻoku koví, ka ʻe lava pē ke hū mai ha ngaahi meʻa kovi ia he taimi ʻe niʻihi. ʻOkú ke ʻilo pē meʻa ke faí ʻo ka toe hoko ha meʻa peheni, ko ia?”
Naʻe talaange ʻe Kona, “Tāmateʻi e komipiutá pea fakahā atu kiate koe.”
“Ko ia!” ko e Fineʻeikí ange ia.
Kimuʻa pea foki ʻa Kona ki hono mohengá, naʻá ne lotu ʻo fakamālō ki he Tamai Hēvaní ʻi he ongoʻi fiemālie ʻokú ne maʻú. Lolotonga ʻene lotú, naʻá ne ongoʻi ʻa e nonga mei he Laumālie Māʻoniʻoní. Naʻá ne ʻiloʻi ʻe lelei e meʻa hono kotoa.
Ngaahi tā fakatātā ʻa Bryan Beach